Myit Hkam Kaja Lam Mang Hkang Ni ( 13.6.2021 )

Rawt jat galai shai wa ai ya na prat kata hta, ramma law malawng ni myit hkam kaja lam mang hkang ni hte grau hkrum sha wa nga ai hpe mu mada lu ai, Nta masha a lam, jawng hte seng ai lam, magam dap lam,, shinggyim manawn mazum lam, lam yan shagu kaw na shadut jahkat ai hkam ra ai, bai makau grupyin a ningmu ni, sum tsaw sumra npri nem ai lam ni sha n ga dam lada ai  hku jai lang nga ai Social Media ni gaw madung tara hkam wa re ngu mai tsun nga ai

Ndai hku rai yang, lai sai ban prat hta na masha ni gaw ndai zawn myit hkrat ana yawga sha n ga laga myit hkam kaja lam hte seng ai mang  hkang ni nnga lai wa ai i ngu san na pru wa nga ai. kaja wa nga yang, nnga ai ngu ai hta, nga ai ngu nshadu kau ai ngu tsun yang grau jaw na re. ya prat na ramma ni hta, grau nna, mu mada wa lu ai ni nga wa ai mung, galai shai wa ai shinggyim nga sa lam ni a kata sak hkrung nga ai a ntsa, tinang hta byim nga ai mayak lam ni, myit masa hte seng ai mang hkang ni hpe grau nna, mu mada wa lu ai lam mung rai nga ai, ndai zawn mu mada nga dingsa ndai myit daw ana byim hpang ai masha shadang gaw gau ngwi ngwi law she law htam wa nga ai, dai ni ngai tsun na lam yan ni gaw tsawra ai ramma ni, sak prat hpe myit ngwi myit pyaw, hkum hkrang hkam kaja let sak hkrung hkawm sa lu na matu, nra kadawn ai myit ana mang hkang ni  nbyim na matu, makawp maga lu na lam yan ni sha rai nga ai law dai kata hta ..

1.Nkam ai law ngu na, ningdang lu na shakut yu u....Ningdang ai ngu ai gaw, galaw shut ai mung nrai ai zawn tara hkam ai lam mung nrai nga ai.. nawku hpung sharin shaga ai lam hte hpring nga ai makau grupyin hta nga kaba wa ai shaloi, garum hpyi wa yang, tinang maga galaw lu ai raitim, n lu galaw ai raitim, garum na matu jin jin rai ra nga ai, galoi nmai ningdang ai ngu zawn re ni, masha kaba ni a ga ni hpe na hta hpring chyat rawng matsing nga ra ga ai. dai majaw tinang gaw nkam galaw ai, nlu galaw ai ngu di pyi, makau grupyin a ningmu hta amyu myi shadu kau na kun ngu ai myit hte, madu hkum hpe madu, lit shali la, myit npyaw hkam rai nna galaw ya ra nga ai. dai majaw tinang maga garum jaw na matu, masa nhtuk manu ai ten, aten nlu jaw ai ten, nlu galaw ya lu ai ngu asan sha tsun nna ning dang kau dat u, nlaw htum tinang a myit hpe jam jau jaw lam nnga sai rai nga ai.

2.Tinang a lani mi tup byim lai wa sai  mabyim ni hpe matsing sumhtin da u...... ya na anhte a prat hta gaw, ramma ni law malawng matsing buk hta ka ai akyang lailen ni nnga sai ngu na daram rai nga ai, ndai zawn tinang a lani mi hkurm lam hpe laika kadun hte matsing da ai shaloi tinang a lani mi tup hpa ni byim lai wa ai, kaja ai nkaj ai, akyu ara ni zawn re ai hpe bai nhtang sumru mai nga ai, tinang lai sai ten hta hpa ni shut kau sai, shawng lam hta  gara hku mai kaja hkra galai shai dat na ngu ai madu hku madu bai san jep yu mai nga ai re. dai sha n ga myit ningma ni nga wa yang mung, ndai matsing lam hpe bai yu let, tinang a hkam kaja lam mabyim kaji kajaw hpe mai masam maram ai rai nga ai, mang hkang hpe jau jau chye yang makawp maga lu na lam mung grau aten lu jaw na rai nga ai...

3. Tinang a myit hpe hkring sa ten jaw u.... Shani shagu, jawng laika, magam bungli, ja gumhpraw lam ni hte dip da ai na wa yang, tinang a myit gaw hkrat wa na rai nga ai dai majaw, bat mi hta nlaw htum lani mi gaw tinang a matu, hkringsa ten lak san matsat da grin nga ai, manaw manang ni hte wam chyai ai zawn re ni, nta masha ni hte rau muk galaw sha ai zawn re ni mai galaw nga ai, bai tinang a myit hpe kahtet shangun ai maga de ndu wa na matu, myit sawn lam ni nshang wa na matu, tsawm hting hkang ra nga ga ai, pyaw hpa magam lam ni yawng galaw ngut yang gaw, gin sup hpan amyu myu galaw ai lam , zim sha nga na, yungwi nsen ni madat ai lam, laika hti ai zawn re ni galaw ya nna, tinang a myit hpe sim sa hkra bai gaw sharawt chye ra nga ai..

4. Tinang galaw ga ai mai kaja ai lam yen ni hpe bai myit sawn yu u.... Anhte shinggyim masha ni gaw myit ru ai ten ni hta nga yang, lai sai ten hta galaw shut ai lam ni,  yawn hpa lam ni, myit ru lam ni hpe grai myit sawn chye ai gaw shingra tara nan rai nga ai, ndai zawn myit ru wa sai nga yang, tinang a prat hpe mai kaja ai jut ningmu kaw na galai let mu mada chye ra ai. ngai dai ni kadai hpe lu garum ya lu dat ai kun? shing nrai ngai dai ni gaw maza sumpum taw nga ai nye gawk hpe san seng lu sai, bai grai yak ai sawn hpan laika a masa lam hpe chye na kau dat sai ngu zawn re ni hte tinang a ningtawn mai kaja lam ni hpe bai myit yu let, myit ru nga ai lam ni hpe shamat kau let mai kaja wa hkra kahtap shakut lu ra nga ga ai ngu ndai shara hta n gun jaw mayu ai.

5 ngu na hta ahkyak ai gaw, Social Media hpe aten nau hkum jaw.... Tsawra ai ramma ni galai shai nga ai prat kata hta ramma ni hpe yu dat yang, phone langai hte sha shuk taw nga ai hpe mu lu nga ai. manaw manang shada da shainggan kaw hkrum sha ga let mani tsun jahta ai lam ni nau nmu wa nna, phone screen hpe sha jahpawt kaw na shana de du hkra yu wa nga ai hpe mu lu ai, ndai zawn re ai kaw nna, masha ni hte hkrum shaga ai lam ni yawm wa ai ten, ramma ni myit hkrat  A na, shingrai zawn hkam sha myit ana ni grau byim wa nga ai hpe mu lu nga ai. dai majaw aten tup, phone lang taw ai hta, tinang hku hkau tsawra ai ni hte rau nga ai ten ni, mani tsun shaga ai lam ni galaw ra nga ai, shan hte a lam, tinang a lam ni tsun let, matsing hpa nhtoi ni hpe gin shalat ra nga ai, ndai social media ngu ai gaw, sak prat a nkau chyen maga shang lawm nga ai raitim, sak prat ting  gaw nrai nga ai hpe dum hprang ra nga ga ai.

Tinang a prat hta nga sa lam ni gaw, myit hkam kaja lam hte shawng lam gam maka hta akyu hkam sha ai lam ni byim shangun nga ai hpe ramma ni atsawm chye na da ra nga ai, nkaja ai lam yan ni, myitru myittsang lam ni ngu ai gaw, sak prat hta galoi mung hkrum sha ra na sha rai nga ai, ndai lam yan ni a majaw myit ru nga na malai, atsam sha chye na nna, tinang a sak prat a matu, ganawng n gun langai byim na matu, galai shai dat ai gaw grau kaja nga ai,  dai majaw sak ram ramma ni yawng myit hkam kaja hkum hkrang hkam kaja ai lam hpe galoi mung lu la let, awng dang ai ban dung hpe lu madu lu wa mu ga ngu yaw shada let.

#youth

#rvakachinservice