Ma Ni Hpe Kam Ga,Mara N Shagun Shi Yang Shawng Madat Ya Ga

Anhte kanu kawa ni gaw kashu kasha ni hpe mara shagun ai,kahpu gaw kana gaw kanau ni hpe mara shagun ai,Sara/num ni hpe jawng up wa mara shagun ai,Sara/num ni gaw jawng ma ni hpe mara shagun ai.Dai zawn sha lai len langai hku nna ntsa kaw na ni gaw npu na ni hpe mara shagun ai lam ni nga ai zawn lawu na masha ni mung shingdaw shinggan de shatan nhkan tsun mara shagun ai lam gaw nga chye nga ai.Langai hte langai mara shagun ai lai len htung hte anhte ni gaw kaba wa nga ga ai.

Anhte ni mung kaga masha wa a mara shagun ai lam hpe law law hkam la ga na ga ai.Dai rai yang gaw anhte gaw mara shagun ai lam hta sha gayin shinggrup nga ga ai.Dai majaw anhte mung mara shagun chye ai wa langai anhte byin wa ga ai.Kalang mi hta kanu langai gaw shi nkaja ai lai kyang hpe galai shai na matu myit daw dan lu ai lam langai nga ai da.Dai gaw tsang (10) daram re ai kasha la kasha hpe shi a manaw mang ni hte jawng kaw ga li ga law ninggyet hkat ai majaw rung gaw de shaga dat hkrum ai da.

Dai ten shi chye dat ai gaw mau ai hte kasha hpe myit htum ai hte rau pawt  daru kau dat ai da.Raitim shana yup ni mahka atsawm sha re ai ten myit sumru lu ai gaw ngai ya na zawn kasha hpe mara shagun masin pawt daru dat ai gaw kaja jaw ai masa lam gaw rai nga ai kun?ngai gaw kasha a masha masin pawt singdawng ai hte kasha hpe daru marawn kau ai lam gaw kasha hta byin taw nga ai hkrum sha nga ai kaja mabyin hpe ngai chye ai kun?nga tinang hkum tinang bai sumru san yu ai da.

Kaja wa nga yang kasha a ga hpe shawng madat ya ra ai,kasha hpe tsun shaga na ahkang njaw ai sha masin pawt nna mara shagun ai lam gaw kaja dik hparan ai ladat nre ai hpe kanu gaw chye myit la mat ai.Ma ni a matu nmyit ai sha tinang masin pawt ai majaw masin pawt ai myit ni hte ma a ntsa pawt marawn ai lam galaw hkrup lam hpe myit dum chye la lu ai da.

Kaja wa nga yang anhte kanu kawa ni sara/num ni kaw nna byin gring ai gaw anhte kashu kasha ni langai ngai hta njaw ai lam hta rai rai galaw hkrup ai mi rai rai,shut ai lam hpe galaw hkrup ai mi rai rai tinang a masin pawt sindawng kapaw kau na matu shawng nmyit ga.Shanhte a mabyin ai lam hpe shawng chye na hkra madat ya ga.

Shanhte hpe mara shagun pawt daru ai lam n galaw shi yang shawng nnan shanhte tsun ai ga hpe madat ya yang grau kaja ai.Dai hpang shanhte tsun ai jaw ai kun njaw ai kun sagawn yu ga.Dai hku n galaw ai sha pawt marawn hta ai hpe shawng galaw ai majaw ma gaw shut yang mung pawt katut tinang maga kaja hkra nga ai raitim pawt katut ai ngu a myit masa rawng mai nna kaja ai myit masa ni mat wa chye nga ai re.

Anhte nkau kanu kawa ni gaw ladu shalai pawt hta mara shagun ai majaw da sang galaw chye wa ai majaw grau sawng ai madang de du mat chye nga ai.Dai majaw dai hku galaw ai lam hpe san na shanhte a ga nsen hpe madat nna mahtai tam ra ai ngu mu mada ai.Anhte kun dinghku dum nta kata hta mara shagun ai lam hta bawngban ai hpaji jaw ai  n gun jaw ai lam hpe grau nna galaw yang gaw grau kaja nga ai.

Anhte ma ni hpe pawt marawn ai mara shagun ai hta  anhte kanu kawa ni kaw nna myit galu hte tsun sanglang dan let sharin shaga ai gaw grau nna kaja nga ai.Bai nna ndai zawn galaw ai gaw shanhte a matu grau nna kaja ai mahtai hpe lu la shangun chye nga ai.Dai zawn galaw ai majaw ma ni gaw kamhpa myit grau rawng wa na,shanhte hpa lam hpe raitim kanu kawa hte bawngban ai rai yang lu ai ngu ai myit masa ni rawng wa ai shaloi anhte kanu kawa ni hte bawngban jahkrup ai kyang lai len ni shanhte hta rawng wa na sha rai nga ai.

Dai lai kyang hte chye ai lam gaw anhte kanu kawa ni a matu mung kashu kasha ni a matu mung grau nna kaja nga ai re.Dai majaw ma ni hte seng wa jang mara shagun na malai shanhte tsun ai gaw hpe shawng madat ya ai gaw grau kaja nga ai.Shanhte byin mayu ai lam hte tinang byin shangun mayu ai lam ni hpe bawngban yu ai,ngut nna shanhte hpe kam ya ai.N gun jaw ai,ra wa jang garum ya ai lam galaw ya ga.

Tinang hkum kamhpa ai lam nga ai  ma ni hku nna sak hkrung hkawm sa shangun lu nga ai.

Kaja wa nga jang masha ni hpe galai shai lu shangun ai gaw masin pawt mara shagun ai lam nrai nga ai.Kam ai lam,n gun jaw garum ya ai lam hte shakawn shagrau ai lam sha galai shai lam hpe lu shangun  nga ai.

Dai lai kyang ni hpe kalang ta rawt galaw gaw nlu nga ai.Shani shagu hta lai len byin wa hkra galaw let dai n kaja ai lai kyang ni hpe mat wa hkra kaja wa nan galai shai lu ai ten du hkra kaja ai lai kyang hku nna jung wa lu hkra anhte a kashu kasha ma ni hpe pawnba bau maka na ahkyak nga ai.

Anhte a kashu kasha mi rai rai kaga kadai a kashu kasha ni hpe mi rai rai langai ngai shut wa sai nga jang shanhte a ga hpe shawng mada ya ga.Ngut ai hpang she n gun jaw ai kam ya ai lam ni hpe ma ni a myit ningma nkap hkra tinang hkum tinang kam hpa lu ai ma ni hku nna kaba wa lu na matu anhte kanu kawa ni yawng jawm shakut sa wa ga law.