Ngwi Pyaw Simsa Ai Dinghku

dinghku ngwi pyaw simsa lam

Tsawra ai nu wa hpu nau ni  dai ni anhte kaw nna ya she dinghku shang ai ni rai rai,gumhpraw jubili,ja jubili du hkra dinghku de ai na sai ni mi rai rai anhte gaw tsawra myit sindun sumri ngang kang nna tsawra shawang myit kaba hte hpring zup nna sadi dung ai kun dinghku hpe sha ra sharawng na gaw teng sha rai nga ai.Ndai zawn re kun dinghku hpe madu lu na,byin wa lu na matu, gara masa lam ni hpe galaw la ra ai ngu ai lam ni hpe tsun garan gachyan dan na nngai.  

Kun dinghku langai ngang kang mayu  ai rai yang aten na na rau nga ra ai lam hpe anhte yawng chye na sha re.Dai majaw dinghku prat de du mat jang shana shat hpe seng hkat rau jawm sha ai,Sumla hkrung rau jawm yu ai lam hpe galaw ya ra ai.Kun dinghku hta ndai zawn re ai lai len ni nga ai gaw kaja ai akyu lam ni hpe hkam la shangun nga ai re.Masha kaga nlawm ai sha lahkawng sha rai rau hkrum zup jahta ai lam gaw kun dinghku sin dun sumri hpe grau ngang kang ai hku gawgap lu nga ai re.Kun dinghku madu jan madu wa rai mat sai majaw lak lak lai lai lam ni nra sai ngu ai shut ai ningmu n galaw ai sha shani shagu ngu na daram ningrum wa hte aten jahkring mi jahtum chye ra ai.Ndai zawn hkrum ai shaloi kaja ai lam hpe sha tsun shaga nna ningrum wa nta du  wa ai shaloi galaw taw nga ai bungli ni hpe tawn da nna sa shakram ra ai.Ndai gaw dinghku hta hkam sha ai lam hpe grau ngang kang wa shangun nna tinang a ningrum hpe grai ahkyak ai masha langai zawn kanawn mazum ai lam mung dinghku ngwi pyaw na matu ahkyak kaba nan ra nga ai.

Dinghku hpe ngang hkang ngwi pyaw shangun mayu ai rai yang Dinghku hta nnga gring ai lai kyang hte  koi kau nna kaja ai lai kyang ni hpe shaman rem la ra ai.Ndai lai kyang ni hpe rem la na matu gaw grai yak na re raitim ngwi pyaw ai dinghku byin tai mayu yang gaw shaman la ra ai.Kabai kau ra ai lai kyang ni gaw mara tam ai,shatan shabya ai,aput apai nga ai,aput angwi nga ngoi ai,jahkrit shama galaw ai,mara jaw dam jaw ai hte akyang hten ai lam ni rai nga ai.Bai galai bang ra ai lai kyang ni gaw  n gun jaw ai,shasam shadut ai,madat ya ai,hkap la chye ai,kam ya ai,hkungga ai hte nbung ai lam hpe bawngban chye ai lam ni rai nga ai.

Bai nna ahkyak lam langai gaw tinang a Ningrum hpe hkungga ai lam rai nga ai.Kun dinghku hte seng ai kung hpan ai ni hpaji jaw da ai lam hta tsaw dik kaw nga ai gaw hkungga ai lam rai nga ai. Tinang kaw nna masha langai hpe tsawra myit nlawm ai sha hkungga lu ai raitim hkungga ai lam nnga ai sha tsawra lu na nrai nga ai.Dai majaw tinang a Ningrum hpe Kashu Kasha Jinghku Jingyu makau grup yin ni a shawng hta asung nshang nkaja ai hku nmai tsun ai re.Dinghku hta manghkang nga yang shinggan de nla shale ai sha lahkawng rai atsawm jahkrum bawngban la chye ra ai.

Dai majaw Kun dinghku langai hta Manghkang nbyin na matu gaw myit mada hpyi shawn ai lam ni hpe shayawm nna shai hkat kaba ai lam hpe shayawm la ra ai zawn sha madu wa ni hku nna mung madu jan ra ai lam rai nga ai dinghku hpe ningshawng tawn nna grau nna madat ya ai zawn re ai lam ni hpe lit nga nga  hte grau nna galaw ya na matu ahkyak nga ai re.

Add new comment

1 + 10 =