MA NI HPE LAIKA HTI DAN GA

Megan ngu ai kanu langai tinang a ma ni hpe naw kaji ai kaw nna laika hti dan ai marang e ma ni akyu chyeju kaba hkam sha ai lam video hta hkai dan ai hpe gam karan mayu ai.  Megan gaw tsirung kaw kasha alat hpe shangai la nna nta bai du wa ai aten kaw nna ma hpe laika hti dan hpang wa ai.  Hpa n chye shi ai ma hpe wa laika hti dan ai i, nga masha ni mau ma ai.  Megan mung shi manang langai mi dai zawn galaw ai hpe hkan galaw ai re, nga tsun ai.  Dai hta grau mau na zawn nga ai hpe mung shi tsun ai gaw, hkritung na ma pyi hti dan mai ai.  Hpa majaw nga yang, kanu a hkritung na ma ni gaw kanu yan kawa a nsen hpe na nna, chye ginhka ai, ngu ai lam re.

Ma ni hpe maumwi hti dan na ahkyak nga ai, da.  Hpa majaw nga yang, ma ni gaw kanu hti dan ai hpe na jang, shanhte a bawnu shamu shamawt bungli galaw hpang wa nna shanhte na ai ga hkum ni a lachum ni hpe chye na hpang wa ai.   Dai hta n ga, kaga magam bungli ni hpe galaw lu ai bawnu a atsam ni mung bawng ring wa ai.   Hti dan ai hpe madat ai ma ni hkam la lu ai akyu ni law nga ai lam lawu de na hte maren tsun dan ai.

1. Hti dan ai maumwi hta myit lawm myit jung wa nna mai kaja ai myit masin lai kyang ni hpe marawp la lu ai.
2. Myit n bra na matu bawnu hpe shaman shakyang ya ai.
3. Hti dan ai laika hta sumla lawm yang, ma hpe grau myit lawm shangun ai. Na hte na ai hpe myi hte mung lang ta mu lu ai shaloi grau chye na wa ai. Na ai hte mu ai shada ma hpe jawm shakung shazet ya lu ai.
4. Laika hti dan ai kanu hte shi hpe madat ai ma a lapran sindun sumri ngang kang wa ai.Kanu hpe kam ai myit nga wa ai zawn ma gaw tinang hkum hpe mung manu shadan chye nna kam wa ai.
5. Hti dan ai maumwi hta ga hkum langai ngai hpe ma n chye na nga ai hpe kanu mu jang, hkring nna sanglang dan lu ai.Ma garai n mu yu ai arung arai, garai n na yu ai dusat, garai n hkrum yu ai masha hpan, ndai zawn re ai lam ni hti dan ai laika hta rawng yang kanu gaw atsawm sha tsun dan lu ai.
6. Kanu tsun sanglang dan ai shaloi ma gaw yat yat chye na jat wa nna machye machyang hka-ja la lu ai atsam lani hte lani rawt jat wa ai.
7. Ya na zawn ma ni hpe laika hti dan ai gaw ma ni hpe chyu sha video yu shangun ai hta grau akyu jaw nga ai.Video hta mu lu ai lam ni gaw waw kap le kap rai nna galai mat wa lawan nga ai majaw ma ni aloi sha n chye na ma ai.Kabu gummlawt ai, yawn hkyen ai, masin pawt ai, matsan dum ai, ndai zawn re ai myit hta hkam sha lam ni mung hpring chyat ai nga ai. Dai lam ni gara gaw n hpru n mai nna koi kau ra ai, gara gaw mai kaja nna hkan sa mai ai, ngu ai hpe tsun hparan dan ai masha kaba n dung lawm yang, ma ni n chye ginhka la lu ai.Dai majaw, shanhte a prat hta hpa lam hpe madung da nna sak hkrung shamu shamawt na, kaning re ai myit masa kyang lailen hte hkawm sa na, gara de man yawng nna hkawm sa wa na, ngu ai lam ni myit hta n hkawn ai majaw wam wam dam dam rai chye nga ai.
8. Shing rai, ma ni video yu ai shaloi kanu kwa ni mung rau yu ai gaw ma ni hpe sharin shaga, tsun sanglang dan lu ai ahkaw ahkang kaba rai nga ai. Aten hpe n lahpawt dum ai sha, shanhte hpe lam madun la na aten jaw ai gaw, ma ni a asak apart akri rawng ai prat rai u ga, arang gaw de ya ai rai nga ai.

Megan tsun ai hta, grai manu dan ai lam langai bai lawm ai.  Naw kaji ai ma ni hpe laika hti dan ai ngu yang, ya shanhte kaba ma satim, shannu wa ni laika jawm hti ai aten naw san da ma ai, da.  Dai gaw shanhte shani shagu galaw ai bungli lamang langai tai nga sai, nga nna, myit dik ai hte tsun ai.  Hpa majaw myit dik ai kun, san yang, shani shagu laika jawm hti ai ten hta, shannu wa ni rau hpawng nga lu nna shada da grau hkau chyap wa ai, shada da a lam grau chye na wa ai, shada myit tau ya chye wa ai, shada hkungga manu shadan chye wa ai, si mani ai hku tsun shaga kanawn mazum chye wa ai lam ni tsun ai. Dai hta n ga, da, hti ai kaw na lam ni hpe jawm maram dinglik yu ai marang e hpaji hte machye machyang mung grau hkum tsup wa nna shanhte a myit dabang mungkan madang kaw du hkra hpaw malang dam lada wa nga ai lam tsun ai.

Ngai bai maram yu yang mung, shannu wa ni a kun dinghku hta myit ru yawn hkyen mayak manghkang lam ni n nga gaw n rai na re. Raitim dai lam ni hpe galu kaba ai myit hte Karai Kasang a mungga hta shamyet nna jawm hparan la chye ai ngwi pyaw ai dinghku rai na re.  Hpa majaw nga yang, shanhte a shani shagu na bungli lamang ni hta, laika hti ai lamang sha n rai, akyu hpyi nawku ai hte Karai Kasang a mungga hti aru yu ai lamang mung teng sha lawm nga na majaw re.  Megan shannu wa ni hpe chyeju dum let shanhte a lam ndai hte wa gam karan dat lu ai law.  Ngai ka ai hta shut ai lam ni, n hkum tsum tsup ai lam ni, nga na re majaw, yu sharai la lu na matu video shalawm dat lu nngai rai.  

By; Wa Saradaw Paul Zinghtung Grawng