Mang Hkang Ni Hpe Si Mani Ai Hku Hpran U

Mang Hkang Ni Hpe Si Mani Ai Hku Hpran U

          Sak prat hkrun lam hkawm sa ai ten ni hta, mang hkang law law ni hte hkrum katut wa na sha rai nga ai, mahkrum madup nnga  shi ai aten ni hta, mang hkang mayak law law hte man ap hkrum wa ai ten ni hta, hkrit gari nga chye ga ai, nlu yup nlu sha ai hte, mungkan ga ntsa na pru mat wa na zawn myit daw chye nga ga ai, nkau mang hkang ni hpe pawt sindawng ai hte hparan kau dat chye nga ga ai, dai mang hkang ni gaw nzim mat ai sha, grau kaba wa chye nga ai.

Nkau mang hkang ni hpe nhpran ai sha, myit tsaw myit dap ai lam hte hparan chye ma ai, jahtum hta gaw yawn hkrat sum ai lam ni hte sha jathum mat chye nga ai, mang hkang hpe mang hkang ngu chye tawn da nna, pawt sin dawng ai, myit tsaw myit dap ai lam hpe hting hkang lu nna, myit hpe azim da let, mahtai ni tam chye ra nga ga ai re, mahtai lu yang, mang hkang hpe si mani ai hku man –ap hkrum nna, prinem hkra hparan lu ai myit ni sha nga chye na ahkyak la nga ai, shawang tsawra myit ni hpe npawt da let, hparan lu yang sha mang hkang ni gaw, ngut ai madang de shazim ya lu na mung rai nga ai, dai majaw mang hkang hpe atsawm hkrak mahtai ntam nna, loi loi hparan dat yang, mang hkang gaw, grau yak wa ai madang de du mat na rai nga ai.

Sumnung shingdi rai ra ai lam..Mazut ai zai ai lam hpe anhte shinggyim masha ni gaw, nra sharawng nga ma ai, sumnung shingdi rai nga ai, chye ai ni hpe sha, tsawra ai hte hkungga la ra chye nga ga ai, shyinggyim masha shada da kanawn mazum ai lam hta, gawngba rai dum ai hte tsun shaga yang, shyinggyim masha ni a koi yen hkrum ai hpe hkrum wa nga ga ai, nkau gaw kanu kawa ni a, arawng hte zai chye nga ma ai, nkau gaw, hkum gawng shingyan tsawm htap ai majaw myit tsaw myit dap chye nga ma ai, nkau bai rai yang, jan mau law law lu da nna, laga masha wa hpe yu kaji ler, ngaw nsawn di rai nna, tsun shaga chye ma ai, dai zawn re ai ni hpe, kadai nra sharawng nga  ma ai re, anhte shinggyim masha shada da, masa lam, madang ni shai nga ai lam hpe chye na tawn da ai rai yang, myit tsaw ai hku kanawn mazum hkrum na nrai nga ai, anhte shinggyim shingwang hta masha shada da hku hkau tsawra nga mayu yang, sumnung shingdi nga chye ra ga ai, si mani ai hku tsun shaga, kanawn mazum ai lam gaw, sumnung shingdi nga chye hkra mung shakut sa wa ga.

Masha a myit gaw, edin sun zawn bung nga ai, dai sun hpe tsawm htap pu tsawm hkra, gawn lajang lu nga ai zawn, nam maling zawn byim mat hkra mung kabai da mai nga ai, raitim, gara hku mi da da, dai lamu ga gaw, matut nga na rai nna, lamana, akyu nga, jai lang lu ai, nli tum ni ngat hkai da yang, akyu nnga, jai lang nlu ai nli tum ni sha hkrat nna, dai nli tum ni sha law htam let shara la mat na sha rai nga ai, dai majaw sun sin kaja wa langai gaw, tinang a sun hta nkaja ai tsing ni hpe dan kau let, tinang ra sharawng ai tsawm htap ai hpun ni hpe sha yu gawn lajang ai zawn, tinang a myit hte bung ai sun hta, hpraw tsawm ai myit hpun ni hte sha pu tsawm nga shangun mayu ai ni gaw, dai myit sun kata, akyu nnga, jai lang nmai  ai myit sawn lam law law ni hpe baw kabai kau lu na ahkyak la nga ai re.

Dai hta ahkyak ai lam langai gaw.. Shinggyim kanawn mazum shingwang kata hta,mahkrai langai zawn du wa lu ai lam hta loi dik hte tang du dik ai lam gaw, mani sum sai rai ai lam rai nga ai, mani sum sai rai ai lam gaw, yak hkak ai lam gaw nrai nga ai, myiman samuk na nga ai ram gaw npu ba nga ai , dai majaw masha tsawra hku hkau ai lam law nga ai ngu ai lak lai ai akyu hpe  loi loi hte lu la mayu yang gaw myit lawm hkum lawm hte mani sum sai rai nga u ngu shadum n gun jaw mayu ga ai law. dai hta jinghku kaja ngua i gaw, tinang akyu nga ai ten, shatsaw nna, tinang akyu npru wa ai aten, mara shagun jaw chye ai wa nrai nga ai, shi a kanawn mazum lam hkrang gaw, mabyim masa hta hkan nna galai shai mat ai lam nrai nga ai, galoi mung dingyang rai nga ai lam, maren mara shadang ni hte kanawn mazum ai lam, shi gaw nang hpe galoi mung akyu ara jaw ya lu ai lam nrai nga tim, nang a akyu ara hpe byim shangun mayu ai shawang tsaw ra myit hte, akyu nyawm wa nna, sadi galoi mung jaw nga ai wa rai nga ai ngu. tsun shadum dat let ndai bat na ramma lamang hpe ndai kaw naw jahkring sai law.

 

#youth

#rvakachinservice

Add new comment

4 + 5 =