Magam Bungli ( Youth Program )

 

Magam bungli galaw shakut/ja hkawm sa ai lam gaw, anhte a prat nan rai nga ai, anhte ni yawng ngu hta, tinang hte seng ai magam bungli gaw, galaw hkawm sa ra nga ga ai re, lu na, sha na, bu na, hpun na, a matu, ja gumhpraw ra kadawn nga ga ai, dai ja gumhpraw hpe lu na matu nga nna, magam bungli langai ngai hpe galaw ra ga ai re, magam bungli galaw sa wa ai hta, kaning re ai bungli hta raitim, ru yak jam jau lam ni gaw nga chye nga ai.

Magam bungli galaw ai a majaw, pu ba ai lam hte seng nna, hpaji ninghkring ni kaw nna, bungli galaw sa ai lam hta, hkam jan lu ai n gun nga hkra galaw hkawm sa lu ai majaw, hkum hkrang, myit masin hkam ja na lam No 1 ahkyak htum re nga nna tsun da nga ma ai, Bungli galaw sa ai hta, tinang a matu, akyu grai rawng ai hte maren, tinang a dinghku masha ni hpe mung akyu jaw ya lu nga ai, raitimung, jam jau lam mung jaw ya lu nga ai re.

Magam bungli galaw ai lam gaw, shinggan na manaw/nang ni hte hkrum shaga na matu rai nga ai, bungli galaw ai wa a mungkan gaw dam lada la nga ai, shi hte hku hkau ai manaw/nang ni law law nga ai, prat a jam jau lam ni hpe grau hkrum sha ai ni a majaw, dinghta prat a jam jau lam ni hpe, nhkrit nkang lu ninghkap kau lu nga ai, Bai tinang a hkum tinang kam hpa ai myit ni grau jat wa lu ai, magam bungli galaw yang, grai ba ai, grai jam jau ai ngu nna, bungli n galaw gaw nmai nga ga ai.

Kaning re ai magam bungli mi galaw law, yawng a matu, akyu rawng ai, akyu pru ai lam rai ra ai, bungli galaw ai a marang e, anhte ni dinghku a matu, myu sha a matu, akyu rawng ai ni mung tai ra nga ga ai, tinang galaw ra ai magam bungli gaw, yawng a matu, akyu rawng ai bungli rai yang, bungli galaw ai hta pu ba ai lam ni pyi nnga na re, raitim, magam bungli shakut hkawm sa ai ten, tinang a matu mung, akyu n nga, manaw/nang ni a matu mung, akyu nnga ai rai yang, tinang hta myit ru lam ni  grai byim pru wa na re, Gashadawn, langai hpe maram yu ga, jawng sara langai mi, shi sharin dat ya ai jawng ma langai ngai wa, grai ningtawn wa yang, jawng ma a matu, sara a matu akyu rawng ai lam rai wa nga ai, jawng sara magam hpe gun hpai nga ai ten, shata la hka nlaw nla raitim, pu ba tim, jawng ma ni hpe yu let, myit n gun awai la lu nga ai, dai zawn magam bungli galaw sa ai hta, nkau mi gaw, hkum hkrang hkam kaja lam n nga ai majaw, hkring mat ra ai ni mung nga ai, ningrai hkring sa mat ai ni gaw, magam bungli hpe dingyang galaw taw ai ni re majaw, kamam aten hpe nkam jahtum ma ai, ndai lam hte seng nna, mabyim langai hpe yu ga Stephan Haw King, asak 50 jan ram hta, hkum hkrang lagaw lataa ni nmai shamawt mat ai, ga mung nmai shaga mat ai, lata layung2 sha mai shamu mat ai computer kaw laika ka ngut ai hte, nsen pru wa hkra shi a manang wa gyin shapraw da ya ai, dai majaw shi tsun mayu ai ga si ni hpe shawng nnan computer kaw shawng ka bang ra ra rai wa ai, malu masha sha na nga yang mung, bawat jaw ra ai, shi gaw dai computer hpe mannag shatai let, magam bungli langai lu galaw hkra, shakut ai, shi a myit masin lak nak njahkrat ai ni a majaw, england dakkasu hta laika sharin sara byim mat wa ai

Tsawra ai ramma ni ndai mabyim gaw, magam bungli hpe gade ram tsawra manu shadan ai ngu ai a kum la re, anhte a matu, myit n gun la hpa nan mung rai nga ai, dai majaw, magam bungli galaw nga ai hta, ja gumhpraw lu ai bungli hpe hkrai tsun mayu ai nrai nga ai, magam bungli galaw ai gaw, lagawn hpa re, nga nna, lawan wan galaw shangut kau ai ahpa atang sha myit let, galaw ai lam ni gaw, shut nga ai, tinang prat a matu, ra rawng ai, myit lawm ai  magam bungli ni hpe galaw let, myit dik hpa shara, mahkrum madup ni hpe lu tam la nga ai magam bungli galaw sa ai hta, awng dang taw ai ni, myit lawm hkum lawm let, galaw sa ai ni gaw, shanhte a magam bungli hta grai myit shang sha let, galaw taw nga ai ni re, tinang galaw ai magam bungli gaw, tinang hpe gade ram wa akyu jaw ai kun? maram yu ga nga yang,  tinang hkum nan galaw nga  ai magam bungli hta, tinang kade ram, myit lawm let, shakut nga ai kun? ngau ai hta madung rai nga ai, tinang magam bungli hpe, manu shadan magang, prat hpe manu shadan ya magang rai nga ai, raitimung sadi sahka ra ai lam gaw, tinang kade mi myit lawm taw ai magam bungli rai taw u ga, tinang hkum hkrang hkamja lam hpe hkra shangun wa ai rai yang, jau jau laga magam bungli de htawt sit galaw ra ga ai.

Bai nna, magam bungli hpe anhte nang ngai asak prat 20 jan ai hte, galaw hkawm sa ra nga saga ai re, Nkau mi gaw, ma kaji ten kaw na pyi galaw sa ra nga ai, anhte a bungli galaw sa ai aten ni gaw, lani mi ha, nlawm htum hr 12 re, ndai hk 12 ngu ai hta, bungli sa na matu, hkyen lajang ai ten ni yawng mung lawm nga sai, dai majaw, lani mi a aten yawng hkam bum 2 gaw, bungli galaw sa ai ten ni rai nga ai ndai ram shakut shaja hkamw sa ai magam bungli gaw, tinang a lu na, sha na, a matu, hkum tsup  hkra lu lajang la ai hta, kaga, akyu ni nlu jaw ai, mahkrum madup ni nlu la ia lama rai yang, anhte nang ngai a matu, loi gaw machyi hkrum na re, dai majaw, magam bungli galaw let, hpawn, mahkrum madup ni, tinang a prat hpe akyu jaw ya lu ai hpaji ni lu la hkra, mung shkut shaja hkawm sa ra nga ai, ndai dinghta prat hta, tingkyeng marai langai sha, nmai nga ai, wuhpung wuhpawng hte nga ra ai, yawng hte myit hkrum mangrum let, magam bungli hpe jawm galaw hkawmsa ai gaw, myit hkrum ai lam a kum la langai rai nga ai

Lahta de tsun lai wa sai hte maren, magam bungli galaw sa ai hta, tinang a matu mi rai rai, yawng a matu mi rai rai akyu rawng manu dan na grai ahkyak ai, anhte nang ngai a prat hta, mai kaja ai magam bungli ni hpe myit ndaw nhten ai sha shakut shaja hkawm sa nga ga ngu n gun jaw shadum dat let,

 

#youth

#rvakachinservice

Add new comment

10 + 9 =