Ma La Kasha lu da ai kawa ni chye da gring ai lam

google photo

Tsawra ai kun dinghku kawa la ni anhte kawa ni law malawng gaw amyu ru sai a matu,tinang a hkring htawng dagraw na matu kasha la sha lu mayu ra ai ni hkrai rai na ga ai.

Dai rai yang anhte kawa ni hku nna tinang kasha la kasha ni hpe tsun sharin shaga kanawn mazum ai lam hta grai sadi ahkyak shatai pawnba na grai ahkyak nga ga ai.Anhte kasha la kasha ni gaw myit masa lam hta grai dan leng nga ma ai. Shuk shuk shak shak re ai lam hpe mung nra ma ai.Dum nta hta kanu hte kawa a kanawn mazum lam gaw shim lum nga ai.Langai hte langai chye na ya ai lam ni nga ma ai.

Kawa hte kasha (la) a lapran na kanawn mazum lam gaw shangai chyinghkai ai ten hte naw kaji ai ten hta gaw shim lum ai raitim kasha (la) gau ngwi ngwi kaba wa chye na wa ai ten ni hta gaw kawa hte kasha a kanawn mazum lam gaw loi mi tsan wa chye nga ai.Dai zawn byin wa jang gaw kawa ni tsun sharin shaga ai lam ni law law hpe kanu ni hpe ap kau chye ga ai.Anhte kawa la ni gaw kasha (la) ni a nkau masa lam ni,manghkang lam nkau ni hpe gaw kanu hta grau nna kawa ni kaw nna tsun sharin shaga gring ga ai.

Anhte kanu ni kaw nna kasha (la) a ntsa tsawra ai zawn kawa ni kaw nna ahkyak la pawnba tsawra ai hpe mung ra nga ma ai re.Kawa ni hku nna kasha (la) ni hpe lahku lamai galaw ya  ai lam gaw kawa hte kasha a lapran na ninghpawt matut mahkai lam rai nga ai.

Hpaji lam hta jawng kaw nna sharin dat ya ai hpaji ni sha n ga,makau grup yin hte kanawn mazum lam ni ra ai hpe kawa ni kaw nna sharin ya ra ai.Shut ai lam hpe galaw hkrup ai ten ni hta mung shing nrai dakan ra ai lam ni hte hkrum wa ai ten ni hta gara hku nna lit la hparan ra ai ngu ai lam ni hpe sharin ya ra nga  ai.

Bai nna anhte kawa la ni law malawng gaw kun dinghku hpe woi awn taw nga ai ni hkrai rai nga ai.Dai majaw anhte kawa la ni  kun dinghku atsawm sha woi awn lu ai gaw kasha ni a matu hkungga kamhpa mayu ai myit ni grau nna law jat wa shangun nga ai.Mare buga nawku hpung lam hkan woi awn ai ningbaw kaja langai hku nga ai gaw kasha (la) ni a matu arawng la yu n gun lu shangun ga ai.

Bai nna tsawra ai kawa la ni anhte kawa ni hku nna kasha (la) ni hpe jahkring hkring kumhpa mari ya ai,ra ai hpe hkan mari ya ai ni hpe mung galaw ya ra ai.Grau nna  gaw kasha ni ra ai ginsup hpa sumla ni hkan lata mara ya ai zawn re ai ni hpe mung galaw ya mai nga ai.

Tsawra ai kawa  ni anhte kasha (la) ni hpe shanhte myit lawm myit shang sha ai lam ni hpe wanglu wanglang lata na ahkang mung jaw ga.Anhte kawa ni hku nna tinang a kasha ni hpe tinang byin mayu ai lam ni hpe galaw shangun na malai shanhte byin mayu ai lam ni hpe ladat kaja ai lam hku nna matsun madun ya gaw grau nna kasha hte kawa a lapran kanawn mazum lam grau nna kaja shangun nga ai.Bai nna gaw kasha langai langai hpe awng dang ai hku nna galaw lu ai ten ni hta kawa hku nna arawng la kabu ai hte shakawn shagrau ra nga ai.Nchye ai zawn rai nna myit kraw kata kaw nna sha kabu ai hpe koi gam yang grau kaja nga ai.

Anhte kasha ni shut ai lam hpe galaw hkrup ai ten ni hta pawt marawn ai jahkrit shama ai matsa ai lam ni n galaw ai sha lam kaja hpe atsawm ngu lam madun ya na gaw anhte kawa ni a lit rai nga ai.

( Ngam nga ai daw hpe du lamang hta bai matut gam garan ya na ga ai.)

 

Add new comment

1 + 2 =