Ningrum Ningtau Hpe Myit Pyaw Shangun Mayu Yang

Sara Mung Doi Tang & his wife

Tsawra ai kun dinghku kanu num ni,anhte kun dinghku prat na wa ai hte rau madu jan madu wa langai hte langai myit pyaw myit dik lam lu na matu da kan ra ai lam ni law law nga wa ai hpe mu lu nga ai.Sumtsaw sumra nnan byin ai ten,nnan hkungran dinghku de ai ten ni hta gaw lam shagu hta hprinem nga ai gaw shingra tara nan rai nga ai.Raitim aten ladaw ni na wa ai ten ni shaning ladaw ni na wa jang gaw mungkan a kaja ai lam nkaja ai lam ni hpe hkrum kadup wa ai ten ni hta nnan shaloi na zawn gaw nhprinem wa sai zawn,myit pyaw myit dik lam mung nau nkaja wa nga ai.

Kun dinghku de ai prat aten ladaw na wa magang grau nna nhprinem ai lam ni law wa magang rai nna, myit pyaw ngwi pyaw lam ni grau nna taw wa ai lam ni mung byin chye nga ai.Anhte ni kun dinghku de ai prat na wa ai hte rau kun dinghku lam hpe grau nna ahkyak shatai lahku lamai ra nga ga ai re.

Madu jan madu wa shada da mung kashu kasha ni hte kun dinghku dum nta hpe mung grau nna myit kap nna kun dinghku prat hpe pyaw hkra tinang maga hku nna mai byin ai made shakut shaja ra nga ga ai.Kun dinghku de ai kaw nna tinang hkum tinang mai byin hku,kam ai hku nnga ai sha atsawm sha shakut tinang hkum tinang mung tsawm htap hkra nga yang gaw grau nna kaja nga ai.

Tsawm htap ai hku nga ngu ai hta hkum hte myit masin tsawm htap hkra nga ra ai.

Anhte kun dinghku lam hta hkum gawng shingyan kade  daram mi tsawm nga tsawm nga,myit masin ntsawm ai wa hpe aten galu kadai ntsawra lu nga ai.Anhte hkum gawng shingyan tsawm ai langai hte sha kun dinghku prat hpe ngwi pyaw hkra nlu galaw nga ai.Sadi ndung hkat ai majaw machyi hkrum  ai kun dinghku nre ai sha tinang a myit masa lam hte n kaja ai kanawn mazum lam ni a majaw kun dinghku hta hkra machyi nga ra ai kun dinghku ni mung law law nga nga ai hpe mu lu nga ai.

Anhte madu jan madu wa ni kanawn mazum ai lam hta tsawra shawang myit kaba  lawm ra nga ai.Dai zawn nre ai sha madu jan madu wa dinghku prat mung na sai,kashu kasha mung nga sai,sut masa lam mung hprinem ai,hkum gawng shingyan mung naw tsawm ai,madu jan madu wa mung sadi nrun hkat na re ngu myit la let hkrup mara nga sa ai madu jan madu wa shada nsawn nnawn hkat ai rai yang nmyit mada aten ladaw ni hta tinang a kun dinghku hta nbyin gring ai lam ni byin wa chye nga ai majaw anhte sadi ra nga ga ai.

Dai hta grau nna langai ngai nhprinem wa shagu tinang a ningrum wa hpe sha mara shagun chye ai,ga tsun zai mazut ai,dai hta n ga tinang a ningrum a kanu kawa kanau kana ni a nkaja ai lam hpe galoi mung tsun chye ai,myit tsaw myit dap ai,myit ja ai,masha shawng hta tinang a ningrum hpe jai sha jai lang nmai na daram tsun ai lam ndai ni gaw kun dinghku hpe hkra machyi shangun ai lam ni rai nga ai.

Anhte madu jan madu wa langai hte langai tsawra hkat nna shada ta gindun wa ai ni hta myit dum  masat lam ni law law nga na ga ai.Sumtsaw sumra prat hta myit dum masat lam ni,kun dinghku nnan de ai aten ni hta mung malap nlu myit dum masat lam ni gaw ndum shami nga kau dat ai majaw hkra machyi mat ai lam ni hkrum chye nga  ai.

Dai majaw anhte amyu shayi num ni kaw nna mung kun dinghku prat na wa ai ten ni hta myit pyaw myit dik lam ni hpe nmat wa hkra shi hte tinang hte rau tsawra shawang myit ni n kawp mat hkra shakut ra ai ngu tsun mayu ai.Tinang hte ningrum ningtau a kanawn mazum lam hta ahkyak ai gaw ningrum ningtau hpe hpa lam hta raitim kya simani ai hte tsun shaga chye na gaw ahkyak nga ai.

Myit pyaw myit dik lam  ni kya simani ai hte tsun shaga ai rai yang grau nna myit ngwi myit pyaw lam lu shangun ai zawn myit ru myit yak lam ni hpe hpyi kya simani ai hte tsun shaga ai rai yang yawm wa shangun lu nga ai. Dang rang hkat ai lam gaw tinang a myit tsaw myit dap ai lam hte tsawra shawang myit hpe hkra machyi shangun chye ai majaw tinang hte ningrum a lapran nbung ai lam ni hpe hkap la ai,madat ya ai,bung ai lam hpe hkalum ya ai shakawn ya ai lam ni hpe tsun ya yang kaja nga ai.

Anhte gaw sumtsaw sumra ten,dinghku nnan de ai ten kaw na zawn ningrum a ntsa dang mayu ai,tinang hpe tsawra yang shayawm ya ra ai,tinang hpe ningshawng jaw ra ai ngu ai lam ni gaw ningrum hpe mung tinang hpe mung hkra machyi shangun chye ai tinggyeng myit hte nammak lawhpa ai lam ni hpe tawn kau da ra nga ai.Dai rai nna anhte gaw rap ra ai myit masin hte shawng de hkawm sa na ra ahkyak nga ga ai.

Kaja wa nga yang anhte masha hkum shagu hta gawng kya ningra ai lam ni gaw anhte yawng hta nga nga ga ai re.Anhte gaw tinang a mara hpe nmu ai sha ningrum a mara hpe sha mu chye ai nga jang gaw tinang hkum tinang mung makau grup yin hpe mung simsa lam hpe jahten ai wa,myitru tsampu shangun ai wa byin tai shangun chye nga ai.

Dai majaw shut ai hpe galaw hkrup ai raitim mara dat ya chye hkra galaw shakut ga ngu tsun n gun jaw mayu ai.Bai nna anhte masha hkum shagu gaw tinang a atsam marai ningja hpe masat masa galaw shakawn shagrau hkrum ai ten hta myit pyaw myit dik chye nga ga ai.Tinang a ningrum a atsam marai kaja hpe ningrum ningtau jan kaw nna chye nga ga ai re.

Ningrum ni a kaja ai lam ni hpe shakawn shagrau nna shi a atsam hpe masat masa lam galaw ya ai gaw shanhte hpe myit dik myit pyaw ai lam hpe lu shangun nga ai.

 

 

Add new comment

15 + 4 =