Kun Dinghku Hta Ra Taw Nga Ai Gaw Shi Kun? Ngai Kun?

Tsawra ra ai nu wa hpu nau ni anhte kun dinghku dum nta hta madu jan madu wa shada da (snr) dum nta masha shada hpa majaw ningrum kaw nna,dum nta masha ni kaw na ngai hpe  nchye na ya ma ai kun?Hpa majaw ngai hte dum nta masha ni tsan ai zawn byin nga ai.

Ngai ya na zawn hkam sha taw nga ai hpe shanhte (snr) ningrum kaw nna hpa majaw nchye ya ai kun? nga anhte myit sawn hkam la chye na ga ai.Dai zawn myit sumru let hkam sha taw nga sai nga jang gaw tinang a prat hta myit pyaw lam nnga sai zawn nga byin wa chye nga  ga ai.

Gau ngwi ngwi rai nna tinang tsawra ai ningrum hte nta masha ni rau tsan gang mat nna garen gari prat hpe hkawm hpang wa ra chye nga ga ai.Dai zawn rai myit npyaw ai myit ndik ai prat hte shawng lam hpe nkam hkawm sai nga jang gaw anhte tinang hkum tinang bai myit sumru dinglik yu let ga san ni san gring nga sai.

Ningrum (snr) dum nta masha ni ngai hpe hpa majaw nchye na ya ai ngu myit lu ai ten tinang kaw nna mung ningrum hte dum nta masha ni hpe ngai chye na ya  ai kun? ngu ai ga san hpe bai san yu yang grau kaja nga ai.

Ningrum hte ngai hpa majaw tsan gang taw nga ai kun? ngu myit lu ai rai yang ngai ningrum a ntsa asan brang lang nga ai kun? ngu ai ga san ni hpe tinang hkum tinang bai san jep yu yang kaja nga ai.

Bai nna ngai ndai zawn hkam sha taw nga ai hpe shi hpa majaw nchye ai ngu mu mada ai ten ningrum a hkam sha lam hpe mung ngai mung chye ai kun?ngai mu hkra yu sai kun ngu ai ga san ni hpe mung anhte tinang hkum tinang bai san yu yang kaja dik rai na re.

Dai zawn rai tinang hkum tinang san yu let tinang hte ningrum dum nta masha ni hte kanawn mazum ai lam kaw hpa hta wa n gun yawm ningra taw nga sai kun?tinang maga kaw nna hpa ra taw nga ai ngu ai hpe anhte mu mada chye wa na re ngu mu mada ai.

Bai nna anhte a tsawra ai ningrum hte dum nta masha ni,kagu kamoi,kani katsa ni hte seng nna kanawn mazum lam nkaja ai shaloi anhte masha law malawng gaw kaga masha ni a majaw ngu, kaga masha ni hpe layung madi mara tam ai ladat hpe jai lang chye nga ga ai.

Anhte masha nkau ni sha tinang hkum tinang bai san jep yu nna tinang a gawng kya ra rawng ai lam hpe bai tam shakut let galai shai lu hkra shakut let kaja wa nan galai shai chye nga ma ai.

Tsawra ai nu wa ni anhte shinggyim kanawn mazum lam ngu ai hta kaga jasam ni hte tsun shaga kanawn mazum lam kaja hkra shakut gaw gap ra ai zawn kun dinghku dum nta kata hta mung dum nta masha langai hpra hte kanawn mazum lam kaja ai kaw nna grau kaja wa lu hkra mung gaw gap shakut la na grai nan ahkyak nga mali ai re.

Bai nna anhte tinang a shingran yup mang,tinang a myit mada ai lam,tinang a awng dang ai lam ni hpe dum nta masha ni hpang de mung bai gam garan jaw gring nga ai zawn tinang a mayak mahkak lam,tinang a manghkang lam,tinang a hkam sha lam ni hpe langai hkrai sha myi di chyip tawn da mung nmai nga ai.

Shanhte hpe tsun dat yang shanghte chye na na nre ngu ai ningmu hte sha ip sharang tawn da ai lam  tinang hkrai sha zim ngu hparan lajang ai lam ni gaw tinang hkrai garen gari hte prat hpe grai hkri ba ai hku hkawm sa na matu  lata la ai zawn rai mat na sha rai nga ai.

Tsawra ai nu wa hpu nau ni anhte lam shagu hpe tinang hkrai sha laidi hparan nga ra ai ngu ai garen gari prat madu ni gaw tinang a nhprinem ai lam ni,tinang a manghkang lam ni hpe zim rai ip hkam sha hparan let tinang a prat hkrun lam hpe gyip ai hta grau gyip hkra galaw la ai hte bung taw nga chye ai re.

Anhte garen gari prat ngu ai gaw tinang hkum tinang galaw lata la ai lam sha rai nga ai.Dai re majaw anhte a hkam sha lam,myit mada ai lam hte shingran yup mang ni hpe hkret sum ai lam myit npyaw yawn hkyen hkam sha lam ni hpe dum nta masha ni hpe ding ding man man asan sha tsun hpaw garan dan ga.

Tinang maga kaw nna mung shanhte a hkam sha lam myit mada lam ni hpe ahkyak shatai ya ra nga ai.Shanhte kaw nna tsun hpaw garan dan ai lam ni hpe mung manu shadan ya ra nga ai.Ga hti galai ngu ai gaw anhte hta nga gring nga ra nga ga ai.

Tinang jaw ai tinang bai lu ai ngu ai masa lam sha rai nga ai.Anhte masha shagu hta kraw kata na hkam sha lam hpe hpaw tsun dan lu ai masha langai (snr) lahkawng gaw galoi mung nga ai hkrai rai nga ga ai.

Anhte langai pyi nnga sai nga jang gaw tinang gaw lama mi gaw shut taw ra taw nga sai re.Tinang a shinggyim kanawn mazum lam gaw gawng kya ningra ai lam nga taw nga sai rai nga ai.

Tinang a gawng kya lam ni hpe tinang hkum tinang bai tam sumru ding lik yu ga,ngut jang gaw kanawn mazum lam grau nna kaja wa hkra tinang hkum tinang sharai shakut la ga ngu tsun mayu ai.

Anhte a prat hta kanawn mazum lam kaja ai wa gaw kanzawn mazum lam n kaja ai ni hta grau nna myit pyaw myit dik lam hpe lu la nga ai.

Dai re majaw anhte a kun dinghku ngwi pyaw na matu mung,jinghku jingyu manaw manang ni hte atsawm sha myit pyaw myit dik nga lu na matu kaga masha wa hpe hkrai mara shagun mara tam nga na malai tinang hkum tinang myit sawn dinglik yu let grau kaja ai prat hkrun lam hpe gaw gap sa wa ga law.

 

 

 

By; John Munghkrang

 

 

Add new comment

9 + 7 =