Myit Masa Lam

Myit Masa Hpan Masum A Lam

Tsawra ai Ramma ni, nang ngai a prat hta, mayak mahkak, jam jau jam/ hkau lam ni gaw, lani mi hta hkrum sha wa na gaw, teng sha rai nga ai. Dai aten hta e, myit ngwi myit pyaw hte ninghkap kau lu ai ni nga ai zawn, myit htum myit daw let, prat hpe, asum jaw kau ai ni mung law law rai nga ga ai

Hpa majaw nbung shai hkat ai rai nga yang, marai langai hte langai a, n bung ai myit masa ni a majaw rai nga ai ngu, ndai shara hta mu mada lu ai. Mayak mahkak kaji/ba hta madung nrai nga ai sha, tinang tawn da ai myit masa hta she madung rai nga ai. Anhte a prat hta, myit masa kaja hte hkawm sa ai rai yang, myit ngwi simsa lam lu na sha rai nga ai re, lahta na ga baw hte maren, anhte a prat hta tawn da ra ai myit masa hpan masum ni gaw..

1.Ruyak, jam jau lam ni a n’tsa tawn da ra ai myit masa

2.Anhte shadada a lapran hta tawn da ra ai myit masa hte,

3.Tinang hkum nan tawn da ra ai myit masa ni rai nga ai.

1.Ruyak, jam jau lam ni a n’tsa tawn da ra ai myit masa ngu ai hta, anhte a prat sak naw hkrung nga ai laman hta, ruyak jam jau lam ni gaw, langai hpang langai hkrum sha ra chyalu rai nga ai, ning rai hkrum sha wa yang, anhte a matu, kaja ai ngu na myit la mai nga ai, hpa majaw nga yang, anhte a prat hta, ru yak jam jau lam ni nnga yang, lagawn lamawn hpa rai nga ai, dai ru yak jam jau lam ni hpe ninghkap kau nna, awng dang lam lu wa ai hpe Prat ngu ai rai nga ai, Raitim, nkau ni gaw, dai ruyak jam jau lam ni hpe, nkam ninghkap ai, nkam hkrum ai, dai majaw tinang yaw shada da ai prat madang de nlu du ai, ru yak jam jau lam ni hpe  ninghkap kasat nna, awng dang lam hpe lu la ai myit ngwi simsa lam hpe mung nlu hkrum sha sai, tinang a makau grupyin manaw manang wa langai ngai hta, mang hkang byim taw yang, anhte ni shang lawm hparan lawm na myit ni rawng nga chye ga ai, raitimung, anhte hta hkrum wa yang gaw, nkam hparan mat chye nga ga ai, myit sawn hpaji ninghkring langai mi gaw, masha law malawng ngu na daram, sawn sumru ai lam nkam galaw ma ai sawn sumru na i? si na i ? ngu san yang, si mat na re law nga nna htai ai ni grai law na re nga nna mung tsun da nga ai hpe mu lu ai, ndai lam hte seng nna ga shadawn langai mi hpe tsun ga nga yang, kalang mi hta kawa gaw shi kasha laika hti let, dung taw nga ai, shaloi shi kasha sawn hpan laika myit nga ai kasha gaw, dai sawn hpan a mahtai nlu hkraw ai majaw, kawa hpe sa tsun ai, wa e, ngai ndai sawn hpan a mahtai nlu mat sai tsun dan rit ngu dat ai shaloi, kawa gaw, wa sha e mahtai nlu tam na ram yak ai hpe gaw sawn hpan laika sharin buk hta nbang da na re, naw shakut yu u, dai sawn hpan a mahtai lu na gaw, wa sha nang sawn sumru na lit nga ai ngu dat wu ai shaloi nan, kasha gaw bai wa sawn sumru taw wu ai, kade nna yang, sawn hpan mahtai lu la nna, kawa hpang de mani sumsai hte wa ngai sawn hpan mahtai lu la sai nga nna, wa tsun dan wu ai, Ndai mabyim hpe yu maram dat yang, ru yak jam jau lam,mang hkang lam ni hpe hparan daw dan na gaw, anhte hkum nan rai nga ai re, anhte a makau grupyin hta hkum hkrang, n ngwi npyaw ai myi n mu ai, lagaw lata n hkum ai ni law law hpe mu lu na ga ai, raitim shanhte ni myit nkaji ai, myit ndaw ai, shanhte a prat hpe, asum njaw ai, shakut hkawm sa taw nga ma ai, dai hpe n gun yu la mai nga ai ngu, kahtap na shadum n gun jaw mayu ai.

2.Anhte shadada a lapran hta tawn da ra ai myit masa ngu ai hta gaw, anhte ni gaw, shinggyim uhpung /hpawng hte, makyin jinghku makau grupyin hte nga ai ni rai nga ga ai, dai majaw, tinang aten lu yang, makin jinghku ni hpe, sa gawan gatsan rai na mung nmai malap nga ai ngu ramma ni hpe alak mi shadum ya mayu ai, shingrai yang, lahkawng maga myit ngwi simsa lam lu la na teng sha re, kalang lang shada da nchye na hkat ai lam ni a majaw, manaw manang kaja raitim, hpyen hpa rai mat wa ia lam ni mung nga chye ai, anhte  ni magam bungli galaw hkawm sa ai shaloi, yawng a matu, galaw sa ai rai yang, myit ngwi simsa lam grau lu la nga ai, anthe nang ngai yang chye ai Mama Kaba Teresa gaw, shi a prat tup hpe matsan mayen jahkrai nmai ni a matu, ap nawng lai wat wa sai, mama a galaw sa mat wa ai lam ni gaw, yawng a matu rai nga ai, ndai lam hpe anhte ni katsi la n gun la hpa nan rai nga ai, Nawku hpung shagu hta, tsun sharin/ga ai lam gaw, yawng a matu, shakut shaja ai, ap nawng daw jau ai wa rai ra ai nga nna tsun da nga ai re, yawng a matu, shakut /ja sa ai a marang e, tinang a prat myit pyaw simsa lam lu ai hta  n ga, awng dang lam ni mung teng sha lu na sha rai nga ai law.

3.Tinang hkum nan tawn da ra ai myit masa ni ngu ai hta gaw, Anhte a makau grupyin hta grai ngwi pyaw ai ni, awng dang lam lu la ai ni hpe mu lu na rai ga ai, shanhte hpe maram yu ga, shanhte hta e, tinang hkum hpe tinang ra sharawng, myit dik ai ni re, ning ngu yang, shanhte hkum nan gum rawng/tawng ai rai dum ai, shakawng ai myit ni nrai nga ai, shanhte hkum shanhte chye ai, hkap la ai ni rai nga ai, lam mi hku nna tsun ga nga yang, tinang hkum tinang myit shang sha ai ni rai nga ai, anhte nkau mi gaw, myit ngwi simsa lam nlu ai, myit kaji garen ai, tinang awng dang lam lu la tim, mungkan hta mying gumhkawng ai hpaji ninghkring ni hte, tinang a hkum hpe shingdaw ai lam ni byim chye nga ga ai, kajai gumhkang ai ni hte shingdaw ia lam ni gaw, shut shai ai lam nan re, ahkyak ai lam gaw, tinang hkum hpe tinang nan shingdaw ai gaw kaja dik rai nga ai ngu ndai shara kaw madi madun shadum mayu ai, mani na ngai gaw, dai ni na ngai hte n bung hkra, dai ni na ngai gaw, hpawt ni na ngai nmai  rai sai ngu nna, tinang hkum nan shingdaw la ai rai yang gaw, grau lakaja wa na re shadu mu mada ai, anhte hta nga ai atsam marai hpe n gun dat let, tinang shakut sa ai rai yang, myit ngwi simsa lam lu la na sha rai nga ai.

Dai majaw lahta de tsun lai wa sai hte maren, shani/gu na ru yak jam jau lam ni hpe, anhte hkum nan hparan sa ga, dai rai yang, anhte a prat hta hkrum ra ai ruyak jam jau lam ni hpe, lu hparan nga ai ngu na myit la lu na re, bai nna, anhte galaw sa wa ai magam lam shagu hta, anhte akyu a matu nrai, yawng a matu mara rai u ga, shakut sa yang, myit pyaw lam lu la na re, hpang jahtum hku nna, shing daw ai lam hta, tinang hkum tinang shingdaw let, lani hte lani grau rawt galu kaba chye chyang kung kyang wa hkra shakut/ja hkawm sa wa ga ngu n gun jaw dat let,

#youth

#rvakachinservice