Ngwi Pyaw Simsa Ai Dinghku ( December 18, 2021 )

dum nta masha ni a masat sumla

Anhte Myanmar Mungdan masa hku yu dat yang asak 35 – 45 ning lapran na kun dinghku kanu kawa ni gaw dinghku de ai ten 10 ning lapran re ai ni law ai hpe mu mada lu ai. Dai majaw dai asak aprat ten na kanu kawa ni law malawng gaw tinang a kun dinghku rawt jat galu kaba lam hte kashu kasha ni a galu kaba lam,hpaji hparat lam ni hpe madung dat galaw shakut ai ten rai nga ai.

Dai hte maren tinang a kun dinghku ngwi pyaw simsa lam lu na matu, mayu dama lahkawng maga na kanu kawa,makyin jinghku ni hpe hkungga la ra ai,shada garum shingtau hkat nga ma ai.

Kun dinghku de ai ngu ai gaw kade tsawra hkat nna mi rau nga ai raitim myit masa nbung, kyang lailen nbung ai chyasam masha lahkawng pawng da ai rai nga ai majaw madu wa,madu jan shada da myit tau ya hkat chye na gaw ahkyak la nga ai.

Dinghku num ding la rai sai kaw nna gaw hpung magam gun mi rai rai,ja gumhpraw tam let hpaga ga ai mi rai rai, madu wa hte madu jan ngu nna kalang mi dinghku shang sai hpang e gaw langai hte langai madu wa mung madu jan a ntsa e,madu jan mung madu wa a ntsa e chye myit chye mang ya na,kaji kajaw re ai mara kaw na hkawt langai hte langai hkyamsa jaw nna chye na hkat yang gaw grai ngwi pyaw ai dinghku byin tai na re. Kaji kajaw re ai mang hkang hpe shada nchye na hkat ai majaw tinang a makau grupyin hta dinghku hka bra ai ni law law nga ai.Dinghku hka bra wa jang grau nna kashu kasha ni hpe matsan shayan rai,jam jau jam hkau jaw ai lam ni hpe mu mada ai,dai zawn nbyin na matu gaw dinghku kanu yan kawa shada chye na hkat na grai ahkyak ai ngu mu mada ai.

Bai nna ngwi pyaw ai hkristan dinghku byin tai lu na matu gaw langai hte langai tsawra myit hpe manu shadan nna kanawn mazum ra ai. Shada tsawra myit ngu ai n nga yang mara grai mu hkat chye nga ai. Langai a mara hpe langai mara dat ya chye ai myit nrawng ai rai yang dai dinghku gaw galoi mung ga li ga law nga nna sha dinghku ngwi pyaw na nrai nga ai.

 

Lamang tang madun ai - Julia Ja Ing

Add new comment

11 + 6 =