Ningrum Ningtau Jan Myit Pyaw Kabu Lu Na Ladat Ni ( Dinghku Ngwi Pyaw Tsi )

       Tsawra hkungga kun dinghku kawa la ni e anhte ningrum ningtau jan ni hpe myit pyaw myit dik lu na lam hta anhte gaw magam bungli shing nrai hkrun lam hkawm ai lam hta dum nta de hpang hkret du wa na rai jang, ya prat hta matut mahkai na phone hkum ding dek ngu na daram lu sai re majaw ningrum ningtau jan hpang de Phone matut mahkai shiga jaw ai majaw shi hpe ahkyak nshatai ai ngu sawn la na na hpe koi yen lu nga ai.

       Anhte La ni law malawng gaw magam bungli hta raitim manaw manang ni hte  hkrum zup ai ten ni hta raitim myit shang myit lawm loi nna dum nta ningrum ningtau jan hpe shiga jaw shana na matu malap chye ga ai.Ndai lam ni gaw mara re ngu mai tsun tim dum nta hta tinang hpe la nga ai ningrum ningtau jan kaw nna gaw du wa hkyen sai ngu myit hte la nga na hta tau nau chye da ai rai yang gaw grau kaja na rai nga ai.

       Dai re majaw Phone hte jahkring mi matut dat ai hte sha ningrum ningtau jan a aten ahkying ni hpe manu shadan ya ai gaw grau nna kaja nga ai.Bai nna tsawra ai kun dinghku kawa la ni anhte gaw shadu kachyawng ai lam hpe mung sharin da ga ngu tsun mayu ai.

       Anhte gaw kachyi pyi shadu kachyawng nchye ai ngu lawt ga jaw na hta sharin hkaja ai hpe myit sharawng ra nga ga ai.Hpa mi rai rai nnan langai ngai hpe sharin hkaja ai ngu ai gaw pyaw hpa myit nyan jahtoi ningtawn shangun ai lam langai mung rai nga ai.N yak ai loi ai shadu kachyawng lam masum mali hpe atsawm sha galaw shaman da nna ningrum ningtau jan hpe jahkring hkring shadu jaw ai rai yang ningrum ningtau a tsawm htap ai mani sum sai ni hpe anhte galoi mung lu taw na sha rai nga ai.

       Dai re majaw anhte kun dinghku kawa la ni rau ai hkring sa ai ten ni hta shat gawk kata hta ningrum ningtau jan hpe garum let atsin sha sharin la ga.Dai rai yang  ningrum ningtau jan a shangai nhtoi zawn re ai masat nhtoi ni hta shadu kachyawng jaw mai ai.Galoi mung jau jau rawt nna manap shat galaw jaw ai ningrum ningtau jan a matu shi yup rawt ai hte jahpawt shat tsep zi rai galaw da ya ai hpe ningrum nintau jan mu jang shanhte kade daram myit pyaw na ngu ai gaw anhte myit yu lu nga ga ai.

     Lahta de tsun lai wa sai hte  maren jahkring hkring phone matut mahkai ga ngu mung tsun mayu ai.Dum nta hta mu hkrum lu ai gaw ngu ai myit na hta magam bungli hta shani tup nga ra ai ten hkring sa ten phone matut mahkai ai gaw grau kaja nga ai.Anhte ningrum ningtau jan shagu gaw ningrum ningtau wa kaw nna phone shaga nsen hpe myit mada chye nga ai hpe anhte myit dum ra ga ai.

      Magam bungli shara hta hkring sa ten ni hta jahkring mi sha raitim phone shaga matut ai lam gaw ningrum ningtau jan hpe tsawra ai ngu ai hpe madun ai lam mung rai nna tinang hkum nan mung bungli hta myit tsam pu tsam ba myit ni hpe shayawm ya lu nga ai.Ningrum ningtau jan hpe tinang mung tsawra ai re majaw tinang tsawra ai wa hte jahkring mi sha pyi ga shaga matut ai lam galaw dat ga ngu tsun mayu ai.Ningrum ningtau jan hpe lani mi phone lahkawng lang dang phone matut mahkai shaga ai lam gaw kun dinghku hpe mung dan dan leng leng nan myit pyaw hpa lam hpe jat wa shangun ai nga ma ai re.

      Bai nna Gat mari hkawm ai lam hta ningrum ningtau jan hte  rau hkawm ai lam mung galaw ya mai nga ai.Dai hta anhte gaw ningrum ningtau jan ra ai hpe mari na matu gumhpraw jaw dat ai hta, rau sha gat mari hkawm ai lam hta tinang kaw nna shawng shaga ai ten ningrum ningtau jan gaw myit pyaw kabu na sha rai nga ai.Gat kata du tim gumhpraw buk jaw dat nna tinang gaw tinang ra ai seng shing nrai shara mi hta dung lat nga ai lam,kaga arung arai ni hpe yu hkawm ai lam n galaw ai sha,ningrum ningtau jan hte rau rai mari lata garum ai lam,ningrum ningtau jan hpe tinang bu hpun shangun mayu ai hpe lata jaw ai lam gaw yu (ra) sharawng hpa rai nga ai.

     Magam bungli kaw nna tinang kade pu ba nna wa ai raitim ningrum ningtau jan a lani mi na aten hpe san let tinang a lani mi na aten ni hpe mung tsun dan hkat mai nga ai.Ndai zawn ga tsun jahta ai lam ni n galaw ai rai yang tsun shaga matut mahkai ai lam ngu ai mung nga wa  na nrai nga ai.

      Bai nna tsawra ai kun dinghku kawa ni anhte a ningrum ningtau jan ni hpe masha shawng hta shakawn shagrau ga tsun shaga ai lam mung ahkyak nga ai.Anhte jinghku manaw manang ni a lapran hta tinang a ningrum ningtau jan hpe shakawn hkri awn dat ai lam gaw ningrum ningtau jan hpe kaya sumsai byin shangun nna lani ting na n gun hpring shangun ai lu ai sha n ga,shakawn hkri-awn gring ai ningrum jan hpe lu da ai majaw masha ni mung yu n gun lu na sha rai nga ai.Raitim dawn dawn jan jan rai shakawn ai lam nre ai sha ningrum jan a langai ngai hpe galaw ai lam hta tinang hkum nnan kaja wa ra sharawng ai hpe tsun ai rai yang grau kaja nga ai.

     Anhte a kashu kasha ni a matu aten jaw ai lam mung ahkyak nga ai.Kashu kasha ni gara wa gaw tsang kade rai sai hpe nmatsing ai,mying pyi shut shaga ai majaw ningrum jan pyi pawt ai” nga nna mani let tsun ai ni mung nga nga ai.Dai zawn re ai Kawa gaw anhte nbyin ga law.Kade mi aten nnga ai raitim tinang a shawng lam kashu kasha ni hpe gaw lahku lamai na matu,bau maka na matu,sharin shaga na matu gaw nhprai gring ga ai.Anhte a kashu kasha Ma ni hpe jawng sa jawng wa galaw ya ai,shani shat bu galaw ya ai lam ni mung galaw gring nga ai.Ndai hku galaw ya ai lam gaw ningrum ningtau jan hpe garum ya ai lam mung rai nna kashu kasha ni hpe tsawra shawang myit madun ai lam mung rai nga ai.

     Tsawra ai dinghku kawa ni ningrum ningtau jan hte rau nga ai ten ni hpe anhte law law galaw la nga ga.Ningrum ningtau jan hte  lahkawng sha rai nga na matu lani mi hta aten hkying hkum mi daram sha pyi galaw la lu yang gaw kun dinghku hta grau nna ngwi pyaw na sha rai nga ai.Bai na tsawra ai kun dinghku kawa la ni e anhte ningrum ningtau jan hpe kanu langai zawn shadu kanawn mazum ai lam hpe koi yen ga.Anhte kun dinghku nnan de ai ten kashu kasha nlu shi yang anhte gaw ningrum ningtau jan hpe ahkyak la lanu lahku lamai ai lam ni galaw chye tim,kashu kasha ni a kanu byin tai wa ai shaloi gaw ningrum jan a ntsa ningmu ni galai shai chye ga ai.

      Dai gaw tsawra myit yawm mat wa ai gaw nrai ai zawn jin mat ai lam mung gaw nrai nga ai.Raitim Ningrum ningtau a ntsa ma langai zawn hpai nep chye ai ningrum jan gaw kashu kasha ni a ntsa jet ai kanu hku na hkam sharang galaw ya ai shaloi tinang kaw nna hpai nep chye ai ningrum jan zawn nmu mat ai sha hkam sharang chye ai kanu hku nna sha mu mat nna tinang hpe mung kasha ni hte rau myit ra hkan na matu myit hta ra taw nga chye ga ai.

      Dai gaw ningrum jan a matu rap ra ai kun?Kanu kawa ngu ai gaw kashu kasha ni kamhpa manoi shara rai nna ningrum ningtau wa ngu ai gaw ningrum jan a kamhpa manoi shara re ngu ai hpe myit dum ra nga ga ai.Dum nta lit magam,kashu kasha lit magam ni hte pu ba ai taw nga ai ningrum ningtau jan a hkring sa shara ningrum ningtau wa hku nna tsawra shawang myit, masin salum anhta hta tawn da ra ga ai.

      Bai nna tinang a ningrum ningtau jan matu masat kumhpa ni hpe mung jahkring hkring jaw mai nga ai.Shi hkrai hte shi galoi ten raitim mari la mat ai arai raitim,ningrum ningtau wa kaw nna masat dingsat hku nna mari jaw ai re majaw myit pyaw na sha rai nga ai.Grau nna tinang a ntsa tsawra wa na rai nga ai.

      Dai re majaw hkawm wa hkawm sa ai lam hta ningrum ningtau jan hte htap htuk ai nampan,gumhpraw sumbu,nten hkyeng,labye bu hpun palawng zawn re hpe mari ya gring nga ga ai.Lahta na lam ni hpe jahkring hkring galaw ya ai rai yang ningrum ningtau jan gaw tinang a prat hta kade daram ahkyak ai ngu ai hpe madun lu ai zawn tinang hkum nan mung ngwi pyaw dinghku,matsan dum chye ai ningrum ningtau jan hte tsawra nja ai kashu kasha ni  lawm ai kasi kaja kun dinghku hpe woi awn lu ai dinghku kawa kaja langai byin tai wa lu na rai nga ga ai.

Ref - May Thangyan Hein

By; John Mung Hkrang