Magam Bungli Hpe Tsawra U ( Youth )

Magam Bungli Hpe Tsawra U

Magam Bungli ngu tsun dat ai hte sumdu lang, nhtu lang yang she ngu yang gaw shut mat na rai nga ai, Kaja wa magam bungli ngu ai gaw, anhte masha shagu hte matut tawn nga ai, htum hkra tsun ga nga yang ma kaji kaw n asak kung, gumgai dingla ten du hkra, magam bungli hte seng taw nga ga ai hkrai rai nga ai

Ma kaji ni marawn hkrap ai lam, gumhtawn ginsup ai lam ni mung bungli rai nga ai bai ma ni jawng sa ai lam mung  bungli rai nga ai, hkrunlam hkawm ai lam ni, tsun shaga ai lam ni, sharin jaw ai lam ni, zawn re ni rai nna, hkum hkrang myit masin yawng hte shamu shamawt nga ai lam ni yawng gaw,bungli ni hkrai rai nga ai, langai gaw nga ai, shinggyim masha hte magam bungli, magam bungli hte shinggyim masha gaw, galaw mayu ai hte myit lawm ai bung taw ra na ga ahkayk nga ai ngu mu mada lu ai

Hkauna htu nga ai wa hpe, laika ka sara galaw shangun nmai ai zawn, nga dawn sha ai wa hpe, sandaya dum shangun nmai nga ga ai, prat e jaw ai hte maren gam maka hte maren, shi magam bungli hte shi gindan ai magam bungli ni hpe gaw galaw shakut ra nga ga ai re ndai hta tinang galaw taw nga ai magam bungli gaw, tinang a sak prat mabyin masa hte  htuk hkrak taw sai nga yang dai magam lam hpe mai byin ai daram, atsam rawng ai ma hkra hte, kaja dik htum nib yin tai wa hkra galaw shakut u, dai zawn galaw ngut sai nga yang, tinang hta nga ai atsam marai kaja ni hpe gang shale dat sai hte mung bung nga ai, shawoi na hta grau galaw lu w anna, dai taw ai atsam ni mung n gun kaba wa lu na teng sha rai nga ai

Dai ten magam gun manang shada grau ai atsam ni de du wa lu na sha n ga, grau nna, ningtawn ai ai lam gaw, atsam marai kaja ni hpe grau shale lu wa ai sha  n ga, galaw taw nga ai magam bungli ni hta, magam bungli ahkaw ahkang ni mung mu wa lu na rai nga ai, dai gaw tinang a magam bungli a ntsa tsaw ra ai myit masin a akyu ara ni rai nga ai, magam bungli hpe tsawra chye ai wa langai gaw, tinang a bungli a ntsa galoi mung myit shang sha taw nga ding yang rai nga ai , bungli nnga nna, rau taw nga ai ngu nan nnga ai daram rai nga ai, tatut hta bungli magam bungli nnga ai rai yang, galaw mai ai lam yan ni hpe tam na ra nga ga ai, bai myit sawn taw nga ra ga ai, kaja ai hta grau kaja hkra lam yan tam let myit sawn nga ra ai

Tinang hte magam bungli bung ai ni a ntsa mung garum shingtau ya ai a marang e, jinghku kaja ni law htam wa lu na mung rai nga ai bai ndai hta langai tsun mayu ai gaw, tinang a magam dap, makau grupyin hpe san seng lam galaw  ai mung bungli hpe tsawra chye ai kumla langai re majaw nang shani shagu na sak hkrung lam magam bungli galaw ai hta galaw grin ai lam yan rai ng ai lam tsun shadum mayu ai. Tatut magam bungli hta, byin dik ai wa, ningtawn dik rai ai wa  a matu, mabyin masa ahkaw ahkang lam yan ni gaw lat taw chaylu rai nga ai, kaja wa dai zawn ningtawn ai wa a matu, shagup shara lu ai lam de du wa lu na matu, woi sa lu ai wa gaw kadai nrai nga ai nang nan rai nga ai hpe dum ga

Dai majaw galaw nga ai magam bungli hpe tsawra chye ai wa gaw, yawm wa ai ngu nnga nga ai, galu kaba dingyang rai nga ai hte, kaja wa rawt jat nga ai lam gaw, hpang de htingnut ai lam nrai nga ai sha, shawng de hkawm sa nga ai lam rai nga ai, dai majaw tinang galaw nga ai magam bungli hte nrum shi ai nga yang, magam bungli a masa lam hpe chye na hkra galaw shakut ra ai sha nra, ngut yang rai sai ngu  nsawn n galaw dat ai sha, tang du mai kaja ai magam byin tai hkra lit la galaw shakut ra nga ga ai, dai zawn mahkrun lam ni mu wa lu sai nga yang, magam bungli kaw na mung, kaba la ai madang de du wa lu hkra gang sa wa lu na rai nga ai

Bungli ngu ai gaw kaning re ai hkrang nsam nga ai raitim, tinang shakut shaja ai atsam marai hte  galaw lu ai magam bungli shagu hta galaw lu ai wa a matu gaw arawng lu la nga ai, magam bungli ngu gaw galoi tim shi hkrai san rai nnga nga ai, matut manoi ginlen nga ai lam ni hkrai rai nga ai majaw magam bungli hpe nju njdawng na matu nrai nga ai, magam bungli ngu hpe tsaw ra na matu hte dai zawn kaja wa na tsawra sharawng let galaw shakut nga yang sha ngang grin ai awng dang lam hpe lu madu wa na rai nga ai

#youth

#rvakachinservice