Ningbaw Hkrat Sum Arawn Alai Daw ( I )

 

Ningbaw ngu ai gaw, tinang gun hpai ra ai ningbaw lam atsam marai ni, shakyang ai lam ni hpe, chyoi chye da ai hte sha nhkum tsup shi ai. Dai lam hta grau ahkyak ai gaw, ningbaw ningla ahkang aya hkrat sum lam arawn alai ni hpe mung chye da na ahkyak nga ai.

Dai ni mungkan ntsa hta dan dawng gumhkawng ai, masha law law ra nga ai ningbaw ni hta, dai atsam marai lawm ai lami laman ni hpe, kaji kaba mu na rai nga ai. Maga mi de gaw ningbaw ningla ahkang aya hkrat sum lam akyang lailen ni hpe koi gam na ahkyak nga ai, ningbaw kaja ni hta nga gring nga ang ai atsam maria ni, 100% hpring nga yang sha, ningbaw ningla kaja ngu na mai tsun nga ai. dai rai nna,ndai ningbaw ningla hkrat sum lam arawn alai ni gaw, grai ahkyak ai rai nna, dai lam langai hkrai akyu pru lam hte nbyim pru na matu, gara hku gun hpai ra na hpe, mungkan ntsa na dan dawng gumhkawng nga ai ningbaw ningla ni law law tam mahkang sawk sagawn da ai hta,

1.Tinang a bungli ntsa nchye na ai lam, laga masha wa a ntsa ningbaw galaw ai wa gaw, lawu tsang na ma ni hta, lam shagu kaw, grau kung kyang nga yang she, ningbaw byim lu na rai nga ai. grau nna, tinang a bungli hte seng nna, atsawm sha chye na kung kyang na ra ga ai, lama na ningbaw galaw ai wa gaw, tinang woi awn nga ai bungli hte seng nna, kung kyang ai lam nnga na, tinang a bungli hpe nchye na ai hpe mung nhkap la, shakut ai lam mung nnga na, tsun jahpai nga yang mung. dai ningbaw gaw, lawu tsang na ma ni a shagrau sha a, hkungga manu shadan ai lam hpe nlu la sana rai nga ai, ningbaw ningla ni a bungli hte seng nna, atsam marai ra rawng gawng kya ai lam hpe, chye tawn da ai lawu tsang na ma ni gaw, ningbaw wa a ntsa hta, yu kaba lam nnga sai, hkungga ai lam mung nnga sai, ningbaw wa a woi awn ai hpang de mung nkam hkang nang mat sai tinang a atsam marai nnga ai ningbaw hpe tawt lai nna bungli gun hpai ai lam, lahta na ni dan tawk matut mahkai gun hpai ai lam, laga ningbaw ni hpe kam wa ai zawn re ai wuhpung wuhpawng kata hta, nra sharawng ai lam ni amyu myu hpe mung mu lu wa na re,

Ningbaw shagu gaw, tinang a bungli hpe 100% tup, kung kyang hkum tsup ai hte chyoi chye da na ahkyak nga ai, raitim ndai ra rawng ai lam ni gaw, tsi la loi dik ai lam rai nga ai. Tinang a bungli hta tinang nchye yang, lawu tsang na ma ni a, hting hkang ai lam hpe hkrum chye nga ai, bungli hta ahtu hkra machyi let, ningbaw ai lam mung hkrat sum chye nna, dai lam hpe tsi la na matu, lawu na lam ni hpe, shaman shakyang ra ai, tinang gaw tinang hpe hkum tsup hkra chyoi chye na lam nga nnga hpe galoi mung jep joi ra nga ai, bungli lam langai  hpe nchye na ai lam mu yang, dai bungli hpe chye na hkra hka ja nna, tut e shakut gun hpai ra ai. tinang nchye yang nchye ai lam seng ang ai ni hpe hkrum ai ten asan sha hkam la ra ai, majoi tsun jahpai nmai galaw ai.Ahkyak dik ai gaw, tinang hkum hpe tinang nmasu nmagaw na rai nna, sawn dinglik ai lam galoi mung galaw nga ra ai.

2. Tinang a bungli hta myit nlawm ai lam re, tsawra ai ramma ni ningbaw ngu ai gaw, lawu tsang na ma ni a ngun hpe tinang jum hkang nna, tinang yaw shada ai ban dung de, rawt jat sa wa nga ra ai.dai rai nna bungli awng dang na matu, ahkyak ai gaw, ningbaw wa nan tinang a wuhpung wuhpawng na bungli a ntsa kaja nan myit lawm lit la gun hpai ra na rai nga ai, dai gaw shingra tara lam langai mung rai nga ai. bungli langai ngai awng dang na matu, gun hpai ai hta, dai bungli a ntsa, myit lawm ai lam nnga yang, galoi raitim awng dang na nrai nga ai. lama na wuhpung wuhpawng langai a ningbaw ningla wa gaw, tinang a bungli a ntsa myit nlawm ai ngu ga, ningbaw wa a shamu shamawt gun hpai lam yawng hpe ten tup yu maram nga ai lawu tsang na ma ni mung dai ningbaw wa hte rau, bungli hta gawng kya wa na rai nga ai. lawa tsang na ma ni a bungli hta myit shang sha lam yawm wa let, bungli awng dang ai lam hta, mayak mahkak ni hkrum wa chye nga ai

Ningbaw langai  hku nna, bungli hta myit shang sha ai lam nnga yang, dai bungli hta ahtu hkra lam byim pru shangun nna, ningbaw ni gaw dai ana hpe,tinang hkum de nan shang wa sai nga ai hte, kalang ta tsi la kau ra na ahkyak nga ai. Bungli hta myit nlawm wa ai ana gaw, krap bra chye ai ana rai nna, dai ana hpe tsep kawp nmai hkap la ai, dai rai nna, ningbaw kaja ngu ai gaw, tinang hte rau, wuhpung wuhpwang yawng ting hpe, ahtu hkra sum machyi shangun nna, magam bungli hta myit nlawm ai ana hpe lawu na hte maren, tsi ra ai.

Tinang a bungli a ntsa, myit shang sha lam yawm nyawm hpe ten tup jep joi yu ra ai

Bungli ntsa myit shang sha lam hpe madung tam ra ai.

Bungli hta n gun lagaw nbung nna myit lawm lam yawm wa ai raiyang jahkring hkring sa la nna, n gun nnan bai ban ra ai

Magam bungli hta lai nna, laga lawm lam a ntsa grau myit maju jung, myit lawm wa ai a majaw, bungli hta myit lawm lam ningra yang, laga myit shang sha ai lam ni hpe, gau ngwi ngwi shayawm nna, tsep kawp shamat kau ra ai.

Tinang a lit a ntsa ten tup sadi dung nga nna, dai lit hpe kang ka hkra gun hpai na matu, tinang a bungli hta myti lawm yang sha, byim na re ngu ai hpe tinang hkum hpe tinang sadi jaw ra ai.

Tinang a bungli a ntsa myit maju jung lam ningra wa nna, gara  hku nna, myit shang sha lam nmu sai ngu daw dan yang, kaja dik ladat gaw, tinang hkrai ningbaw ningla kaw na nhkrat shi yang dai bungli ningbaw kaw nna, pru mat na lam sha rai nga ai dai zawn gun hpai ai lam hta, tatut masa hpe asum jaw ai lam koi gam ai lam rai nna, hpang na bungli ningbaw ni gaw, tatut bungli hta grau kaja yang sha, dai zawn galaw lu na rai nga ai ngu ngam nga ai daw hpe du na lamang hta bai madat hka ja la yu ga.

 

Ka Lajang Ai

Sara Joseph Maru La Nan

Add new comment

3 + 17 =