Ningbaw Ningla Hpaji Daw ( 2)

Lai wa sai bat hta no.5 ngu na ningbaw ningla ngu ai gaw, kyang arawn alai mung kaja ra nga ai, bai no .6 ngu na hta, kanawn  mazum kaja ra ai. tsawra ai ramma ni ningbaw ningla tai na matu, masha hte kanawn mazum kaja na grai nan ahkyak ra nga ai. Sumnung sumdi ai ni gaw A lu ma ai, kaning rai nme law, shanhte gaw mungkan ga hpe, madu lu na mara ai ngu ai gaw, kanawn mazum kaja ra ai lam hpe sharin ya nga ai.

Mungkan madang mying gumhkawng ai laika ka sara langai tsun ai kanawn mazum hpaji hta, ga nau hkum shaga u, ga dwi ga sau sha shaga u, tsun shaga lam hta si mani u, hkum ningdang, ninghkap nna hkum shaga, manang a lam nkaja ai lam hkum tsun, hkum shatan, kaja ai hpe sha tsun u, hkum htai lai, hkum dinglun, manang wa tsun ai hpe shakawn u, masha langai hte hkrum yang, shi a mai kaja, shakawn ai lam hpe sha shawng yu u, mara hkum ta, masha hpe tsawra u, nkaja lam masa hku nna nyu ai sha, kaja ai lailen masa hte yu nna, kanawn mazum lam hta kaja htum galaw u, nga nna sharin tawn da hpe mu lu ai, kade chye kade ram tim, kanawn mazum lam hta nkaja yang, ningbaw ningla nmai byim ai

Bai 7 ngu na hta, ja gumhpraw lu ra ai, tsawra ai ramma ni hpa galaw na mung ja gumhpraw ahkyak nga ai, ningbaw ningla galaw na matu mung, jai lang ra ai gumhpraw hpe, tinang nan lu ra nga ai, ya prat matsan ai wa hpe, kadai nkam ai, ja gumhpraw gaw hpa mung lu galaw ai, gumhpraw gaw, ahkang aya  galaw ya lu ai, gumhpraw n gun rawng ai wa galaw ai gaw, hpa mung yawng kaja ai, yawng jaw ai nga ngu ai ga malai ni gaw, ja gumhpraw ra ahkyak ai lam hpe sharin ya nga ai. American gumsan magam ni yawng gaw, gumhpraw sen wa re ai sahte kaba, biliainer ni hkrai rai nga ai, tinang a matu ra nrawng hkra, lu su nga mu nga mai ai ni she, shawa a matu, myu hte mung dan a matu, lu galaw ai masa rai mat wa sai, ningbaw ningla galaw nna, mung masa galaw nna, shat sha na, lu su na ngu ai baw, nmai myit sai, dai gaw, galaw sha ai wa she, tai mat na rai nga ai

Bai 8 ngu na hta, magrau grang share shagan rai ra ai, tsawra ai ramma ni, magrau grang share shagan ai lam nnga yang, ningbaw ningla nbyim lu ai, ningbaw tai ai ni gaw, hpa tim, gwi gwi galaw ra ai, gwi gwi myit ra ai, gwi gwi tsun ra ai, gwi gwi woi awn ra ai, galoi mung shawng de tsap ra ai, mayak mahkak dingbai dingna, mang hkang ni byim wa yang, lit la ra ai, nmai koi yen ai, si hkam na kaw mung, ningbaw wa si hkam ra ai, ba hkam, machyi hkam, jam jau hkam ra ai lam pru wa yang mung, ningbaw wa sha hkam kau ra ai,  la ndu ai myit masi hte, ningbaw nmai tai ai,

9.Ngu na hta marai rawng nna, myit lalu kaba ra ai, marai rawng na, myit kalu na mung, ningbaw ningla langai hta nnga nmai rai nga ai, marai hte myit galu ai lam gaw, matut nga ai, marai nrawng yang, myit n galu ai, ten ladaw hpe ala lu ra ai, ten ladaw hte, hkam sharang myit galu ai lam gaw, gasat gala shang ai wa a matu, ahkyak dik re nga nna, tsun da nga ma ai, ningbaw ni marai nrawng yang, myit kadun yang, yawng hpe woi shut chye ai, dai majaw ningbaw ningla ni gaw,masha hta jan jan marai rawng ra ai, masha hta jan jan myit galu ra ai, Ga Shaka Dingsa Hta Mawshe gaw, hka gayet hpaw ai shaloi kalang mi, tara kanu shi, lungpa kabai grawp kau ai shaloi kalang mi, lahkawng lang myit kadun kau ai majaw, hka nan mung shang na ahkang nlu mat ai hpe, hpaji la hpa rai nga ai.

10 Ngu na hta gaw,Ap nawng machyi hkam ra ai.. Ningbaw ningla ngu ai gaw, ap nang ai lam hta mung, tingkyeng akyu machyi hkam ai lam hta mung, tinang a matu, sum hkam ai lam ni hta mung, gasi tai ra ai, tinang a akyu sum kau nna she, shawa akyu hpe galaw lu ai, Ndai dinghta pinra a labau leng gaw, shawng de nhkring nsa chyai gagat sa mat nga ai, dai ni ndai mung kan a labau leng hta, hkan shachyut nang lu hkra, mung shawa ni hpw woi awn woi sa lu hkra woi awn ai ningbaw ningla kaja ni ra ahkyak nga sai re, dai majaw tsawra ai ramma ni anhte wp myu sha ni hta mung, mung shawa e ra sharawng ai, kam hpa ai, madi shadaw ai, myu sha ningbaw ningla ni paw pru ra saga ai, dai ni galu kaba wa nga ai tsawra ai ramma ni yawng, hpawt ni ngu ai nhtoi hta, myu sha ni yawng hpe, lam woi matsun madun ya lu ai ningbaw ningla kaja ni byim tai lu hkra, shakut sa wa ga ngu , matut n gunjaw gam garan dat let,

Ka Shalat

Sara Joseph Maru La Nan