Nanghpam Lu Sha Hte Kun Dinghku

             Tsawra hkungga kun dinghku kanu kawa ni e anhte kasha ni prat ram kaba wa ten shi a manaw manang ni hte kanawn mazum ai lam hta anhte atsawm sha yu maram ra ai.Shanhte a manaw manang ni a kyang lailen ni gaw tinang a kasha a ntsa ka up lu ai kun?ngu ai lam hpe mung maram yu ra nga ga ai.Bai nna anhte kanu kawa ni hkum nan mung Nanghpam malu masha hpe koi gam ra ai zawn kashu kasha ni hpe mung Nanghpam malu masha koi gam ra ai lam,Nanghpam malu masha a nhkru nkaja ai lam ni,tinang a prat sha n ga kun dinghku,shinggyim wuhpawng hte kaga hkret sum lam ai lam ni hpe atsawm sha tsun sharin shaga ra nga ga ai.Dai majaw tsawra ai kun dinghku kanu kawa ni e ndai Nanghpawm tsa chyaru ni hpe anhte akashu kasha ni a prat de ndu shang lu hkra gaw anhte kanu kawa ni hkum nan koi gam let kashu kasha ni hpe sharin shaga la ahkyak nga mali ai re.Bai nna tsawra kanu kawa ni e anhte a kashu kasha ma ni gaw anhte hpe hpa lam mi tsun dan wa tim manang langai zawn madat ya na mung ahkyak nga ai.Kawa re majaw kanu re majaw n tsun gwi ai lam ni nnga hkra madat ya galaw ya ra nga ga ai.Anhte kanu kawa nkau gaw mara jaw mara tam ai lam ni galaw chye ai majaw kashu kasha ni ga kanu kawa hpe yawng n gwi tsun ai hpe mu lu nga ai.

        Dai zawn rai kanu kawa hpe ntsun mat ai shaloi anhte kanu kawa  ni kaw nna kashu kasha ni a masa lam hpe chye ya na matu yak wa chye nga ai.Ndai zawn re ai ten anhte a kashu kasha ni a myit pru myit le lam ni hpe gara hku nna jai lang nga ai hpe anhte kanu kawa ni nlu chye mat sai rai nga ai.Dai ni na prat hta Ma ni hte ramma ni a myit le myit pru lam ni masa lam amyu myu nga chye nga ai.Kaja wa nan kaja ai hte nkaja ai lam ni law law hkum hkra nga nga ai.Shinggan de pru hkawm muk sha ai,hkrun lam hkawm ai,manaw manang ni hte game ginsup ai,mahkawn marawn hkawn ai lam ni galaw chye ai zawn tsa chyaru lu sha ai,Nanghpam malu masha jai lang ai hpe myit le myit pru lam hku nna jai lang chye nga ai.Dai majaw anhte kanu kawa ni anhte a kashu kasha ni a myit hkam sha lam ni hpe gara hku nna hparan lang nga ai ngu ai hpe chye da ra na ga ai.Grau nna gaw kashu ni myit tsam pu tsam ba ai taw nga ai ten langai ngai hpe hpaw tsun dan shangun ai lam mung myit hpe atsang nga koi mat shangun chye nga ai zawn shanhte sa hkawm mayu ai shara de sa let rau sha hkawm sa chyai let shanhte a myit tsam pu tsam ba ten ni hta nkaja ai lam ni nhkawm sa mat uga anhte kanu kawa ni ahkyak la galaw sa na grai ahkyak nga ai re.Ndai shara  hta kanu kawa langai ngai Nanghpam malu masha jung nga ai  rai yang kashu kasha ni mung shanhte myit tsam pu tsam ba nga ai ten ni hta kaga kaja ai masa lam ni hpe jai lang na malai kanu shingrai kawa jai lang ai ladat hpe grau nna galaw wa chye nga ai re.

           Anhte tsa chyaru ya kawa gaw ka ni ya kasha hpe tsun sharin shaga nlu ai lam hpe anhte makau grup yin ni hta mu lu na ga ai.Nanghpam malu masha  langai ngai jung jai lang ai kanu kawa a kashu kasha ni shagu gaw Nanghpam bai jai lang ai lam byin mai ai ngu ntsun lu tim Nanghpam malu masha jai lang na matu kaga masha ni hta grau nna ahkaw ahkang byin shangun nga ai hpe anhte ni myit dum sadi da ra na ga ai.Dai re majaw tsawra hkungga ai kun dinghku kanu kawa ni anhte a kashu kasha ni a prat shawnglam masan sa tsawm htap wa lu na matu gaw kashu kasha ni a prat kata de Nanghpam malu masha ndu shang wa lu na matu kanu kawa ni hkum nan nanghpam malu masha hpe koi gam let shanhte a makau grup yin hta mung kaja ai makau grup yin byin wa hkra galaw ya let anhte a kashu kasha ni a prat hpe makawp maga la ga law.

By; John Mung Hkrang