Madu A Ramma Daw 1 ( Youth Program )

Anhte a sak hkrung hkawm sa nga ai mungkan ga, makau grup yin hta, ramma ni law law wa sak hkrung hkawm nga ma ai. Ramma ni n nga ai shara, Ramma ni hpe nmu lu ai shara nmu lu ga ai. Ramma ni a magam lit ni gaw, Mare kahtawng hta raitim, shinggyim uhpung uhpawng hta raitim, mungdan magam hta raitim, Sasana magam hta raitim, grai ahkyak la nga ai. Ramma ni hta, magam lit n nga yang hkai nmai ai yi sun hkau na hte bung nga ai. Dai rai nna Wa Sarabyim Francis gaw Kahtawlik Nawku Hpung hta Ramma ni a magam lit ahkyak nga ai lam hpe chye ai majaw, 2018 ning October shata hta Mungkan ting na/ Mungdan shagu na Wa Saradaw malai ni hpe saw shaga dat nhtawm ya prat na Ramma ni hte seng ai lam ni hpe bawng ban jahkrup na matu, Rap daw zup hpawng kaba hpe woi awn galaw lai wa sai.

Dai rap daw zup hpawng kaba hta, anhte Myen mungdan na Wa Saradaw Cardinal Charles Bo hte, Wa Saradaw Francise Daw Tang mung Myen mung a gawng malai sa du shanglawm lai wa sai rai nga ai, Dai Rap Daw zup hpawng kaba a apu asi hku nna, Wa Sarabyim Fracnise gaw Ramma ni hte seng ai ( Christus vivit ) ngu ai laika buk hpe ka shapraw dat lu sai rai nga ai, Mungkan ting na Ramma ni nlu nmai, nhti nmai laika buk kaja nan rai nga ai.

Dai re majaw dai laika buk hta lawm ai grau nna, Ramma ni hpe n gun jaw ai lam ni hte seng nna, tang madun dat nngai. Dai laika buk hta Wenyi a n-gun byin shangun ai “ Madu Yesu gaw asak naw hkrung let nga ai “ ngu nna shawng hpang let, ka da ai gaw, myit shang sha hpa nan rai nga ai. teng sha jaw nga ai, Madu Yesu gaw anhte a myit Wenyi salum hta galoi mung asak hkrung nga ai re. Anhte Ramma ni hte galoi mung rai nga nga ai. Anhte Ramma ni yawn ai ten hta raitim, myit ndik ai hkrit ai, n-tsen ai, awng dang ai lam ni nlu ai zawn sha, lani hte lani sak kaba wa ai zawn hkam sha ai ten hta raitim,anhte Ramma ni hpe myit n gun jaw ai hte, myit mada ai lam ni hpe shalaw shahtam ya nga ai.

Madu gaw anhte Ramma ni a myit masin salum hta galoi mung nga nga ai nga nna, Ramma ni hpe n gun jaw da nga ai.Ramma ngu ai gaw, grai kaba ai lam ni hpe myit sumru chye ai ni, dam lada ai lamu kang hkau hpe tam chye ai ni, tsaw tsaw myit chye ai ni, mungkan madang hte galaw mayu ai ni, grawng ai lam ni hpe galaw mayu ai ni, grau kaja ai mungkan hpe gawgap mayu ai ni nga nna, lachyum shalen da nga ai,

Tsawm htap ai myit masin hte myit tau ya chye ai, matsan dum chye ai, shagrit shanyem chye ai, ngwi pyaw tsun shaga chye ai, myit gyip nem chye ai, langai hte langai madat chye na ya chye ai, langai wa shut hpyit ai mara ni hpe langai wa raw dat ya chye ai, kyu hpyi ai lam hta, kup zup ai hte, Madu Yesu a gasi ningli hpe la dagraw da ai ni rai nga ai Ramma prat gaw tsawm htum aten rai nga ai. Ramma prat hta dingman ai lam, makam masham lam, tsawra ai lam hte simsa lam tam ai ni mung ramma prat a tsawm htap ai lam rai nga ai.Ramma prat gaw tinang a gam maka, prat a tsawm htap ai lam rai nga ai, Ramma prat gaw, tinang a gam maka, prat hkrun lam hpe tam ai ten rai nga ai. Dai re ai majaw, ramma prat hta shingran yup mang tsaw tsaw da nhtawm, rap ra ai ganawn mazum lam agung alau hte chyam dinglik ai ni hpe gwi gwi tsap nna, prat a sak hkrung lam magam bungli ni hpe lata chye ai hte hpring zup nga ra ai.Ramma prat gaw Karai Kasang jaw ai kum hpa rai nga ai.

Dai re ai majaw, tsawm htap ai ramma prat hpe tinang a akyu matu sha nrai masha yawng a akyu matu jai lang ai ten re hpe, hkam la chye ra ai. Ramma prat gaw hkum hkrang galu kaba wa ai zawn myit masin kyang alilen hte seng ai wenyi hte seng ai rawt jat galu kaba wa hkra nga sa, galaw sa ra ga ai, Ramma prat hta masha byin hkra myit bawng ring hkra, shakut shaja ra nga ga ai. Ramma ni a n gun atsam, magrau grang ai hte mungkan hpe galai shai shangun wa lu hkra, myit chyam jaw ai lam ni hpe nhkring mat ai sha, Karai Kasang a mungdan a matu, ramma ni a matu dai ni nan, jai lang ra sai nga nna rap daw zup hpawng kaba hta, Wa Sarabyin n –gun jaw da nga ai.

Rap daw zup hpawng kaba hta, ya prat na ramma ni hkrum nga ai mayak mang hkang ni hpe tang madun bawng ban sang lang da nga ai. Zup hpang kaba hta, shang lawm ai ni tang madun ai hta ya prat na ramma ni law law gaw, majan byin nga ai ni hta shanu nga ai majaw ram la hkrum ai, masha wa dang sha hkrum ai, n kaja ai wuhpung hpaw ai, dut sha hkrum ai,mayam yam hkrum ai, lam magup hku dang sha hkrum ai hpe hkam sha nga ai lam hpe myit yawn ai lam tsun da nga ga ai.

Dai sha n ga tinang a makam masham a majaw, tinang a nga shara makau grupyin dum nta kaw nlu nga ai sha zingri zingrat hkrum ai hte sat kau hkrum ai lam ni hpe hkrum sha, hkam sha nga ga ai.Ramma ni law law wa masha ni a jahkrit shama shagyeng hkrum ai a majaw, kaga lata na lam nnga ai a majaw mung,nkaja ai sat nat ai magam bungli ni, lak nak lang hpung ni, nang hpam malu masha dut lu dut sha ai lam ni hta magam bungli gala sha ra nga ga ai. Dai nkaja ai magam bungli ni gaw, ramma ni a prat hpe jahten ya nga ai. Kyang lai len hten za ai hte nang hpam malu masha lu sha ai lam gaw, ramma ni law law hpe, prat nram shia ai ramma ni law law hpe prat htawng hkrat shangun ai lam kaba rai nga ai.Dai sha n ga ramma ni law law wa makam masham lam, amyu lam, magam bungli lam a majaw ngam kau hkrum ai hte garan gachyan,garan ginhka lam amyu myu hte hkrum sha nga ga ai.

credit Lay Phay

Makam Masham Nli Magazine Volume 8

#youth

#rvakachinservice