Kun dinghku kata asak kaba ugut gu ai,machyi ai hte si ai lam

Tsawra ai nu wa hpu nau ni anhte shinggyim masha yawng gaw asak kaba dinggai dingla ugut gu ai,machyi hkrum ai hte si hkrum na gaw shingra tara raitim kun dinghku kata dai n grin ai lam hpe mu jang myit npyaw salum machyi hkrum ai gaw galoi mung rai nga na rai re.

Ndai zawn byin ai lam gaw kun dinghku kata hta  lani mi na aten hta du wa na sha rai nga ai.Yesu Maria Yawsep ni a Chyoi Pra ai dinghku hta pyi machyi makaw si hkrung si htan ai lam hpe hkrum sha lai wa sai re.Yawsep  si hkrum ai hte kasha Yesu Hkristu zingri zingrat hkrum let Wudang ntsa si hkrum ai lam gaw Nu Maria a salum hpe grai machyi yawn hkyen hkrum lai wa sai rai nga ai.

Asak kaba ugut gu ai,machyi makaw hkrum ai hte si hkrum ai lam ni hte hkrum katut wa ai shaloi simsa ai,mara dat ya ai,chyena ya ai lam ni hte hkap la chye ai Nu Maria a kasi  lam ni gaw kun dinghku shagu hpe kasi kaja madun nga ai.

Tsawra ai nu wa ni N kam (Ugut gu )dingla nkam dinggai jang jau jau si u,asak galu mayu jang gaw asak kaba ugut gu na hpe nmai hkrit ai nga tsun ai ga mung nga ga ai.Anhte kaji ai ten mahkawn shabrang lawan byin mayu ai raitim kaba wa ai ten gaw asak kaba dinggai dingla lawan nbyin kam ga ai.

Raitim mung laning mi asak kaba wa ai gaw laning mi ugut gu wa ai lam rai nga ai.Asak kaba ugut gu wa ai lam hta grau kung hpan wa ai lam rai nga ai.  Dai majaw asak kaba sai ni gaw nyan hpaji hte hpring zup ai ngu chyum laika hta mu lu nga ai.Laika hpaji jawng gaw hpaji chye shangun nna mahkrum madup ni gaw hpaji rawng ai wa byin shangun nga ai.

Anhte a kun dinghku hta kaji kawoi ni nga ai gaw A Lu ai lam rai nga ai.Kun dinghku dum nta ting a matu akyu hpyi ya na matu grau nna aten lu ai shanhte a akyu hpyi ya ai nsen gaw grau nna   A lu nga ai re.Shanhte nga ai gaw kashu ni a matu grau nna shim lum lam hpe lu shangun ya nga ai.

Kanu kawa hta grau nna aten lu jaw ya ai ni mung rai nga ai.Jan nna masha byin ai ni shanhte gaw masha shajan ni gaw nrai nga ma ai.Kun dinghku a matu ra ahkyak ai masha ni rai nga ai re.

Shanhte gaw asak kaba ugut gu wa ai hte matsing ninghting nyan yawm wa nga ai.N gun yawm wa ai majaw shut ai lam mung law wa chye ma ai.Dai hpe anhte chyena hkap la ya ra nga ai.Asak kaba wa nna ma hkya hkya wa ai ni hpe san pra masha tai na ni ngu mai sawn la nga ai.

Mt.18:3 hta “Nanhte hpe ngai teng ten tsun made ai gaw nanhte myit n kayin nna, ma kaji zawn ntai myit yang gaw sumsing lamu a mungdan hta nanhte nshang lu na mayi dai”nga Madu Yesu tsun shadum lai wa sai rai nga ai.Kaji Kawoi ni a myit masin  gaw ma ni zawn rai byin wa ai ten shanhte galaw hkrup ai shut ai lam gaw mara nrai nga sai.Machye machyang hte myit sharawng ai lam lawm jang she mara rai nga ai.

Dai majaw shanhte hpe chyena ya ai hta n ga tsawra hkungga lara ra nga ai.Ndai aten hta gaw kashu kasha ni lakawn lanawn ai lam hpe ra dik ai ni rai nga ma ai.Asak kaba sai ni hpe lakawn lanawn ai wa gaw tinang asak kaba wa ai ten Karai Kasang gaw shaman ya na sha rai nga ai.

Asak kaba ai ni hpe kabai tawn da ai lam ga nshawp nkap ai mara rai nna asak kaba sai ni hpe hkungga lara n nga ai shara hta ramma ni a matu shawng lam ngu mung nnga nga ai nga nna Wa Sarabyin tsun shadum lai wa sai re.

Bai nna anhte kun dinghku shagu dakan hkrum shingla ra ai lam gaw machyi makaw hkrum ai lam rai nga ai.Nnan shangai chyinghkai ai ten ni hte si na aten ni wa ai shaloi hta gasat poi gaw sawng dik aten rai nga ai.

Anhte hkum nan hkrum sha ai shoihpa hta kasha ni hkrum sha ai shoihpa gaw kanu yan kawa a matu grau hkam sha yak shangun nga ai.Byin mai ai rai yang gaw malai hku she hkam la mayu ai ni hkrai rai nga ai.Grau nna ga nchye shaga shi ai kasha ni hta byin yang grau sawng nga ai.

Ma tsi sara  ni lu su ai gaw kanu kawa a tsawra shawang myit a majaw rai nga ai.Anhte kashu kasha ni gaw kanu kawa ni a matu lahpawt dum maji ai lam ni nga yang nga na raitim kanu kawa ni gaw kasha ni matu galoi mung lahpawt dum ai maji ai lam nnga nga ai.Anhte mungkan hta tsi rung hte tsan ai shara ni law law nga nga ai.

Tsi rung ngu ai gaw ja gumhpraw lu ya she mai byin ai majaw masha nkau ni a matu sha rai nga ai.Kun dinghku dum nta gaw ni dik tsi rung rai nga ai nga nna Wa Sarabyin Francis tsun lai wa sai.

Kanu kawa,kaji kawoi kahpu kanau ni hpe tsi gawn lajang ya nga ai.Anhte machyi makaw hkrum wa ai ten dum nta kata mayak mahkak lam ni hkrum kadup wa chye nga ai.Shinggyim gawngkya lam ni shang wa jang grau nna yak wa chye nga ai.

Raitim law malawng gaw machyi makaw hkrum ai ten hta dum nta masha ni a sindun sumri hpe grau nna ngang kang wa shangun nga ai hta dum nta masha ni yawng grau nna myit hkrum gahkyin ra ai lam ma ni hpe kaji ai ten kaw nna sharin ya ra nga ai.

Tinang tsawra ai wa a shoihpa mayak lam ni gaw ma ni  a matu prat a laika sharin  lai rai nna atsawm sha tsawra shawang myit hte lanu lahku ai,akyu hpyi ya ai lam ni hte manang shatai ra ai lam hpe shanhte hpe chye na hkra tsun dan ra ai.Masha  langai a machyi makaw ai lam hpe hkam sha lam nnga hkra sharin ya ai hpaji lam gaw masin salum hpe hkraw shangun nga ai.

Anhte kun dinghku langai hta ten galu machyi jung ai langai ngai nga jang gaw kun dinghku dum nta a matu galu dik ai Wudang hpai ai hkrun lam rai nga ai.Nnan daw hta hkap la na yak ai raitim akyu hpyi ai lam a chyeju a majaw sumsing mungdan de hkawm lu na matu mahkrai langai zawn rai nga ai.

Anhte kun dinghku dum nta hta machyi masha nga ai gaw kaja ai lam hpe galaw na matu ahkaw ahkang lu ai ngu mai sawn la nga ai.Chyum laika hta Madu Yesu tsun da ai hta Ngai machyi ai ten nanghte ngai hpe gawn lajang ai nga tsun  shadum da ai zawn dum nta hta Madu Yesu shang wa ai lam rai nga ai. Dai re majaw anhte a dum nta hta e kaji kawoi kanu kawa ni hpe atsawm sha gawn lakawn let dinghku hpe shaman chyeju hpring ngwi pyaw hkra shakut sa wa ga law.

By: Mung Hkrang