Ma Ni Hpe Tsawra Yang Hkum Dip Tawn Da

google photo

Tsawra ai kanu kawa ni anhte ma ngu ni gaw  nnan prut ai makrung zawn bawng ring galu kaba hpang wa ai hpun hte bung nga ai.Rawt kaba wa ai makrung ni hpe lata hte daw dat shingna hte kayet daw ai rai yang hpun kasha gaw atsawm sha rawt kaba wa lu na nrai nga ai.

Anhte shinggyim masha shagu gaw tinang a kashu kasha ni nnan kaba wa ai makrung zawn kaba wa ai hpe ra sharawng mu mayu ai ni hkrai rai nga ai.Kaba rawt tsawm wa ai makru tsawm tsawm ni hpe daw hten mat na anhte kadai mung nra sharawng nga ai ga ai.Hpun hta lung kaba wa ai makru nnan tsawm tsawm hpe masha gaw lata hte daw ai,shingna hte kayet daw dat ai rai yang makru daw sat kau ai hte bung chye nga ai.

Dai zawn sha tsawm htap ai makru nnan zawn rai kaba wa ai ma hpe shagrit shanem shadip ai ga si ni hte tsun shaga ai lam gaw ma prat hpe makrung daw kau ya ai hte bung chye nga ai.Nang galaw dat ai dai hku hkrai rai sai,dai sha pyi n galaw chye ai i,anya ai wa lai sai,jai lang nan nmai ai ngu ai shadip shagrit ai ga si ni hpe anhte jahkring hkring na lu na ga ai.Anhte tinang kashu kasha ni a masa lam hpe n gun nlu ai myit,rawt jat galu kaba mayu ai myit ni hte tsun shaga ai ga ni rai nga ai.

Raitim mung dai ga nsen ni hpe na madat ai lang grai law wa jang gaw ma ni a myit hta shanhte hkum shanhte hkrai n gun atsam marai nnga ai masha ngu mu sawn la chye wa nga ai.Jai lang nmai ai masha langai ngu sawn la chye nna myit kaji garen wa chye nga ai.Myit kaji garen ai shaloi gaw hkawm mayu galaw mayu ai myit ni nnga mat chye nga ai.Ngai galaw yang byin na nre ngu ai tinang hkum tinang hkam ai myit ni nnga nrawng ai myit masa lam ni hpe mung byin shangun nga ai.

Tinang hkum tinang kam hpa ai lam nnga ai gaw prat a rawt jat galu kaba lam a matu grai kaba hku pat shingdang ai lam nan rai nga ai.Grau nna gaw ma ni kamhpa shamyet shanat nga ai masha ni hkum nan ma ni hpe shadip shagrit ai lam gaw ma ni a matu sawng dik kaba dik ai akyu njaw ai lam rai nga ai.Hkungga dik kamhpa dik ni dik ai masha langai a shadip shagrit ai  ga gaw ma a myit hpe sung dik,hkra machyi dik ju achyawk hkrum shangun ai alm rai nga ai.

Ma hpe kayet ai lam gaw hkum hta achyang amang re lam byin shangun chye ai zawn ga hte shadip shagrit ai lam gaw ma myit hpe myit ningma lu shangun chye nga ai.Myit masin ningma hpe gaw hkum hta hkap hkang ai amang re zawn dan tawk nmu lu ndawng nga ai.Raitim ma hta myit masin ningma gara hku byin nga ai ngu ai hpe dai ma a tsun shaga galaw sa ai lam hta mu lu nga ai.

Dai zawn myit masin hta ningma hkap hkam sha taw nga ai ma ni gaw myit pyaw ai kum la ni yawm mat chye nga ai.Grau nna gaw shi hpe shagrit dip tsun ai wa a shawng hta grau nna dan dawng na rai nga ai. Bai nna shi hkum shi nkam ai,nkam hpa ai masat kumla ni hpe mu lu na rai nga ai.Galaw ra ai lam langai ngai nga wa jang mung kaga shinggan kaw nna kam hpa ai masha hpe she tam wa chye nga ai.Ngai nchye galaw ai ngu ai lam ni hpe jahkring hkring tsun wa chye nga ai.Langai ngai galaw sana nga jang gaw rai na kun? ngu let tinang hkum tinang nkam myit kabung dum ai lam ni byin chye nga ai.

Daw dan ra ai lam n hta nlu galaw ai,ndai zawn rai yang gaw rai na kun? nga n gup kaw nna jahkring hkring tsun shapraw chye wa ai.Ngai atsam nnga ai ngai jai lang nmai ai ngu myit hta hkap nga ai shingna chyang kaba gaw ma a myit sumru myit ningchyan shaw ai lam shagu hta shi hpe ka up kau chye nga ai.Dai zawn jahten sharun chye ai masa lawm ai shingna chyang kaba a ka up ai majaw mi kaw nna nga ai atsam marai ni mung mat wa chye nga ai.Hpa atsam marai hpe mung shapraw n gwi mat na rai nga ai.

Kalang mi hta kanu langai gaw shi a kasha num sha a ntsa galaw mung shagrit shanem shadip ai ningmu hte sha mu chye nna shadip shagrit ai ga ni hpe sha tsun chye ai.Dai rai yang shi a kasha mung hpa atsam marai nnga ai masha langai zawn shi hkum shi mu let kaba wa ai.Shi kasha hpe shat shadu shangun yang shat di hta hka kade bang ra ai hpe shi hkrai shi  daw dan n gwi mat sai.Kanu hpe san ai kanu tsun ai hte maren sha hka bang nna dai daram rai sai kun?ngu kanu hpe sa madun ai.Daw dan ra ai madang shagu hta kanu a garum ya ai hpe la ra nga sai.

Hpa hpe mung hkum nan daw dan lu ai atsam nnga mat sai.Dai zawn madang shagun hta kanu a daw dan ai hpe la ra nga ai hta  kanu gaw nang dai daram sha pyi nlu daw dan jang na prat hpe gara hku gawgap la na law ngu shadip shagrit ai ga hpe bai tsun dat ai.Anhte kalang marang ma ni gaw myit atsang awang rai nna kanu a shingdu hta langai ngai hpe hkrak galaw taw ai hpe kanu mu jang kanu kaw nna shakawn shagrau na malai u myi pai salip hkrup kade daram hkam na kun yu yu ga ngu shadip ai ga  bai tsun ai.

Dai rai yang ma gaw hpa baw byin wa na rai tai?tinang hkum tinang kamhpa mayu ai myit ni nnga mat sai.Hkum nan mung daw dan nchye mat sai.Hkum nan hpabaw atsam nga ai,hpabaw hpe myit shang sha myit lawm ai hpe daw dan nlu mat nga ai.Manaw manang ni kaga hpe ni hpe kam hpa ai lam gaw grai shalai wa chye nga ai.Tinang a atsam marai hte daw dan lu mat nna manang ni galaw ai kaw sha hpang hkan nang wa ai.Aw ra zawn zawn le ra zawn zawn mi na shara kaw nna gara de mung nlung mat chye nga ai.

Dai rai yang kanu gaw ngai shaduk ai hte hkrak sha re,nang gaw shawng de nhkawm ai sha n ga hpang de she htingnut mat nga ai.Na a prat nang gara hku nna gawp gap na ngu ai hpe ngai myit pyi nmyit lu mat sai ngu shadip ai ga hpe bai tsun dat ai.Ma ya na zawn byin ai lam shi a majaw ngu ai hpe kanu gaw chye na masa nnga ai.

Byin mayu ai lam nbyin shagu shadip shagrit nna tsun ding yang byin shangun mayu ai hte grau nna tsan wa shangun nga ai.Dai zawn byin taw nga ai hpe kanu gaw ma anya ai majaw ngu sawn hkam la nga ai.Kaja wa nga yang ma galaw ai lam ni shut ai hta hkan nna kanu tsun ai shadip shagrit ai ga ni a majaw rai ngai.Ma shut ai hpe nchye na ya ai kanu kawa,hkum nan kaji ten hta shut lai wa sai hpe malap kau ai kanu kawa,ma ni a ntsa nga ai hta grau nna byin shangun mayu ai myit rawng ai kanu kawa ni hta dai zawn shagrit shadip ai nsen ni pru chye nga ai.Hkum shan machyi hkra shingna hte kayet ai hta n gup hte shadip ai shanem ai ga gaw grau nna machyi hkrum nga ai.

Ndai lam ni hpe ma ni hte law law lang magam bungli galaw yu sai ni tsun dan ai hku nna chye la lu ai lam rai nga ai.Shadip shagrit ai ga hte tinang hkum kamhpa manu shadan chye  ai lam gaw tsep kawp nan shai hkai ai lam rai nga ai.

Tinang hkum tinang kamhpa manu shadan ai lam gaw asak aprat nla lata galoi ten raitim shaman shakyang ya lu ai raitim ningpawt ninghpang hpe kaji ai ten hta hpang ya ra ai.Dai re majaw ma kaji ni hta tinang hkum tinang kamhpa manu shadan chye ai myit ni ru jawng hkap wa hkra shadip shagrit ai ga ni hpe ntsun ya na ahkyak ng ai.Shadip shagrit ai ga ni ntsun ai sha ma ni a galaw lu ai atsam marai ni hpe masat masa galaw ya na ahkyak nga ai .Dai re majaw tsawra hkungga ai kanu kawa ni a ma ni hpe kaja wa tsawra ai rai yang ma ni hpe shadip shagrit  shanem ai lam hpe koi gam nga ga law..

 

Add new comment

5 + 14 =