Ning Baw Ni A Atsam ( Youth Program )

Ningbaw ngu ai gaw,tinang wuhpung wuhpawng a, yaw shada ai pan dung shadaw hpe, awng dang hkra, jum hkang lu na matu, wuhpung wuhpang masha hpe, kahkyin hpaw shabawn nna, lam woi ning shawng lam, madun matsun nna, woi awn nga ai ngu nna, tsun ra nga ai.Dai rai yang she,ning baw langai a hpring tsup ai atsam marai hte, hpring ai ningbaw langai a hpring tsup ai atsam rai nga ai.

Atsam marai hte hpring ai ningbaw ningla wa gaw, galaw ra ai magam bungli lam shagu hta mung, kang ka ai hte galaw sa wa na teng sha re. tinang a wuhpung kaji kata hta, ningbaw lit hpe gun hpai nga nna,ningbaw langai byin nga ninglen, tinang hkum nan, tinang ningbaw rai nga ai hpe, nchye ai ni gaw, atsam marai hte, hpring ai ningbaw ningla kaja nmai tsun na re. Ningbaw  galaw ai wa gaw, wuhpung wuhpawng hte seng ang ai amgam bungli hte seng ai machye machyang hpaji, tinang woi awn  ningbaw ai lam a npu na,  lawu tsang ma ni a bungli hte seng ai machye hpaji ni hpe tsawm sha chye na  da ra nga ai. Bungli hte seng ai machye machyang hpaji ni hpe, dai zawn hkut nai chye na da yang, ningbaw galaw ai wa a matu, tinang hkum hpe kam hpa myit rawng wa na rai nga ai. Dai hta ahkyak ai gaw, lawu tsang ma ni mung, tinang hpe kam hpa hkungga. Lam ni grau law htam wa na rai nga ai. Lama wa bungli langai hta, ningbaw shara kaw du nga nna, ningbaw lit la nga ai wa langai gaw, tinang a bungli hte seng ai machye hpa ji ni htam kung kyang ai lam nnga yang, tinang hkum nang bungli hte seng ang wa yang, tinang hkum tinang kam hpa myit nnga mat sai. Tinang hkum tinang nkam yang, lawu tsang ma ni gaw, tinang hpe kam hpa myit nnga sai. Tinang hkum tinang nkam yang, lawu tsang ma ni gaw, tinang hpe kam hpa manoi manat hkungga na nrai nga  ai, dia hta n-ga, bungli lam langai hpe, ningbaw ai lam galaw ai hta, ningbaw galaw ai wa hkum nan, tinang bungli a lam hpe, chye na da lam nnga yang, dai bungli awng dang na matu, grai yak na re. dai majaw ningbaw galaw ai wa gaw, tinang woi awn ningbaw na bungli wuhpung wuhpawng hte seng ai machye hpaji hpe atsawm sha chye na da na matu grai ra ahkyak nga ai, dai hta n-ga na, matut mahkai gun hpai ra ai, kaga wuhpung wuhpawng a lam hpe mung, ten shagu hta, hkaja na matu ra nga ai, hkyawnm nna tsun ga nga yang gaw, lawu tsang ma ni a ntsa, ningbaw galaw ai wa gaw, lam shagu kaw, lawu tsang ma ni hta, hpaji hpa rat grau hpring tsup na ra nga ai. Dai zawn machye machyang hpaji hkum tsup na matu, ningbaw ni gaw, lawu na masun nkau ni hte maren, shakut gun hpai ra nga ai.1. Tinang a bungli hte seng ai rit kawp tara upadi ni, matsun ni, galaw ra ai laisa ladat re ai ni hpe, ten shagu hka ja na ra nga ai. 2. Tinang a bungli hte, dan tawk ai hku mung, gawoi ai hku mung, seng ang ai laili laika ni hpe tam sawk hti, hka ja let ra ang ai lamyi laman ni hpe ka shaw matsing mahkawng da ra ai. 3. Myen mung shiga, mungkan shiga ni, na chye la na matu, Radio shiga ni hpe, madat nna mung, shani shagu na shiga, bat shagu na laika amyu my, shata shagu na Magazine laika ni hpe, ten tup hti nga nna, lak lai shai nga ai masa amyu my hpe myi yu ndawm hkaja nga ra ai. 4. Tinang a bungli hte seng ai hpaji hparat hpring tsup ai ni hte ten tup mu hkrup nga nna, shanhte kaw nna mai kaja ai katsi ningli ni hpe yu la ra ai. 5. Tinang lu la ngut sai mahkrum  madup, hparat ni, masa lam htuk ai hku hpring tup law htam na matu, tinang rau shada mung, sawk sagawn, masha ni the mung bawng ban jahkrup ai lam ni galaw sa wa ra ai. Tsaw ra ai Ramma ni, lahta de tang madun sai hte maren, ndai lam ni hpe, tatut hkan sa, hka ja, jai lang ai rai yang gaw, nang ngai anhte yawng mung, atsam marai hpring ai ningbaw ningla kaja tai wa lu na re ngu yawng hpe  laika ka sara Zao Bug Than ka da hpe gam garan ya dat lu nngai law.