Lu Ai Hte Hta Myit Dik Chye Ya Ai ( 14.6.2020 )

Shinggyim masha ni a myit ra lam hpe nat pyi ndang hkan lu ai nga  ga malai nga ai hte maren, masha hkum shagu gaw lam shagu hta galoi mung tinang lu ai hta sha myit dik lam nnga ai.  Dai majaw lu ai hta grau lu hkra, awng dang ai hta grau awng dang wa lu hkra nga nna, myit hpe da ting let, shakut shaja ai ni hkrai sha rai nga ai. Ndai zawn shakut chye myit masin gaw grai kaja ai lam rai nga ai. Hpa majaw nga yang, awng dang ai lam a n-pawt mung shakut ai lam rai nga ai. Raitimung shakut nna hkam la lu lam hta ndai gaw Karai Kasang ngai hpe jaw ai chyeju atsam hte lu la ai ngu myit dik myit pyaw let, hkam la chye ra ai. Shaloi she myit pyaw lam lu na rai nga ai.

Masha law malawng gaw lam shagu hta myit dik ai lam nlu la ai, hpa majaw nga yang lu ai hta grau lu hkra nga, masha hpe shingjawng let, shakut ai, shi hta ngai grau lu grua byin hkra nga shakut ai. Ndai zawn kade shakut tim shi zawn nbyim wa shi hta grau n awng dang wa ai shaloi myit npyaw wa nna tinang lu ai hta, myit ndik chye ai. Dai majaw shakut ai shaloi masha ni hpe hpaji yu la nna shakut ai rai yang sha kaja ai, . Shanhte hpe yu la nna, shan hte hta grau hkra ngu shingjawng ai myit hte shakut ai gaw nkaja ai re, Hpa majaw nga yang masha hpe, shing jawng ai myit hte shakut ia shaloi gaw kade shakut ai raitim shi hpe ndep, shi hta grau nbyim wa ai shaloi gaw tinang hkum tinang myit kaji wa ai, ngai gaw grai anya ai masha manu ndan ai wa re nga hkap la wa chye ai myit npyaw lam sha pru wa ai hpang, jahtum hpa mung nkam galaw myit daw mat wa chye nga ai, dai majaw tinang hta grau chye grau byim ai ni kaw hpaji yu la let ngai ma shi zawn byim hkra awng dang hkra ngu myit hte, shakut chye ra ai, shaloi she shakut nna lu la ai hta hkap la lu nna myit pyaw lam lu la na rai nga ai.

Karai Kasang masha langai hte langai hpe jaw tawn da ai shaman  chyeju nbung hkat ai re. Dai majaw langai hte langai chye ningtawn awng dang ai lam ni mung nbung nga ai shi hta nga ai chyeju ngai hta nlu ai zawn ngai hta lu ai shaman chyeju ma shi kaw n nga ai tinang hpe Karai Kasang jaw da ai shaman chyeju hpe tinang ndum nchye ai shaloi gaw masha ni lu ai shaman chyeju hpe sha mu n na, myit npyaw ai Ga sadawn -  Manang wa mahkawn grai chye hkawn ai mahku nsen grai pyaw ai hpe sha mu nna, tinang gaw shi zawn nbyim ai majaw shi byim ai hpe mu ai shloi tinang gaw myit npyaw myit kaji chye ai. Raitim, Karai Kasang tinang hpe kadai hte nbung ai Shaman chyeju jaw da ai hpe galoi mung malap chye nga ai. Karai Kasang mung lu ai hta myti dik chye ra ai lam hpe Chyum Laika kaw shadum da nga ai. Lu ai hpe myit ndik ai shaloi gaw galoi mung myit pyaw lam nnga ai. Lu ai hta grau lu mayu ai, sengke lu ai wa gaw Mawdaw lu mayu ai, Wut dek nta nlu shachyaw rawng ai wa gaw nta tsawm tsawm re gap rawng mayu ai, Myit mada ai hku nbyim wa ai shaloi gaw, tinang hta grau lu ai ni hpe sha yu nna,tinang a myit pyaw lam hpe shamat kau chye ga ai, Dai ten tinang hta grau yak grau matsan ai ni pyi myit ndaw nhten ai sha, shakut let, pyaw pyaw lu ai hta myit dik nga ma ai hpe yu la nna n gun la let sak hkrung hkawm sa ra ga ai.

Crd: Shagang Zau ( Makam Masham Nli Magazine – Vol- 8 )

#youth

#rvakachinservice