Kun Dinghku Hta Kaja Ra Ai Gaw

Tsawra ai nu wa hpu nau ni dai ni na mungkan hta Hkristan ding hku ni Dinghku npyaw ai ga n shaga hkat ai lam ni gaw hpa majaw rai nga ai kun? Tinang a ningrum ningtau a mara kun tinang a mara a majaw kun,shing nrai Ja gumhpraw a majaw kun,kashu kasha ni a majaw kun,hpa majaw mung nrai nga ai.

Dai kun dinghku hta Madu Yesu nnga ai majaw rai nga ai.Madu Karai Kasang ra sharawng up hkang ai npu hta nhkawm sa ai majaw rai nga ai. Anhte bai myit yu ra nga ga ai. Tinang a ningrum ningtau hpe nkam shaga na daram byin ai lam gaw hpa majaw kun?.

Tinang gaw Karai Kasang a kashu kasha rai yang rai na re ai. Makam masham lam hta shakut hkan sa na re. Raitim tinang a kraw salum kata Madu hpe shara njaw ai sha tinggyeng myit jasat hpe chyu sha shara jaw ai lam hpe sakse madun ai hte bung nga ai.

Madu Yesu Hkristu up hkang ai lam hpe n yin hkap la ai sha Karai a matu nga nna galaw sa ai lam gaw A lu ai lam nbyin mai nga ai. Nawku jawng hte akyu hpyi hpawng hta amyu mi,dum nta hta amyu mi rai chye nga ga ai.

Hka Nan mare na hkungran poi hta sapyi ntsi htum ai mang hkang byin nga ai. Lama na Num nnan hte La nnan gaw na majaw nye a majaw nga mara shagun  ga law ninggyet hkat ai rai yang dai hkungran poi gaw hten mat na sha rai nga ai.

Raitim dai hkungran hta poi hta Madu Yesu hpe saw shaga da ai majaw dai mang hkang lam nbyin pru mat sai rai nga ai. Dai re majaw tsawra ai nu wa hpu nau ni tinang ningrum ningtau dum nta masha ni hkabra na matu hpa majaw myit maw nga ata,tinang myit pyaw na matu hkabra na myit ai, raitim Karai Kasang a man e htap htuk na nrai nga ai.

Madu Karai Kasang gaw si hka ai hta lai nna nhka na matu tsun da nga ai. Madu Yesu hpe hkap la let Madu a shingnip hta nga ai dinghku shagu gaw mayak manghkang lam ni nga ai raitim kashu kasha ni a prat du hkra shaman chyeju lu na sha rai nga ai.

Anhte kun dinghku shagu hta manghkang ngu ai nga nga ai. Mayak manghkang hte nhkrum ai kun dinghku dum nta gaw nau nlaw taw nga ai. Shinglet hte Wa ndum shami kawa hkrup chye ai zawn madu jan madu wa kalang marang gaw ga law ninggyet hkat chye nga ai.

Grau nna kun dinghku shagu hta mayak mahkak lam ni hkum sumhpa hte hkrum kadup chye nga ga ai. Anhte Hkristan dinghku ni hta mayak mahkak manghkang lam ni hte hkrum wa yang gara hku nna hparan lu na rai.

Lahta de tsun lai wa sai zawn Hkanan mare na hkungran poi hta sapyi htum mat ai raitim Madu Yesu dai poi hta nga taw nga ai majaw sapyi htum mat ai lam Madu hpe tsun jang Madu gaw Hka hpe sapyi ntsin hta grau kaja ai sapyi ntsin shabyin ya let dai mayak lam hpe hparan ya nga ai.

Tsun mayu ai gaw kun dinghku shagu hta mayak mahkak ngu ai nga nga ai. Raitim laklai ai lam gaw dai hkungran poi hta Yesu Madu nga nga ai lam rai nga ai. Dai re majaw kun dinghku dum nta hta mayak manghkang lam ni byin hkrum wa jang shi a majaw na majaw ngu shada da mara tam shagun nga na malai Madu Yesu hpe tsun hpaw dan ra nga ga ai.

Ahkyak ai gaw hkungran dinghku nnan de ai hta Madu nga ai zawn anhte a kun dinghku nta kata hta mung Madu up hkang ai shingnip npu hta nga na ahkyak nga ai. Madu hpe hkap la kamsham ai dum nta hta Mayak manghkang lam ni hkrum wa tim lawt pru wa lu ai lam ni hpe Madu lam madun lajang ya na sha rai nga ai.

Langai hte langai shada mara shagun tsun nga ai rai yang manghkang lam ni gaw hprinem wa ai lam nnga ai sha dum nta masha ni myit npyaw yawn hpa lam ni sha byin wa chye nga ai .

Anhte kamsham ai masha ni kun dinghku de ai hta Madu Karai Kasang a yaw shada lam gaw kun dinghku kaw nna Karai a hpung shingkang shadan shadawng na matu rai nga ai. Karai Kasang a man hta ga sadi ga shaka la let hkungran la nna hpa nre ai manghkang a majaw hta langai hte langai mara ndat ya lu hkat nna dinghku hkabra ai lam gaw Karai Kasang ra sharawng ai lam nrai nga ai.

Dai re majaw tsawra ai nu wa hpu nau ni anhte a kun dinghku hta Madu Yesu hpe kamhpa kamsham manoi nga ga,mayak mahkak lam ni hkrum wa shagu langai hte langai shada da mara shagun mara tam nga na malai anhte mayak lam ni hpe Madu hpe hpaw tsun let akyu hpyi let n gun la nga ga.

Tinang ningrum ningtau hpe galoi mung hkungga ai lam nnga ai dinghku num ni,tinang a ningrum ningtau jan a ntsa yu kaji chye ai dinghku kawa ni anhte kun dinghku hta gara hku dinghku simsa lu na ata? .tinang a kashu kasha ni gara hku nna Karai Kasang hpe hkrit hkungga nawku kam sham lu na rai ta. Madu hta kamsham kam hpa manoi let akyu hpyi shakut ra nga ga ai.

Dai re majaw tsawra ai nu wa hpu nau ni anhte kun dinghku shagu mayak mahkak manghkang lam shagu hpe Madu hta manoi let hparan sa wa nna simsa ngwi pyaw dinghu byin tai lu hkra shakut sa wa ga law.

By: Mung Hkrang