Ningbaw Ningla Hpaji Daw ( 1 )

Ningbaw ningla ngu ai gaw, kaning re hpe ngu ai kun? yu maya ningbaw, masha lachyawk mi a ningbaw, nhkru nkaja gasu gamawng ai ni a ningbaw, lagut damya ningbaw ni hpe, ningbaw ningla n-ngu ai, ningbaw ningla ngu ai gaw makam langai, masa lam langai, ban dung langai hte, gin lung shakut galaw sa ai wuhpung wuhpang hpe, woi awn woi sa ai masha hpe ngu ai rai nga ai.

Mungkan labau hta lak lai awng dang ai ningbaw ningla ni a prat labau hpe hka ja yu yang, dai ningbaw ningla ni gaw, lawu na atsam marai ni hte hpring tsup ai hpe mu mada lu nga ai. dai ni gaw

1.Hkum hkrang hkam kaja lam nga ai, tsawra ai ramma ni, hkum hkrang hkam kaja lam ngu ai gaw, nau n ahkyak na re ngu shadu tim, kaja wa nga yang, ningbaw ningla langai mi a matu, ahkyak dik rai nga ai. nhkam kaja yang, rawt jat mayu ai ten nlu rawt jat, sa mayu ai de nlu sa ai ahkaw ahkang gin lut chye nga ai. hkam kaja yang she baw nu zet let nna, myit rawt na, hpa galaw tim, gasang galan, gahpring gahpran galaw lu na rai nga ai. Miwa democracy gumsan mungdan woi gawde ai wa Dr sun yat sin gaw, hkam nkaja nna, shi a magam nngut shi yang, asak 59 ning hta nnga mat wa sai, dai majaw dai ni du hkra shi a sum mi chyu yi lam masa garai n awng dang ai hpe mu lu ai, dai majaw ningbaw ningla langai ngwi pyaw hkam kaja hte shakut sa lu na matu, lu sha lam shagu hta mung, sadi sahka let sha shakut sa ra nga ai.

2.Machye Machyang Hpaji Rawng Ra Ai...Machye machyang hpaji ngu ai gaw,shyinggyim masha langai a npawt nhpang langai mi rai nga ai. dai ni na mungkan e ndai daram rawt galu kaba wa ai gaw, hpaji machye machyang grau ai wa, masha hta grau tsaw mat wa nna, machye machyang hpang hkrat ai wa gaw, masha hta hpang hkrat na sha rai nga ai. ningbaw ningla langai mi gaw, lam magup hku nna, yawng hta, grau chye chyang ra nga ai, tinang hkum nan hpaji hta hkum tsup ra nga ai. dai ni hpung tang jak hpaji prat hta, laika hpaji machye machyang loili chye ai hte sha, masha hpe nlu woi awn mat sai, npawt nhpang hpaji, dakkasu hpaji hte, magup sumhpa hpaji ni hpe chye chyang ra nga ai, grau nna, myu hte mungdan hpe woi awn na ningbaw ningla ni gaw, mung masa hpaji chye chyang ra nga ai, dai majaw jawng atsawm nlu lung ai ni gaw, dai hpaji ni hpe hka ja la ra nga ai, laika grau hti ra nga ai, tut e sawn sumru nga ra ai, nhtu ayan garang ai zawn, bawnu hpe mung ayan shalet ya ra ai, miwa ni a ga malai hta, masha gaw, si ai shani du hkra, shat sha ra ai zawn, si ai shani du hkra, hpaji sharin la ra nga ai, nga nna shadum jahprang tawn da nga ai.

3.Makam rawng ra ai..ningbaw ningla langai mi gaw, teng man ai makam, ngang kang ai makam. kaja wa tatut galaw lu ai makam nga ra ai, tinang hkam la ai makam gaw, jaw nga ai kun? shut nga ai kun?, kaja wa teng man ai makam re ai kun? nten g nmam ai makam rai nga ai kun? tinang a machye machyang bawnu hte dinglik yu chye ra ai. grau nna, myu hte mungdan hpe woi awn woi sa nga ai ningbaw ningla gaw, teng man ai mung masa makam hte jasat jasa langai mi hta ngang ngang kang kang tsap nna, woi awn sa ra nga ai. awng dang hkra ladat amyu myu shaw nna, woi awn galaw sa ra ai. Mungkan labau hta shut ai makam,sawt ai masa lam ni hpe woi galaw ai majaw, hti ndang ai shyinggyim masha ni a asak hte, ja sut gan law law, sum hten mat sai hpe mu chye lu nga ai, dai majaw, ningbaw ningla langai mi a matu, mai kaja ai makam, mai kaja ai masa lam hte woi awn shakut hkawm sa na ahkyak la nga ai, bai

4.Myit Masin Wenyi N- gun Nga Ra Ai..Myit masin wenyi n gun gaw, masha a nsoi nsa nan rai nga ai, myit masin wenyi madang hta hkan nna,masha a madang shai mat wa nga ai. myit teng man ai myit kaja ai, myit dinghpring ai, myit su ai, myit kup ai myit galu kaba  madang tsaw ai, myit makam rawng ai, myit madang tsaw ai, myit jasat ngang gring ai, tsawra matsan dum chye ai, shawa a matu, myit tau chye ai hte, myit masin wenyi n gun nga ma ai, tsawra ai ramma ni, ningbaw ningla kaja tai na matu, masha hta jan jan re ai, myit masa n gun ni rawng ra ai. wenyi n gun gaw shi hkrai nbyim wa ai, myit n gun rawng na matu, nkaja lam ma hkra hpe, kalang ta kabai kau nna, kaja lam de shanang sa wa ra ai, makam a kri dung ra ai, myu tsaw mung tsaw myit ngang kang ra ai, myit n gun marai tup hte, shaman shakyang sa ra ai

5.Kyang Arawn Alai Kaja Ra Ai...Kyang arawn alai nkaja ai masha langai mi, ningbaw ningla nmai byim ai. ningbaw ningla langai mi gaw, masha hta lak lak lai lai, kyang arawn alai kaja ra ai. kyang arawn alai kaja na matu, kaji kajaw kaw na hkawt ma hkra hta, kaja hkra shakut ra ai. nkaja ai kyang lailen gaw, tsing du zawn ru jung chye ai nga english ga malai hte maren, kaji kajaw re ai akyang kaw na, myit kata e jung noi nga nhtawm yet yet  law htam prut kaba wa chye nga ai, dai majaw nkaja lam ma hkra hpe tsep kawp koi gam nna, tsun shaga myit mang galaw hkawm sa ra ai. yawng mayawng kaw na, ndai wa gaw , masha kaja re ngu mu mada yang chyu sha,ningbaw ningla mai byim ai ngu garan gachyan let ngam nga ai daw hpe du na bat hta bai hkap madat la lu na ga ai

Joseph Maru La Nan