Kun Dinghku Ngwi Pyaw Na Matu gaw Ja Gumhpraw Ra ai Raitim Dai Gaw Madung Nrai Nga Ai

          Tsawra kun dinghku kanu kawa ni e anhte kun dinghku langai  ngwi pyaw ai dinghku langai gaw gap na matu ga ja gumhpraw gaw ra ai raitim madung ninghpawt gaw nrai nga ai.Anhte ja gumhpraw ngu ai gaw ra ahkyak ai lam rai nga ai.Shi shara hte shi ahkyak nga ai.Kalang marang ja gumhpraw gaw ngwi pyaw lam hpe galaw shalat ya lu ai,ja gumhpraw a majaw myit dik lu ai lam ni nga nga ai.Raitim kun dinghku hpe kaja wa nan myit dik myit pyaw ngwi pyaw ai kun dingku langai byin tai lu na matu gaw ja gumhpraw lu ya she byin wa ai lam nrai nga ai.Hpa majaw nga yang anhte kun dinghku law malawng gaw ja gumhpraw nhpring zup ai hku prat hpe lai di nga ra ai aten ni law law nga na rai nga ga ai.

         Anhte kun dinghku nkau hta ningrum ningtau wa gaw Magam dap hta magam gun hpai nga ra ai,hpung magam hta ap nawng shakut shaja nga ten,ja gumhpraw tam na nga sumtsan de shaning law law nga hkawm ai ten ni hta ja gumhpraw nlu nna,ningrum ningtau jan,kanu langai sha dum nta masha ni hpe galaw jaw sha nga nna aten na na matsan jam jau hkrum nga ai kun dinghku ni mung anhte law law nga ga ai. Ndai zawn kun dinghku hta ja gumhpraw nlu nna matsan jam jau hkrum nga ai ten ni hta Kanu Kawa ni gaw kashu kasha ni a ntsa myit galu hkam sharang shakut ya ai ten ni mung law law nga lai wa na rai sai.Ndai ten ni hta Na majaw Nye majaw nga shada da mara shagun hkat ai lam ni hte madu jan madu shada da langai hte chye na hkat ai lam ni nshai hkat na matu ahkyak nga ai.

       Mungkan a jamjau tsin yam grau sawng wa magang grau nna mazut wa magang anhte dinghku kanu yan kawa shada da shingma shada shakap dakan lai di ai aten mung anhte hkrum sha lai di wa na ga ai.Anhte Kun dinghku hta Kanu yan Kawa lahkawng shada da tsawra makyit sumri ngang ngang hte hkungga manu shadan tsun shaga kanawn mazum nga ding yang gaw kashu kasha ni mung kahpu kanau shada da tsawra makyit sumri ngang ngang hte  kanawn mazup tsun shaga na sha rai nga ai.

By; John Mung Hkrang