Na Yup Mang Ni Teng Sha Byim Wa Lu Na Matu Hkan Sa Ra Ai Lam Ni

Na Yup Mang Ni Teng Sha Byim Wa Lu Na Matu Hkan Sa Ra Ai Lam Ni

Anhte Ramma nang ngai yawng hta, tinang byim mayu ai shing nrai yaw shada da ai ban dung langai ngai gaw nga chye ga ai, dai na yup mang shingran ni hpe hkrang shpraw lu na matu nga yang, jaw kaja ai lagaw lahkam ni hte, nnan hpang na matu ra kadawn nga ga ai, dai majaw nang a yup mang shingran da ai lam ni teng sha byim wa lu na lam hta akyu jashawn ya lu ai lam yan nkau mi hpe tsun dan mayu ai.

1.Laga wa kaw na sharin hka ja la u.... na yup mang ni hpe hkrang shapraw ai lam hta, laga wa a hpaji jaw ai lam ni madat la ai hku nna mung, myit sawn lam kaja ni, ahkaw ahkang kaja ni hte awng dang ai lam yan ni hpe hpaw lu wa shangun nga ai, nang a yup mang ni hpe hkrang shapraw ai lam hta yak wa nna, nang myit daw nga ai ten ni hta, laga wa a  hpaji jaw n gun jaw ai lam ni gaw nang a matu n gun ban ya lu shangun nga ai, nang hpe manawn ai wa a hpaji jaw ai lam ni hpe gaw nhkan madat lawm u ga sadi ra nga ai ngu shadum n gun jaw mayu ai.

2.Na hkum nang kam ai lam nga u.... Na a yup mang ni gaw nang hte tsan ai shara kaw naw re ngu hkam sha wa ai ten, nang a matu, grit yawm wa ai lam ni nga wa chye nga ai, lam shagu gaw nang a myit masin hta byim pru wa ai lam rai nna, awng dang lam lu na matu mung nana a myit masin kaw na shawng hpang wa ra na rai nga ai dai majaw ngai ndai hpe nlu galaw ai, nmai byim ai ngu ai myit daw wa shangun chye ai myit sawn lam ni hpe hkum myit, ngai ndai hpe nbyim byim hkra lu galaw ai ngu na hkum nang kam ai myit taw u

3.Mahkyen lamang galaw nna galaw shakut u...nang a yaw shada lam ban dung hpe du wa lu na matu, ra kadawn ai lam yan ni gaw  hkyen lajang da ra na re, nang hpa ni galaw da grin ai ngu ai hpe myit sawn u, dai hpang nang a yup mang ni hpe hkrang shapraw lu na matu, ra kadawn ai lam ni hpe langai hpang langai myit sawn let galaw shakut u

4.Galoi mung hka ja sharin hkam la u... Hka ja la ra na lam ni gaw galoi mung htum mat na nrai nga ai, law malawng gaw nang awng dang mayu dik magam bungli gaw yak hkak htum bungli rai nga ai, dai majaw nang du nga ai gara shara kaw mi rai rai lagawm ai lam nnga ai sha mai kaja dik ai hku hka ja sharin hkam la lu na nga yang, hpang jahtum gaw nang a yup mang shingran ni hkrang shapraw sa ai lam hta awng dang wa lu na teng sha rai nga ai ngu n gun jaw shadum ya mayu ai

Dai zawn sha ndung de du wa lu na matu, mayak mahkam lam amyu myu ni hte hkrum sha wa na gaw teng sha rai nga ai, tinang byim mayu ai hpe byim hkra galaw na matu nga yang, hkam sha lam ni hte sak hkrung nga nmai nga ai yaw shada bandung lam ni hte sak hkrung nga ra ga ai law, masha shagu gaw tinang shakut lai wa ai ni byim wa ai ten ni hta myit daw myit hten  myit kaji chye ai gaw shingra tara masa nan rai nga ai, nprinem ai langai a majaw sha yaw shada lam gaw hkum jahten kau, dai yaw shada lam mat mat yang prat du hkra hten mat chye ga ai, dai ni hkrat sum nna, myit daw myit hten nga taw yang pyi hpawt de na nhtoi jan shingkang hta mai kaja hkra lu galaw na matu shakut hkawm sa ga

Shakut shaja ai lam a hpawt de ngu ai lam shagu hta awng dang ai lam ni nga ai, myit daw nga taw yang bandung hte grau grau tsan mat wa na rai nga ai, dai majaw tinang ra sharawng ai ban dung yaw shada lam kaba hpe tawn da letm nshajawm ai shakut shaja lam ni hte matut shakut sa wa ai rai yang, hpawt de na nhtoi ni hta nang awng dang ai lam lu na matu gaw nang hpe ala taw nga ai ngu shadum n gun jaw dat let,

#youth

#rvakachinservice