Myit Htum, Hkrat Ana Hpe Gara Hku Ning Hkap Na

Tsawra ai ramma kanau kasha ni, tinang a prat hpe tinang gara hku hting hkan nga ai kun? Sun sin kaja ni gaw,hpun kaba wa nna, asi ni awng na matu, apu ni pu tsawm nhtawm lakung lakying ni law htam wa na matu, shakut bawng mazawng nga ga ai re. Latung nsha lu hkra, nli nmat hkra,yu gawn lajang ra nga ai, dai zawn sha, anhte ni mung, shani shagu, shinggyim nga sa lam ni law law nga ai kaw na lata let, galaw shakut nga ga ai. Lata ai ngu ai ga hkum mi gaw, anhte a matu, mau hpa langai mi mung rai nga ai, Manap jan pru ten myi hpaw dat ai hte kalang ta, yup ra shawng kahtap na kun? shingnrai man shawng myit na kun? ngu ai lata ra ai lam ngu ai hte shawng hkrum sha wa nga ai rai nga ai

Dai zawn lata ai lam ni law wa ai ten hta, jaw ai lam masa hpe lata hkrup ai zawn, shut ai masa hpe mung lata hkrup chye nga ga ai. Lata dat ai a ntsa, madung da nna, galaw ai lam ni a majaw, awng dang wa ai ni nga ai zawn, hkrat sum ai ni hte hkrum sha ai ni mung law nga ai re. Ndai zawn hkrat sum lam hte hkrum wa ai ten hta, shawng n-nan myit hten wa ai gaw teng sha rai nga ai. ndai lam hpe nang ngai yawng hkrum sha ga na sha rai nga ai. Myit daw ai lam gaw hpa rai ngu san yang, dai lachyum hpe chya da nga tim, hkrak madi shadaw htai lu ai ga si n-nga nga ai re. Ndai myit ana hte seng nna, amyu myu nga nga ga ai hta, ndai myit daw ana gaw, makau grup yin hte, galai shai nga ai shinggyim masha ni a, myit sat lawat hte seng ai myit ru lam ni hte seng nga ai zawn, lani hte lani mung law wa lu nga ai lam chye lu ai. Kaja wa nga yang, ndai myit hkrat ana gaw, sak prat hta, myit mada lam nnga mat ai lam hte hpa mung nkam galaw mat ai madang du mat ai sha n-ga, dai lam yan ni hpe, hpa hte mung malai nlu bang ai ngu ai hkam la lam hte, tinang a matu, hpa mung ahkrak galaw nlu ai lam, shara nnga ai lam mung, myit daw myit hkrat lam ni rai nga ai. Myit daw myit hkrat sai nga yang mung, bai lata galaw na nnga mat ai madang rai wa nga ai.Dai zawn na myit ni, galai shai sai nga yang, shinggyim masha ni a myit gaw, grai nan mau hpa law ai lam nang galoi mung dum nga let, bai nang a myit hpe nang hting hkang lu ai lam hpe galoi mung myit dum n-gun la ra nga ai.Namg a galaw sa ai lam ni gaw, na a hkam sha lam ni hpe htawng madun ai lam yan rai nga ai, gara hku mi tinang hpe myit hkrat shangun ai magam lam yan ni galaw nga taw tim, tinang hkum tinang sha madu nga ai hpe nmai malap kau nga ai.Dai majaw nang myit daw nga ai ten, shawng nnan e tsun mayu ai gaw, tinang a ginwang kata na, makau grupyin ngu ai hpe, jahkring mi malap kau dat u, myit shuk lam mat na matu, tsit tsawm katsi pyaw ai shara hta nbung sama kaja chyu lu ai shara de jahkring hkring sa ya u, bai tinang a shut ai lam ni hpe langai hpang langai tam sa wa u, ndai zawn myit ru myit daw ai lam a npawt gaw, kalang marang pawt sindawng ai lam yan a majaw  mung chye byim nga ai re. Ndai pawt sindawng ai lam gaw, madung da ai lam nnga ai sha kapaw pru chye wa nna, kalang marang marai langai ngai kaw madung da chye wa nga ai lam yan langai re. dai zawn re ai ten ni hta, nang gaw kadai hpe pawt taw nga ai kun? marai langai ngai hpe pawt nga ai ten hta, myit daw nga ai kun? hpa majaw pawt ai ngu hpe mahtai tam ra nga ai. kaja wa nang a myit daw myit hten ai lam gaw , dai pawt sindawng ai lam hte matut manoi nga ai rai yang, nang pawt ai shara de sa dat u, bai nang shan hte hpe mara raw dat ya ai lam hpe tsun dat u.

Dai hpang, myit daw, myit hten ai lam gaw, hpa nlu galaw ai madnag du ai rai nna, myit marai matut hkrat taw ai rai yang, bungli glaw ra ai lam jahpan jahkrat ka dat u. Dai majaw bungli ni hpe ka jahkrat nna, dai kaw na, gara bungli hpe nna hpang galaw na lata dat u, dai hpang bungli langi hpang langai matut galaw shakut dat u, bungli langai ngut shagu, nang a myit marai gaw, madang langai bai tsaw wa na hpe mu wa lu na rai nga ai. Dai hku nrai yang mung,ra kadawn nga ai mang wa hpe matut manoi na garum dat u, mnang wa hpe garum dat ai a marang e mung, aw ngai mang wa hpe lu garum kau dat lu sai ngu ai myit dum lam ni hte mung, myit marai bai shatsaw ai lam hta garum madi shadaw ya nga lu nga ai re. Bai langai sadi maja ra na gaw, ndai myit daw ai lam gaw, hkum hkrang hkam kaja lam hpe hkra machyi shangun chye ai lam hpe n-gun jaw nga ai re. dai majaw, Myit ru ai lam ngu ai hpe nang galoi mung hkum hkap la, ten du na du wa ai ten ni hta mung, nang gaw, lam yan masa langai ngai hte gawt shapraw kau lu hkra shakut hkawm sa u ngu tsun let, Tsawra ai ramma ni a prat hta awng dang ai pandung de du hkra sa wa lu mu ga ngu yaw shada let, gam garan ya ai lamang hpe jaw jahkring sai law

#youth

#rvakachinservice