Ngwi pyaw ai hkristan dinghku byin na matu ahkyak ai lam

Anhte shinggyim masha langai gaw kade daram mi matsan jaren re hkrum ai nga tim dum nta masha nga ai rai yang dai gaw sut su ai lam mung rai nga ai.Hpa majaw nga yang dum nta masha ngu ai gaw anhte shinggyim prat a matu kaba dik ai kumhpa langai re majaw rai nga ai.

Nobel kumhpa madu rai nga ai Desmon Tutu tsun ai hta na a dum nta masha ni gaw nang hpe lata lai wa ai nre,shanhte gaw na matu kumhpa rai nga ai nga tsun shadum da nga ai.

Anhte hpe hpan da ai Madu Karai Kasang gaw kun dinghku dum nta hpe hkrang ka tawn da ai rai nga ai.Dai majaw dum nta masha gaw Karai Kasang jaw da ai kumhpa rai nga ai majaw  kun dinghku dum nta masha ni hpe nju yang Karai Kasang hpe nju ai hte bung nga ai re.

Wa Sarabyin Francis gaw lai wa sai 2013 ning na mungkan ramma nhtoi hta shinggyim masha matut sak hkrung nga na matu gaw kun dinghku dum nta gaw ahkyak nga ai.Nang ra ai mi rai rai,nra ai mi rai rai dum nta masha gaw mungkan a ningpawt ninghpang ru pawt nan rai nga ai nga tsun shadum lai wa sai.

Anhte shinggyim masha ningpawt ninghpang ru pawt nkaja jang gaw shinggyim masha hpawng kaba mung daw hten mat wa na sha rai nga ai.Ngwi pyaw ai dinghku dum nta ni jawm pawng let pyaw hpa shinggyim mare kaba byin tai wa ai rai nga ai.

Kun dinghku dum nta masha ni rau sha shat jawm sha ai ni gaw shat rau jawm nsha ai ni hta grau nna dum nta masha shada da  hku hkau ni htep ai lam hpe mu lu nga ai.Hpaji ninghkring ni ramma 2000 jan hpe sawk sagawn jep yu ai hta dum nta masha ni hte arau sha shat jawm sha ai ramma ni hta nanghpam malu masha jai lang ai lam yawm ai hpe mu lu ai nga tsun da ma ai.

Shat jawm sha ai ten hta shada tsawra shawang myit madun let ahkyak shatai hkat garan gachyan hkat na a ten rai nga ai.Mara shagun ai lam,sharin shaga ai lam ni hpe galaw ai aten nrai nga ai.Magam bungli hte jawng lung nga ai ten ni a majaw rau jawm sha na yak hkak ai rai yang bungli hte jawng pat ai ten hta rau jawm sha na matu masat da mai nga ai.

Kun dinghku dum nta masha ni yawng rau sha pyaw poi sha hkawm ai hkrun lam hkawm ai lam ni hpe galaw gring nga ai.Ma ni a matu aten nlu jaw ai kanu kawa ni hta kanu kawa hpe aten ahkying nlu jaw ai kashu kasha ni sha lu chye nna garen gari rai prat jan shang mat chye nga ai.

Dum nta masha ni yawng arau sha akyu hpyi ai rai yang, rau sha nga lu ai nga  ma ai.Karai Kasang hpe hkring hkungga nawku let tara lam ni hkan let hkawm sa ai dum nta gaw myit pyaw sut chying ring na sha rai nga ai.Anhte kun dinghku dum nta ngu ai gaw makam masham hpe garan shapoi ya ai laksan shara rai nga ai majaw manu dan dik nga ai.

Dum nta masha ni hte rau sha nawku jawng sa akyu hpyi ai lam gaw reng dik htum sak se hkam ai lam rai nga ai.Tsawra myit salum nnga ai mungkan hta kun dinghku dum nta gaw sumsing langai rai nga ai.Kun dinghku dum nta ngu ai gaw mungkan ga na sumsing shingna rai nga ai.

Wa Sarabyin Francis gaw dinghku kata chyeju kaba sai ngu ai gaw hte tawngban ai yaw ngu ai ga ni hpe tsun ya na matu shadut da nga ai.Mazut mazati marawn ai a malai simani sumnung shingdi ai ga ni gaw salum kya wa na matu grau nna loi nga ai.Bai nna kashu kasha ni a mahkrum madup hpe garan gachyan ai lam hpe kanu kawa ni mung madat ya ra ai re.

Kawa hpe tsun mayu ai hpe kanu hpe tsun shangun ai zawn re lam gaw dinghku kata hku hkau lam hta n gun yawm ai lam rai nga ai.Mani ai nsen ni gaw kun dinghku dum nta a mayak lit ni hpe tsang ya lu nga ai re.

Kang lai jang di chye nna,kya loi jang mung nya wa chye ai ngu ai ga malai zawn dum nta hta mung gyep gyeng lai jang mung sin dun sumri di mat chye nna shayawm ya dat da,myit ra hkrai hkan ya yang mung  hten za chye nga ai re.

Anhte gara kun dinghku mung hpring zup ai gaw nnga nga ai re.Myit masa lam nbung ai,gali galaw hkat ai lam ni byin chye nga ai.Raitim dum nta masha gaw kun dinghku dum nta masha sha rai nga ai.N shaga nna nga lu ai raitim ndaw n ang nmai nga ai.

Tsawra shawang sin dun sumri gaw hpang jahtum ten du hkra nga nga na sha rai nga ai.Anhte kashu kasha ni a shawng hta kanu yan kawa ga law ninggyet hkat ai lam hpe gaw sadi ra nga ai.Anhte ma ngu ai ni gaw pat jamna hte bung nga ai re.Shanhte gaw anhte a myit masa hpe shanhte a prat hta bai madun chye nga ai.

Mungkan hta nkaja ai lam nnga hkra kaja ai masha nnga ai zawn kaja ai lam nnga hkra nkaja ai masha mung nnga nga ai.Japan ni a ga malai zawn sumtsawra sumra ten hta myi kyaw ai wa gaw dinghku de ai hpang bai mu wa ai nga zawn byin chye nga ai.

Anhte madu jan madu wa lahkawng a ga shaka hpe ningshawng jaw daw dan ra ai.Anhte nkau dinghku hta gaw kashu kasha ni hpe ningshawng tawn da nga ga ai.Dai shaloi gaw ma ni gaw tsawra na matu malai ni tai wa chye nga ai re.Ma ni a matu n tara na rai nga ai.

Lani mi hta dum nta kaw nna pru let dinghku nnan bai gaw gap na ni kaw grai myit mada hkrup jang gaw lahkawng maga na matu nhkrak wa na rai nga ai.Ma ni a matu kanu yan kawa galaw ya lu na ahkyak dik gaw madu jan madu wa shada da tsawra lanu lahku nga na rai nga ai.

Bai nna jinghku manaw manang ni hta dum nta masha hpe ningshawng jaw na mung ra nga ai.Hpa majaw nga yang jinghku manaw manang ngu ai ni gaw sa nna bai wa mat ai ni rai nga ai.

Kun dinghku dum nta masha ni hta kanawn masum manang ni hpe ningshawng jaw ai kawa ni hta kanu kawa hta manaw manang ni hpe ningshawngjaw ai kashu kasha ni hpe  mu lu chye nga ai.Dum nta masha ni hpe ningshawng jaw ai wa gaw dum nta masha ni a lakawn lanawn ai hkrum lu na rai nga ai.

Dai re majaw kanawn manaw manang ni hta dum nta masha ni hpe ningshawng jaw ga law.Anhte kun dinghku gawgap ai gaw loi ai lam gaw nrai nga ai.Mayak mahkak lam law law hpe hkrum sha ra nga ai.

Lu na sha na,bu na hpun na,hpaji lam,hkamja lam ni a matu da kan let kun dinghku a matu prat hpe ap nawng ra ai gaw nloi la nga ai re.Dai majaw kun dinghku lit gaw li la yak la nga ai re.Dai lit hta grau li ai gaw tsawra myit nnga ai gaw grau nna li la nga ai.Dai majaw anhte kun dinghku ngwi pyaw hkra dum nta masha shada da,madu jan madu wa shada tsawra shawang myit hta kri dung sumri tawn da let hkawm sa nga ga law.

By: munghkrang