Madu A Ramma Daw II

Ramma ni law law ni hta, mayak mahkak jam jau hkrum sha nga ai sha n ga, ma hkum byim mat ai ni, ma shabrai kau ai ni, HIV/AIDS prat dep ana chyam bra hkrum ai ni,nang hpam malu masha lu sha ai hpai da da ai, nkaja ai nsan seng ai laika,sumla ni hta myit jung taw ai ni hte dum nta nnga kun dinghku nta nnga ai,magam bungli mayak mang hkang a majaw, lam maw ntsa kaw du taw nga ai ramma ni law law hpe, mu mada lu nga ga ai. Mungkan a myit masa hte myit saw nna lau la hkrum ai a majaw masha wa hpe, jahten ai, jahkrit shama ai, shatan nhkan ai lam ni ramma ni hta byin taw sai. Dai sha n ga ting hkrai myit ai, masha wa hpe je la tam ai, makam masham nnga ai zawn sak hkrung hkawm sa nga ga ai gaw yawn hpa kaba rai nga ai nga nna rap daw zup hpawng kaba hta, madun bawng ban lai wa sai.

Ya na prat gaw, hpung tang hpaji rawt jat galu gaba ai prat re ai majaw, dai hpaji a ga-up hkrum nga ai hpe mung koi yen nmai nga ai. Dai re majaw ya na prat hpe gaw, Digital prat nga ming shaga ma ai. Ndai digital prat gaw, masha wuhpung wuhpawng hpe mai kaja ai lam ni jaw ai zawn, nkaja ai lam ni hpe mung jaw nga ai, byim shangun nga ai hpe malap da nmai nga ai, ndai digital prat a majaw Internet kaw na Ramma ni a loiloi sha hkrum lu ai, shaga lu ai Langai hte langai ning mu ni garan shachyam lu ai, shiga ni hte, machye machyang hpaji tam sawk ai lam ni lawan dik ai hte rawt jat wa ai. Hti shadawn ndang ai tinang myit shang sha ai hpaji lam, mung masa lam, magam bungli lam, makam masham lam hte seng ai hpaji ni hpe loi loi sha tam sawk sagawn lu ai gaw, ndai digital prat a akyu chyeju ni rai nga ai,

Raitimung lam mi hta Internet jai lang ai a majaw ting hkrai prat tai mat ai, masha ni jai kabye hkrum ai, baw hte sha hkrum ai, nkaja ai lam hpe n gun jaw ai ning sin prat maga de du shangun taw nga ai hpe mung malap nmai nga ai, dai digital matut mahkai lam ni kaw na anhte shinggyim masha ni a myit hpe gung lau la shangun ai, teng man ai lam hte matut mahkai lam hpe hkrat sum shangun taw nga ai, Ndai digital mungkan gaw manang langai wa a hkrat sum machyi ai hpe nmu lu hkra, anhte ni hpe myi kraw shangun nga ai, Nkaja ai nsan nseng ai laika, sumla ni gaw,,ramma ni a hkum shan ra marin ai lam hpe shut shngun nga ai. Dai sha n ga shinggyim masha sari sadang hpe nmu lu ai myit yup mang mungkan hpe byin shangun chye nga ai. Ndai lam ni yawng hpe, Rap daw zuphawng kaba hta, ja ja bawng ban lai wa sai rai nga ai.Ramma ni gaw sasana  mawku hpung sasana hpe galoi mung bawng ring hkra galaw lu ai.

Nawku Hpung sasana a nkaja ai hpyen ni hta na mung, makawp maga ya lu ai. Nawku hpung sasana hpe galoi mung rawt jat galu kaba taw hkra garum ya lu ai. Dai sha n ga gaw, ramma ni a myit tau chye ai lam, ap nawng ai lam, san seng san pra ai lam, magrau grang ai lam, shada da mara raw dat ya ai lam, tinang a shaga la ai lam hta sadi dung ai lam, kyu hpyi shakut ai lam,Tengman ai lam hte masha yawng a matu ap nawng daw jau ai lam, matsan mayan re ai ni hpe tsawra myit hte garum shingtau ya ai lam ni hte ramma prat hpe karai kasang a mungdan a matu daw jau mai nga ai, grau nna masha wuhpung wuhpawng kaw na kau da hkrum, gabai da hkrum ai ni a matu, Karai Kasnag a tsawra myit hte, shanhte hpe ramma ni gaw myit mada ai lam,kam sham ai lam ni hte garum jaw ya mai ai. Dai sha n g, tinang nga ai buga, tinang galaw ai magam shara, tinang gazawn mazum ai shara magup hta ( laika sharin jawng, ginsup shara, wuhpung wuhpawng, bungli galaw ai shara ) ni hta mung, Madu Yesu a kabu gara shiga, Nawku hpung a kam ra ai/ kam sham ai lam ni hpe sat lawat hte, n –gup aga hte, nga sa ai lam ni hte, hkrit kaya ai lam ni n nga ai sha sakse hkam hkawm sa gwi ai hpe, Kahtawlik Nawku Hpung ra kadawn nga ai.

Dai zawn re ai Sasana majen je ai lam gaw, Kahtawlik Nawku Hpung a tsawm htap ai nam chyim hpe tinang hte ni htep ai ni hpe gam garan ai lam rai nga ai. Dai majaw Kahtawlik Ramma ni hpe Sasana majen je ai lam hta, tinang a shaga la hkrum ai hku nna, hpring hpring zup zup ap nawng daw jau lu na matu, Rap daw zuphpawng kaba hta n gun jaw da nga ai. Ramma ni hku nna madu yesu gaw Ramma ni a kaja dik htum manang re hpe mung malap da nmai nga ai shani shagu hkrum sha nga ai mayak mang hkang ni, yawn ai lam ni, ting hkrai lam ni hte prat hta pat shing dang hkrum sha nga ai ni hpe, tawt lai lu na matu, Madu Yesu gaw dai mayak mang hkang ni hpe tinang hte rau sha hkam nga ai ngu ai hpe myit dum mai nga ai.

Dai mayak mang hkang ni hpe magrau hte, tawt lai lu na matu, Madu Yesu gaw tinang hpe myit n gun shaja ya nga ai. Karai Kasang hpe tam nna shi tsun da ai mungga ni hpe myit hta bang let, tinang a prat hpe Karai Kasang kaw ap da nna sari sadang nga ai masha tai hkra shakut ra nga ga ai. Anhte ni hpung tang hpaji hte matut mahkai n-hka ai zawn sha, Madu Yesu hte mung anhte a prat matut mahkai hka nmai nga ia, Madu Yesu gaw ga shaga dan na matu, madat ya na matu, tinang a prat hpe shi kaw hpaw tsun dan na matu galoi mung a la nga ai. Madu Yesu hte jawm pawng lu yang she, Ramma Prat a tengman mai kaja ai lam mu lu na re, Ramma ni a myit sumru akyu hpyi hpawng makam masham hte kyang lai len sharin hpawng, Nawku Hpung lam, kahtawlik nawku hpung a sharin shaga ai lam, hkungran sakkaramentu a lam, media matut mahkai a lam sharin ya ai hpawng ni hta, shang lawm ra nga ai. Ramma ni a magam lam ni hta, n gun atsam ma hkra hte shang lawm ai lam a marang e, shada da  myit hkrum ai lam, pawm hpawng ai lam ni hpe, gaw gap la ra ai, Kyu Hpyi ai Misa lawm ai, Karai Kasang a mungga hpe myit sumru ai, wenyi n gun jaw ya ai laika buk ni hti ai, sanpra ai ni a nga sat nga sa lam ni hpe katsi kamang la nna, tinang a makam masham ngang kang hkra hkan galaw shakut ra ai nga nna, n gun jaw da nga ai.

Wasarabyim Francis gaw, “ Ramma prat hpe kaja dik ai hku jai lang u, Myit masin chyinghka hpaw let, pyen hkawm lu hkra shakut u, bungli magam hkring sa ai prat hpe jau jau hkring na matu hkum myit u”  nga nna, ramma ni hpe n gun jaw da nga ai. Dai sha n ga, Wa sarabyimk gaw prat hkrun lam hta Madu Yesu a myiman hpe yu nna, shi kaw na  n gun atsam la let, prat a hkrun lam htum ai ten du hkra, matut kagat u, nga nna , n gun jaw da nga ai, Dai hpang Nawku Hpung Sasana gaw nanhte a shamu shamawt ai lam nyan marai hpaji hte, makam masham ra nga ai nga nna, Ramma ni hpe hpyi shawn da nga ai. Dai re majaw, anhte ramma ni , tinang a shaga la hkrum ai lam hku nna, Madu Yesu a magam hta rau sha matut na ap nawng daw jau sa wa ga. Anhte Ramma ni a pawm hpanwg galaw sa ai lam gaw ya prat na Kahtawlik Nawku Hpung ra ahkyak taw nga ai ngu hpe myit masin hta bang da let, yawng hkra rau jawm shakut sa wa ga ngu n gun jaw dat lu ai.

Wa Sarabyin Francis a Ramma hte Seng ai laika buk ( Christus Vivit hpe hti yu ga ngu n gun jaw dat lu ai.

credit Lay Phay

Makam Masham Nli Magazine Volume 8

#youth

#rvakachinservice