Kun Dinghku Kata Hta Hkan Nang Ra Ai Lam Ni

Tsawra ai kun dinghku kanu kawa ni anhte dinghku langai ngwi pyaw simsa na matu gaw madu jan madu wa lahkawng yan shakut na ahkyak nga ai.

Anhte madu jan madu wa  langai hte langai tsawra shawang sindun sumri grau nna ngang kang wa lu na matu tsawra myit ni grau nna ngang kang na matu grai rai shakut taw nga nra ai.Grai n gun dat shakut nga ngu ai kaw nna gaw kaja ai tsawra shawang myit masa nrai nga sai.

Anhte ya gam garan ya na ladat ni hpe hkan sa ai hte tinang a ningrum gaw tinang hpe grau nna tsawra wa na rai nna ya ten galaw da ai tinang a shut ai lam ni hpe mung grau nna mu chye wa lu na rai nga ai.Anhte nkau mi gaw kun dinghku de ai prat shaning law law rai mat sai raitim kun dingku hte seng nna jin mat ai lam nnga ai sha ngang kang ngwi pyaw ai kun dinghku dum nta prat byin na matu shakut gawgap nga ai ni rai nga na ga ai.

Anhte kun dinghku ngwi pyaw na matu hkan sa ra ai ladat ni gaw shawng nnan galoi mung tsawra shawang myit ni hkrung nga na matu shakut ra ga ai.Anhte masha shagu a matu galoi mung tsawra shawang myit ni ngang gring na matu ahkyak nga mali ai.Anhte salum ni si htum mat ai gaw asak si ai hta grau sawng nga ai.Dai majaw nga yak ai ten ni hta tsawra myit ni nga ai rai yang myit n gun ni lu la nna shawng de matut hkawm lu na rai nga ai.Dai majaw shi hpe tsawra ai tsawra myit ni grau nna law jat wa na matu hte shi kaw nna mung tinang a tsawra shawang myit hpe hkam sha lu na matu shani shagu na prat ni hta tsawra myit a matu galaw ai lam ni hpe bang shalawm galaw gring nga ai.

Ningrum ra ai hpe shadu jaw ai,shi a ga hpe madat ya ai,shi ra ai hkrang ni hpe jahkring hkring galaw ya ai,shi hpe myit lawm hkum lawm hte shawng de na mabyin ni hpe tsun dan ai ndai lam ni gaw madu jan madu wa lapran kanawn mazum lam hpe galoi mung hkrung nga na ladat ni rai nga ai.

Bai lahkawng ngu na hta gaw mara n shagun ai sha madat ya ai lam rai nga ai.Anhte mara shagun ai laikyang hpe galoi mung koi yen ai,tinang mung mara shagun hkrum ai ten shi a hkam sha lam hpe ntsun dan lu ai zawn re ni,dai nrai yang shi kaw nna bai ginhtang ningkap tsun ai zawn re ni byin wa nga ai.

Dai zawn re ai masa gaw grau nna sawng ai de du shangun chye nga ai.Dai majaw Ningrum gaw  shut taw nga ai nga tim mara shagun tsun na malai shi a na hta shang lu na kaga ladat ni hpe shaman lang yang grau kaja na rai nga ai.Shut mat ai wa,mara lu ai wa a ga nsen hpe madat ya gring nga ai.Hpa majaw nga yang dai shut ai lam a matu shi a myit kraw hta tsun dan mayu ai lam ni nga na rai nga ai.Dai hpe atsawm sha madat ya ai lam gaw shi hpe manu shadan tawn ai hte bung nga ai.

Bai nna masum ngu na lam gaw shut mat yang hpyi nem ai,shana ai lam ni hpe mung galaw ya ra nga ai.Anhte hku nna shut ai lam langai ngai hpe galaw hkrum sai nga jang,tinang hpe hkra shangun lu ai lam langai ngai hpe galaw hkrup sai nga jang myit kraw kata hta n –ip da ai sha asan brang lang tsun dan na matu shakut ra nga ai.Manghkang hpe tinang hkrai sha mayun mayoi hparan ai lam ni n galaw yang grau kaja nga ai.Kalang marang ningrum nchye ai hku nna galaw hkrum jang mung hpyi nem tawngban ai lam hpe galaw gring nga ai.Grau nna kaja ai gaw kun dinghku dum nta hte seng ai lam ni hpe gaw rau jawm bawngban jahkrup dawdan ai gaw kaja dik rai nga ai.

Bai nna mali ngu na gaw madu jan madu wa lahkawng hkrai sha re ai aten ni hpe jaw la chye ra ai.Anhte bungli hkring, hkring sa ai ten ni hta aten la nna madu jan madu wa lahkawng ra sharawng ai lam ni hpe galaw ai,lahkawng yan galaw mayu ai hpe atsawm brang lang tsun dan hkat ai lam galaw gring ai ngu mu mada ai.Hpa majaw nga jang anhte law malawng gaw tinang a bungli hte tinang nrau nhtau rai nga ai nga jang gaw ga wa shaga ai ten ni hta myit maju jung nmadat lu ai ten ni hta shi hpe ahkyak nla ai ngu sawn la chye nga ai.Ndai zawn nbyin hkra atsawm sha madat ya ai lam gaw shi hpe ahkyak shatai ai lam mung byin shangun ai zawn ningrum kaw nna tinang hpe grau tsawra wa hkra galaw ai hte mung bung nga ai.

Ngam nga ai daw hpe du wa na lamang hta bai gam garan ya na nngai.