Kun Dinghku Ngwi Pyaw Nga Gring Na Matu Shagrit Shayawm Hkat Ra Ai

Tsawra ai nu wa ni anhte a kun dinghku ngwi pyaw nga gring na matu shagrit shayawm hkat ra ai ni ngu lam ni hpe bai gam garan ya na nngai.Anhte num mi rai rai,la mi rai rai sumtsaw sumra prat hte kun dinghku de ai prat ngu ai gaw nbung ai ngu ai lam hpe anhte yawng chye da ra  nga ai.

Sumtsaw sumra prat hta gaw prat a shawng lam hpe nau nmyit yu ai lam nga nga na re,kaja wa nan prat ngu ai hpe dinghku de ai prat hta hkrum wa ai ten sawn tak da ai hta myit dik myit pyaw lam gaw ka-ang hkup,myit daw myit hten lam gaw ka-ang hkup rai gayau hkam sha ai lam hkrum na rai nga ai.

Anhte kun dinghku prat hta amyu shayi ni gaw sumtsaw prat na zawn hpai nep mayu ai,shalu mayu ai lam ni hte dang sha let shi hte tinang hte sha mungkan gawgap mayu ai lam ni mung shayawm ra ai zawn,la ni mung shabrang prat zawn manaw manang ni hte wawm hkawm mayu ai myit, ja gumhpraw lahpawt kau ai,malu masha hta ra marin ai,mahkawn tsawm tsawm ni hte shatu shala mayu ai bungli n galaw ai sha pyaw ai hku nga mayu ai lam ni hpe shayawm kau ra nga ai.

Dai zawn n shayawm mayu ai rai yang dinghku nshang ai gaw kaja nga ai.Shawng nnan gaw kun dinghku woi awn ai ni kaw nna ningrum a dum nta masha ni manaw manang jinghku ni a ntsa manghkang nbyin hkra shakut nga ra ai.

Kade daram hprinem ai hku hkungran dinghku de ai lam rai tim n hkungran shi yang gaw myit hta ngwi pyaw tsawm htap ai dinghku hpe tau nau myit shingran da ga ai.Kaja wa nga jang myit shingran hta na dinghku hte  ta tut prat na dinghku gaw shai ai lam ni law law nga nga ai.

Anhte nkau ni gaw shi mung tsawra tinang mung tsawra ai wa hte kun dinghku de lu ai majaw galoi mung myit pyaw myit dik ai hte nga lu na re ngu kam na ga ai.Ningrum hpe tsep kawp tsawra na, ningrum hte lahkawng raitim myit langai sha ngu sawn tawn na ga ai.

Raitim mayaw htinggaw de ngut ai hpang gaw tinang hte ningrum rau hkum lahkawng myit langai ngu ai gaw nmai byin ai ngu ai hpe  chye wa na rai nga ai.Bai nna anhte sumtsaw sumra ten galoi mung nmyit tawn da ai ningrum a dum nta masha ni ngu ai hpe mung anhte  hkap la ra nga ga ai.

Bai nna anhte num nkau ni gaw tinang hpe nau nhtuk ai kamoi hte  rau nga ai gaw Nga rai di de shang ai zawn hkam sha chye nna,tinang a kanu hte nga ai ten hta gaw gyip gyeng ai bawng dung ai zawn ngu shadu chye tim kamoi hte rau nga ai gaw lam shagu hta  wanglu wanglang nnga lu ai sha n ga,tinang a ningrum wa a makau kaw ni kap yang pyi nra sharawng ai myi hte  hkrum na mung myit tsang ai lam gaw mying shakap nlu ai kap sha lam mung nga chye nga ai.

Dai hta grau nna gaw Num kasha ni gaw tinang a myit masa hpe galai shai kau ra chye nga ai.Dai hku nlu galai shai ai rai yang gaw dinghku hkabra ai jahkrung gaida prat de loi loi hte du mat chye nga ai.Anhte ningrum hte hprinem hkra matut rau jawm pawng nga na matu sha n ga,lahkawng maga na amyu ni a lapran  hprinem hkra rau jawm pawng nga lu na matu tinang hkum tinang galai shai ra ai lam ni galaw ra nga  ga ai.

Galai shai ai lam hpe hkam jan lu na matu gaw tinang a atsam ningja hte mung seng ai zawn kanu kawa a lam madun sharin shaga ai lam mung ahkyak nga ai sha n ga,madu jan madu wa shada mung chye na ya na mung ahkyak nga ai.

Anhte myit dum ra na gaw kanam kahkri ngu ai hpe tinang kasha majing zawn nlu tsawra ai zawn,kanam kahkri ni mung kagu kamoi kani katsa ni hpe kanu kawa majing zawn tsawra lu na nre ngu ai hpe myit dum ra nga ga ai.

Bai nna anhte gaw ningrum gaw shi a dum nta masha ni hpang de sa ai ten ni,galaw ai lam shagu hta hkap yu ai lam ni, aten tup Phone shaga san jep ai lam,ningrum a ntsa ntsen ai lam hpe hkan tam yu sagawn ai lam ni n galaw yang kaja ai.Ndai lam ni gaw shi hpe mung tinang hpe mung myit htum myit daw shangun chye nga ai.

Shi a matu mung nkaja ai zawn tinang hpe mung myit gyip gyeng ai wa ngu mu mada chye nga ai.Anhte atsam ningja nga ai ngu ai ni gaw akyu nrawng ai sat lawat myit jasat ni a matu tinang a myit hpe mung ningrum hpe mung nhkra shangun chye ma ai.

Tinang hkum tinang hkam hpa ai zawn ningrum hpe mung kam hpa chye ra nga ai. Ningrum a makau kaw ni ni htep htep n nga lu ai majaw n mani lu rai nga na malai shi makau kaw nga taw nga ai shi dum nta masha ni manaw manang jinghku ni hpe mani sum sai hte hkap hkalum ya ga.

Ndai zawn shinggyim kanawn mazum lam hpe chye na ai ningrum hpe lu da ai wa hku nna mung jinghku jingyu ni manaw manang ni a lapran arawng la hpa mung rai nga ai.

By; Mung Hkrang