Laika Hti Ai Lam Gaw, Shyinggyim Sak Prat Hpe Shading Sharai Ya Lu Ai

Laika Hti Ai Lam Gaw, Shyinggyim Sak Prat Hpe Shading Sharai Ya Lu Ai

          Laika law law hti u, laika buk ni gaw, nang a mu mada lam ni, nang a myit sawn lam hte, nang a yup mang shingran ni hpe, dam lada wa shangun lu nga ai, grau nna, awng dang mying gumhkawng lai wa ai masha ni a, labau lam ni hpe, hti dat yu yang, shanhte  a, yupmang shingran ni, dai yupmang ni hkrang shapraw sa wa lu na matu, atsam marai ma hkra dat let shakut shaja wa ai ni hpe mu lu nga ai, dai sha n ga, nang a sak prat a matu, grau htuk manu ai jaw ai yup mang shingran ni mang na matu hte, grau ngang gring ai sak prat lam nan ni jahkrat lu na matu, myit sawn nnan, mu mada ningnan ni lu wa shangun nga ai re.

Dai hta tsawra ai ramma ni hpe n gun jaw mayu ai lam gaw, Akyu hpyi ai lam gaw madung lam yan rai nga ai, akyu hpyi ai lam hpe  shayawm kau yang, yak hkak lam ni law wa na rai nga ai, bai akyu hpyi ai lam hpe shakut yang, mayak lam ni hpe awng dang tawt lai lu na teng sha rai nga ai law

Bai anhte ni awng dang lam hpe shakut nga ai ten, hpa mung galaw nlu,nkam, myit daw wa ai ten ni hta nlung dup nga ai masha wa hpe sa yu, shingran mu n gun la mai nga ai, kalang lang shanhte ni lang law law adup ga nga tim, nlung n’ga nga ai, lang 100 lang adup yang she ga mat nga ai, raitim, nlung gaw dai 100 lang ga ai majaw ga mat ai nrai nga ai, adup ai lang law law a majaw sha ga mat ai lam rai nga ai hpe myit dum let shakut sa wa ga

Anhte a mungkan ga hta hpa mung alaga nlu nga ai, shi manu hte shi jaw ra nga ga ai, yaw shada lam kaba tawn ai wa rai yang, masha ni ht, manu law law jaw lu na matu, ready nga taw ra nga ai, Manu ngu ai gaw, Magam bungli hpe tsun mayu ai rai nga ai,  dai majaw magam bungli galaw ra nga ga ai, mu mada lu ai ahkaw ahkang ni hpe jum tek lu ra nga ga ai, kalang lang gwi gwi galaw ra ai lam ni nga nga ai re, hkrat sum ai la ni, hkam sharang ra ai lam ni mung nga nga ai, ngwi galaw yang gaw ban dung hpe dung la taw ai hte bung nna, aten jahtum ai sha rai mat na hpe tsun dan mayu nngai law. dai hta ahkayk ai langai gaw, tsawra ai ramma ni mungkan ga hta nga mayu ai daram nlu nga nga ai, manam ngu ai gaw aten du yang, nta wa ra nga ai, tinang wa na lam gaw htani htana sumsing lam kun, ngarai lam kun atsam sha dinglik yu nna hkawm sa chye na matu mung kahtap shadum ya mayu ai law.

Shakut nga ai ten ni hta, asum njaw kau na mung ahkyak la nga ga ai, hpa majaw a majaw mung lai wa sai ten na mabyim lam ni hte tinang a ska prat hpe nmai shayawm kau nga ai, shani shagu na nnan ni hta, myit mada lam ni hte, sak hkrung lu na mtu, Madu Karai Kasang gaw jaw da nga ai, dai hta nang hkum nan asum njaw ding sang gaw nang gaw sum na nrai nga ai law, dai hta hkyak ai langai hpe la kap nna tsun dan mayu ai, dai gaw hpa rai nga yang, chye na ya ai lam rai nga ai, kanu kawa hte kashu kasha, sara hte jawngma, madu jan hte madu wa, makin jinghku manaw manang ni a lapran ahkyak ai ga langai nga ai dai gaw ya sha tsun ai chye na ya ai myit rai nga ai, dai majaw ndai chye na ya ai myit jaw lu na matu mung shajin da ra nga ga ai law, dai rai yang sha ngwi pyaw simsa ai lam hpe lu madu wa nna awng dang ai sak prat hpe lu madu wa lu na rai nga ai law,

Bai Akyu Ara ngu ai hpe bai tsun dan mayu ai.. Madu a bungli hpe madu manu shadan nga ga, raitim, magam bungli galaw nga ninglen hta, akyu ara hkam sha lam ni, awng dang na asi apu ni hpe, sawn let myit mada nga let aten ni hpe hkum shama kau, magam bungli ni hta tinang a nga manga n gun atsam ni, ngyan marai ni yawng bang tawn da u, akyu ara ni gaw magam bungli a hpang hta,hkang nang wa na sha rai nga ai ngu tsun dan mayu ai dai majaw hkum htingnut mat ngu n gun jaw mayu ai hpa majaw nga yang, asum jaw kau ai lam gaw, akyang byim mat chye nga ai re, nang gaaw shawng nan lang hta ta sharawt asum jaw kau sai nga yang lahkawng lang masumlang ni hta mung htingnut asum jaw kau na matu loi nga ai, loi loi asum jaw kau ai lam gaw, nang a akyang, nang a hkrang langai byim wa shangun chye ai majaw rai nga ngu

#youth

#rvakachinservice