Ma ni hpe shanhte myit dawdan ra wa ai ten hta anhte kanu kawa ni sharin ya ra ai lam ni

Tsawra ai nu wa ni anhte mungdan shinggyim uhpung hta Ma ni gaw masha kaba kanu kawa ni a ga madat ra ai.Kanu Kawa daw dan ai hpe hkan nang ra ai,Ma hpe shanhte myit hte dawdan nshangun chye ai lam ni a majaw Ma ni gaw Kanu Kawa hta grai nan shamyet shanat ra wa nna  amu lam langai ngai nga jang dawdan  n gwi nchye wa ail.

Kanu kawa ni nlawm yang tinang a dawdan ai lam hpe nkam wa ai lam ni nga wa chye ai re.Ndai zawn kanu kawa nlawm ai sha n gun dawdan ai Ma  ni gaw asak aprat ram wa ai ten magam bungli shang galaw wa ten ni hta tinang a dawdan ai lam hpe kaga masha wa kaw garum hpyi ra ai.

Ndai zawn lam mi nga jang gwi gwi ndawdan lu wa ai lam ni gaw shanhte a prat hta lai kyang tai wa na sha rai nga ai.Dai zawn sha tinang hkum tinang hkam hpa ai lam nnga ai prat hta bungli lam hta awng dang gring ai daram nlu awng dang wa chye nga ai.Kaji ai ten kaw nna kanu kawa dawdan na ahkang jaw da ai Ma ni gaw tinang hkawm mayu ai lam hpe atsawm kaja ai hku lata lu nna prat hta awng dang ai lam hpe lu la nga ai re.

Dai majaw anhte kanu kawa ni kaw nna Ma ni hpe kaji ai ten kaw nna dawdan chye na matu garum la ra nga ga ai re.Hkrak kaja ai lam hpe gara hku dawdan ra ai hpe chye ai Ma ni hta ningtawn ai lam law law nga ai re.Kaja ai hpe dawdan kung kyang ai lam gaw lit la ai lam, tinang hkum tinang kamhpa lu ai lam hte up hkang lu ai lam ni hpe  sharawt ya lu nga ai.

Ndai lam ni gaw Ma ni a matu prat manu dan ai atsam marai ningja ni rai nga ai re.Tinang hkum tinang hting hkang lu na matu gaw gara hku dawdan na ngu ai lam hpe chye na matu gaw Ma ni hta grai ahkyak nga ai.

Dawdan na matu Ma ni hpe sharin ai ten hta Ma gaw manghkang hpe atsawm hkrak hparan chye wa ai.Dai hta grau nna Ma gaw kaga ni a garum ya ai lam nnga tim tinang hkum nan galaw lu ai atsam nga wa na sha rai nga ai.

Anhte Kanu Kawa ni gaw tinang a kashu kasha ni hpe atsam marai rawng ni,wanglu wanglang shanglawt lu ai ni,tinang galaw ai hpe tinang lit la chye ai ni byin shangun mayu ai hkrai rai na re.Raitim ndai atsam marai ni gaw shi hkrai shi pru wa ai lam nrai nga ai.

Ndai lam ni gaw kanu kawa ni kaw nna lam ladat amyu myu   hku nna sharin ya galaw shaman ya ra ai atsam ni rai nga ai.Ma ni gaw shanhte hkum shanhte up hkang hparan a ahkang lu mat jang shanhte hta tinang hkum tinang hkungga ai,kamhpa ai ni nga wa na rai nga ai .

Manghkang ni hpe hparan lajang wa ai ten hta shut ai hpe galaw hkrup na hpe nau hkrit mat na rai nna gara mahtang shanhte a matu kaja dik hpa majaw ngu ai lam ni hpe chye na wa lu na rai nga ai.

Daw dan ai lam atsawm jahkret chye na matu Ma ni hpe sharin na shaloi shanhte a asak aprat hte shingdaw sharin na matu ahkyak nga ai.Dai zawn sha shanhte hpe ga shadawn kaja ni hte shingdaw tsun sang lang dang chye na matu mung ahkyak nga ga ai re.

Dai majaw Kanu Kawa ni Ma ni hpe sharin shaga ai shaloi jai lang ai lam nkau ni hpe gam garan ya na nngai.Ma ni hpe bungli lit magam ni hpe jaw ra ai.Shanhte a asak aprat galu kaba ai lam madang hta hkan nna Ma ni bungli lit magam nkau hpe lit jaw mai nga ai.

Ga shadawn shanhte shinggan pru hkawm ai shaloi bu hpun palawng gara hku bu hpun ra ai hpe shanhte hpe daw dan shangun ai,sumla ni hpe la kau ai hte shanhte a yup ra hpa atsawm sha kahtap shangun ai zawn re ni hpe lit jaw mai nga ia re.

Ma ni hpe shanhte hkum nan galaw na ahkang jaw ai lam galaw ra nga ga ai.Galaw ra ai masa lam hpe shanhte hpe atsawm sanglang dan ngut jang Ma hpe hkum nan langai sha shakut galaw ai ahkaw ahkang lam hpaw ya ra ai.

Anhte Kanu Kawa ni hku nna,makau kaw nna ra ram ai daram yu ya na ra ai.Ma ni shanhte gaw garum na matu garum hpyi wa ai ten shing nrai shanhte hkrai nlu galaw wa ai ten hta she garum ya yang kaja ai.

Ga shadawn Mawdaw sumla langai mari wa ai shaloi ndai Mawdaw sumla gaw gara hku bungli galaw ai ngu ai hpe shanhte hpe hkrai tam galaw shangun ra ai.Bai nna Shanhte hpe atsawm asan sha tsun shapraw chye na matu sharin ya ra ai.

Ga shaga sharin taw nga ai Ma ni a matu gaw shanhte hpe gara hku nna hpyi ngu ai lam hpe sharin ya ra nga ai.Ga shadawn Hka hpang gara ai rai yang Hka lu na ngu tsun chye hkra sharin ya ra ai.Dai zawn sha Nam dum sa na ra ai shaloi shing nrai machyi hkrum ai ten gara hku machyi ai ngu ai hpe madun dan chye hkra galaw ya ra ai.

Shanhte ra ai lam langai ngai nga wa  ai shaloi shanhte hkum nan asan hkyak tsun chye na matu Ma hpe n gun jaw ai Ma a Ga shaga kung kyang ai lam bawngring wa na matu garum ya ra ai.

Shawng nnan gaw shanhte hpe sharin ya ra ahkyak nna langai ngai hpe law law lang jaw kaja ai masa hku nna jahkring hkring san na matu ahkyak nga ai re.Bai nna myit sawn sumru na matu shanhte hpe challenge dahkat ai lam galaw shangun ra ai.

Anhte a Ma ni hpe kaja ai dawdan lam hpe sharin ya ai ten ginsup ai ten gaw grai ahkyak nga ai.Ga shadawn lata lahkawng hta nbung ai gasup hpan sumla langai hpe lata shangun nna dai lata ai hta Ma kaja hkum nan ra ai hpe lata shangun ra ai.Ma gara hpe ra ai,gara mahtang kaja dik ngu shadu ai rai ngu san ra ai ndai lamg aw shanhte dawdan ai lam hte seng nna myit shangun ai lam rai nga ai.

Dai ten Ma dawdan ai lam gaw anhte myit mada ai lam hku nrai wa yang,shanhte dawdan ai lam shut wa yang kalang ta shut ai hpe sharai ya na matu nmai tin ai.Shawng nnan shanhte a shut ai lam hpe atsawm sha tsun dan ra ai.Ndai gaw shut ai lam hte chyam yu ai bungli langai re hpe sadi jaw ra nga ai.

Rawt jat bawngring na matu hte sharin la na amtu sim sa makau hkrup yin hta gara hku nna garan gachyan na gara hku sawn na ngu ai lam hpe anthe atsawm sha chye ra ai.Dai re majaw anhte kashu kasha ni tinang hkum tinang kamhpa shamyet shanat let kaja ai lam hta daw dan lata sa wa lu hkra sharin ya ga law.

By: Mung Hkrang