Ma Ni Tsawra Ai Kanu Kawa Ni Tai Hkra Nga sa Ga

Kanu yan Kawa myit hkrum mangrum nnga ai lam gaw kashu kasha ni kanu kawa ni a ntsa tsawra ai lam yawm shangun ai re.Kashu kasha ma ngu ai ni gaw dum nta langai hta rau nga nga ai kanu kawa ni hpe kasi la chye ma ai re.

Dai majaw anhte a kashu kasha ma ni hta kaja ai lai kyang ni nga wa hkra anhte kanu kawa ni gara hku nga ra ai ngu ai lam hpe tsun dan mayu nngai.Anhte nkau kun dinghku hta kanu kawa ni gaw kashu kasha ma ni hte hku hku hkau hkau nnga ai lam hpe mu lu ai.

Kashu kasha ma ni hkrit hkungga u ga nga nna sim rai nau n shaga ai sha nga ra ai ngu ai ningmu lam gaw kanu kawa  hte kashu kasha ni a lapran tsawra myit yawm wa shangun chye ai re.

Kun dinghku dum nta masha shada da asan brang lang nnga ai,hku hku hkau hkau nnga ai lam gaw kashu kasha ma ni hpe kanu kawa hta manaw manang ni hpang de grau nna hku hkau myit kap ma chye nga ai.Dai majaw ma ni hpe jahkring hkring ahpum ai lam galaw ya ai hte asan brang lang kanawn mazum tsun shaga chye ra ai.

Bai nna anhte a kashu kasha ni hpe jahkring hkring pawt marawn jahtau taw nga ai rai yang shanhte hte grau nna tsan mat wa shangun nga ai.

Ma ni dum nta hta npyaw ai shinggan de jahkring hkring pru wawm hkawm ai lam ni mung galaw chye ma ai re.Dai majaw anhte a kashu kasha ma ni hpe tsawra shawang myit kaba hte tsawra makawp maga ga,shanhte myit pyaw na ga ni hpe jahkring hkring tsun ya ga.Shadut shagyeng pawt marawn ai lam hpe koi gam ga ngu mung tsun mayu ai.

Anhte kanu kawa ni gaw magam bungli law nrau ai shaloi anhte a ma ni hte ga nau nlu shaga na ga ai.Ma ni gaw kanu kawa ni a ahkyak la hte tsawra myit ni ra nga ai re.Ndai zawn kanu kawa ni bungli law ai ten tsan wa shangun chye ai re.

Dai ten anhte kanu kawa ni kaw nna jahkring hkring matut mahkai tsun shaga ai,aten la tsun shaga ai lam ni hpe mung galaw ya ra nga ga ai.Anhte a kashu kasha ma ni hpe hpa nchye ai ngu manam ni sa yang tsan ai shara de nga shangun ai,hpa ntsun lawm shangun ai hte ma ni a lam shatan nhkan tsun ai lam gaw ma ni hpe myit kaji garen yawn shangun nga ai re.

Dai rai yang anhte kanu kawa ni hpe tsawra myit yawm wa nna nkaja ai hku mu mada wa shangun chye ai re.Anhte kanu kawa ngu na shagu gaw anhte a kashu kasha ni hpe manaw manang kaja ni hte hkrum kanawn mazum shangun mayu ai hkrai rai na re.

Raitim aw ra manang wa hte hkum kanawn shaga,le ra manang wa hte hkum kanawn shaga ngu ai lam ni mung anhte kanu kawa ni hpe nju nkaja ai hku mu mada chye wa chye ai re majaw anhte kanu kawa ni sa di da myit da ra nga ga re.

Kanu yan kawa jahkring hkring  ga law ninggyet pawt marawn hkat ai lam mung ma ni kanu kawa hpe tsawra lam yawm wa shangun nna dum nta hta nga npyaw ai lam hpe byin shangun ai re.

Dai zawn sha kanu yan kawa shada myit hkrum myitra kanawn mazum tsun shaga ai lam nnga ai mung ma ni kanu kawa hpe hkungg ai lam nnga ai sha tsawra myit mung yawm wa chye ai re.

Dai majaw anhte a kashu kasha ma ni a tsawra myit hpe anhte lu na matu kasi kaja tai lu ai kanu kawa ni byin tai lu hkra shakut wa ga.

By: Munghkrang