Ma Ni Hpe Shut Ai Kaw Nna Kasi La Let Sharai La Ra Ai Lam Sharin Ya Ga

           Tsawra ai hkungga ai nu wa hpu nau ni mungkan hta loi dik bungli gaw mara tsun shagun ai lam rai nna yak dik bungli gaw n gun jaw garum shingtau ai lam re nga tsun ma ai.

          Anhte shinggyim masha shagu gaw shut chye ai ni hkrai rai nga ai,raitim dai shut ai lam hpe hpang de nbyin hkra kasi  la ra nga ai,kaning re ai kasi la na ngu ai hpe gaw anhte masha shagu gaw nchye ai.Shut ai lam kaw nna kasi la ai ladat ni hpe kaji ten kaw nna anhte kanu kawa ni sharin ya ra ai.

          Anhte kanu kawa ni gaw kashu kasha ni hpe nmai shut ai ngu sha tsun chye ai.Shut wa yang pawt na daru na mara shagun na mara dam jaw na nga jang anhte a kashu kasha ni gaw shut ai hpe hkrit wa ai sha byin wa nna prat hta tsun gwi galaw gwi ai myit rawng na matu yak wa nna,kam sham ai lam nnga ai sha kaba wa chye nga ai.

          Dai hku nbyin shangun mayu jang gaw kashu kasha ni hpe shut ai ten mara shagun ai hta n gun jaw garum shingtau lam galaw nna, shut ai kaw nna kasi la chye hkra sharin ya lam madun ya ra ai.

          Raitim anhte shinggyim uhpung uhpawng ngu ai hta kanu kawa ngu ai gaw up hkang ai wa re majaw gumshen magam lang ai ni law nga ai.Dai re majaw kashu kasha ni hpe tsawra ai hta hkrit ai myit hte up hkang ai law nga ai.

          Dai lai ladat ni gaw kashu kasha ni hpe ra ai hta grau nna mara shagun tsun ai lam ni byin shangun nga ai hpe myit yu mai nga ai.Anhte nkau kanu kawa ni gaw ma lama mi shut sai nga jang nang gaw ya bai galaw dat sai ngai hpe jam jau jaw nhkru shi ai i? nga pawt tsun chye ga ai.Dai hku tsun dat ai majaw ma myit hkra machyi chye nga ai.

           Kaja wa nga jang Ma shut ai nga jang kanu kawa ni a n gup kaw na mara shagun ai dam jaw ai lam ni n galaw ai sha dai shut ai lam ga hpa majaw byin ai,shut ai lam nbyin hkra gara hku galaw yang mai ai ngu ai lam ni hpe myit galu hte tsun sharin yang grau nna kaja na re ngu mu mada ai.

         Dai zawn sha Ma nkam sha ai malu masha hpe ma ja jaw sha ai, n sha jang n tsawra ai ngu tsun na hta shi nkam sha ai malu masha hpe shi sha mayu wa hkra tsun jaw sha ai lam gaw grau nna kaja nga ai.

        Ndai hku nre ai sha hpa nchye na ai ma hpe mara shagun ai,shingjut shanawng chye ai ga ni hte tsun ai,ntsawra ai ngu ai hte jahkrit ai,hkrit hkra galaw ai,shagrit shanem ai ga ni gaw ma ni a matu kade daram myit hkra machyi hkrum ai hpe hkam sha yu ai ni yawng chye na ga ai.

        Dai majaw Ma nkau ni gaw shanhte hpa byin byin kanu kawa hpe ntsun ai sha shanhte hkrai mayun hparan ai,hkam sha ai lam ni byin wa chye nga ai.Dai mung shanhte shut wa shagu kanu kawa ni gaw mara shagun ai n ngut chye hkra tsun taw nga ai,kahpu kanau lapran shagrit tsun ai lam ni gaw Ma ni hpang kalang nga jang kanu kawa hpe ntsun mat sai.

        Asak ram kaba wa ai ten hta mung shanhte myit hta kanu kawa hpe tsun yang garum ya na hta mara shagun na grau law ai,kaya hkrum na grau law ai,dai nga jang manghkang hparan na hta myit grau hkret shangun ai hpe chye wa jang kanu kawa hpe galoi mung ntsun sai.Tinang kasha shut ai lam langai hpe galaw hkrup sai.

        Dai shut ai lam hpe kanu kawa hpe ntsun gwi sai nga jang dai gaw kashu kasha ni a ra rawng ai lam nrai sai.Kanu kawa ni a up hkang woi awn lam ladat jaw na ra ai majaw rai nga ai. “Prat hta nshut ai masha nnga ai,shut ai masha shagu gaw awng dang ai nrai nga ai,raitim mung awng dang ai masha shagu gaw shut ai kaw nna kasi la lu ai ni rai nga ai.

        Hpang de shut na hpe nhkrit ga shut ai hpe hkrum wa shagu dai kaw nna kasi nla lu na hpe sha tsang ra ai ngu sharin shaga ra ai. Anhte nkau kanu kawa ni tsun ai nshut hkra nga u da,nshut hkra nga ai gaw hpa mung hkum galaw ngu ai hte  bung nga ai.Hpa mung n galaw jang shut ai mung nnga ai zawn,gwi gwi daw dan galaw lam nnga jang shut ai mung nnga ai dai rai jang dai masha gaw hpa nnga ai masha byin wa na rai nga ai.

        Dai re majaw tsawra hkungga ai nu wa ni e kashu kasha ni a shut ai lam hpe kanu kawa ni hku nna ndai gaw shanhte a  matu sharin la lam langai re ngu hkap la ra ai.Shut taw nga ai Ma hpe mara shangun na hta grau nna masan sa ai gaw n gun jaw garum ai ,shut ai hpe hkum galaw ngu na hta shut ai kaw nna kasi la chye ai kashu kasha ni byin tai wa lu hkra sharin ya ga law.

 

 

By; John Mung Hkrang

 

 

Add new comment

3 + 4 =