Manaw Manang Law Na Matu Hpa Gaw Madung Re ( Youth Program ) 21.6.2020

Tsawra ai ramma kanau kasha ni, masha ngu byim wa sai hte rau, lu na sha na, bu na, hpun na, nga shara ni a matu, shakut hkawm sa ra nga ga ai gaw teng sha rai nga ai, dai a matu, sut masa lam, shinggyim kanawn mazum lam ni mung, maga mi maga hku ra hkyak shang lawm nga ga ai.

Tsun mayu ai gaw hpa rai ngu yang, masha langai gaw, makau grupyin hte, bung pre rap ra hkra, kanawn mazum chye na ahkyak madung rai nga ai ngu mu mada lu ai, Shinggyim kanawn mazum lam ngu ai hta ahkyak ai hku lawm nga ai majaw rai nga ai. raitimung, kanawn mazum lam hta, tinang hpe maga mi na masha wa, nhtang yu kaba wa hkra galaw la ai lam hte, yu kaji hkra mung nmai nga ai ngu mu mada lu ai, tinang kaw nga ai hku sha, tinang a myit masa tara hte sha galaw shakut hkawm sa nga taw yang, masha law malawng hte pri nem rap ra kanawn mazum chye wa na re ngu tsun mayu ai. Bai Masha ni a lapran hta, galoi mung lata sharawt nga nmai ai zawn, ten ladaw langai hta, tinang kataw ai ten, hkrat sum mat chye ai ten, manang ni a tsun jahpoi yu kaji kau ai hpe hkam ra chye ai, dai zawn sha, jet ai hku hkau kanawn mazum lam ni sha, manaw manang jinghku ni hta, langi hte langai hkungga manu shadan chye yang she, hku hkau lam gaw, ten galu ngang gring wa na rai nga ai, Tinang gaw masha ni yu kaji hkra nga sa tsun shaga hkrup yang, manaw manang ni a lapran hta, ahkyak nshatai ai masha langi byim mat na sha rai nga ai, dai zawn sha, hku hkau lam hte yu kaba ai lam ngu hpe garan gin hka nmai nga ai, hpa ni yu kaba na rai  ngu ai hpe myit yu na shara  ra nga ai, ngai gaw lu sut lu su ai, anhte kun dinghku gaw gara hku ngu zawn re, shakawng shakat lam ni hte nga sa ai lam ni gaw, kaja wa nre sha tsun kau hkrup yang, shawng lam ngang gring na kun? tsawra ai ramma ni mung myit yu mai nga ai myit masa majing hte hku hkau ai lam hta, ndai lam yan ni n-ra kadawn nga ai, ngai a matu gaw nra nga ai, langai hte langai hku hkau kannawn mazum hku hkau ai ngu ai gaw, myit masa kaja ai hte hku hkau ai lam a majaw rai nga ai, shi gaw hpa rai na ngu ai myit, sawn ai lam hpe bang let, hku hkau kanawn mazum ai nga yang, ndai gaw hku hkau lam kaja nrai nga ai hpe myit yu mai nga ai lam re

Yu kaji ai ngu ai shara hta mung, shi gaw matsan nna, aw ra zawn rai nna, ngu ai, masat lam ni a majaw nrai nga ai. Hpa i nga yang, masha ni hpe masu ai majaw, hpang langai gaw, ngai hpa tsun tsun, kam ai ngu ai myit, manang ni a ntsa tawn da shut ai lam ni a majaw rai nga ai, manang wa hpe masu ai magaw ai ngu ai gaw, teng sha tsun ga nga yang, dai zawn masha ni gaw, matsan dum hpa rai nga ai ngu mai tsun nga ai, hpa majaw nga yang, ga malai ni mung anga nga ai, manang wa hpe masu ai gaw, madu hkum hpe madu masu ai lam sha rai nga ai ngu ai lam rai nga ai. shawng nnan nkaja ai lam ni gaw, masha ni kaw ndu pru ai sha, tinang galaw dat ai kam maga, tinang sha hkam ngu ai hte maren sha, tinang gaw hpa nkaja ai lam ni galaw wa ai kun ngu ai hpe myit masin hta shawng chye taw ai a majaw rai nga ai. dai hta, ngai manang wa hpe masu mai yang mai na, nye hkum ngai gaw masu nmai ai ngu hpe chye sai hte maren, hpang langai gaw, tinang hpe masha langai wa yu kaji mat hkra, tinang sha galaw ai lam rai nga ai. Hkrum zup ai jahkring mi na aten ladaw ni hta, langai hte langai masu makaw ai lam ni , nnga ai hpe nga ai, nchye ai hpe chye ai zawn galaw sa ai lam ni gaw, laga manang wa a yu kaji kau ai hpe hkrum chye ai lam sadi sahka hkawm sa tsun shaga ga ngu ga saw dat mayu ai, dai majaw, shinggyim kanawn mazum ai lam hta, ahkyak ai gaw myit hpe myit hte kanawn mazum ai lam ria nga ai. Maga mi na masha wa tinang hpe yu kaba hkra galaw la nra ai zawn, yu kaji hkra mung nmai galaw nga ai. Tinang a, kraw dung myit masa hte, masha shagu galaw sa na nga yang, manang wa a kam shamyet lam hte yu kaba lam ni hpe galaw la nra ai sha, shi chyu shi gau ngwi ngwi tinang kaw du wa lu na re ngu  kam let, tsawra ai ramma ni a prat hta, manaw manang kaja, jinghku kaja ni law htam wa let, galaw sa ai lam ni hta masan sa awng dang lam lu la wa mu ga ngu yaw shada let,

#youth

#rvakachinservice