Kun dinghku hpe hkra machyi chye ai laikyang lailen nkau hpe galai shai lu hkra galaw shakut sa wa ga (I)

 Hkristu hta hkungga tsawra ai nu wa hpu nau ni dai ni na ngwi pyaw dinghku lamang hta gaw ngai Sarama May htingyan Hein ka tawn da ai hta na kun dinghku hpe hkra machyi chye ai laikyang lailen  nkau hpe galai shai lu hkra galaw shakut sa wa ga ngu ai lam hte seng nna gam garan ya na nngai.Tsawra ai kun dinghku kanu kawa ni e anhte shani shagu shamu shamawt nga ai laikyang lailen ni gaw anhte a kun dinghku hkra machyi shangun ai lam ni nga nga chye ai re.Anhte hta tinang kaw nna gaw hpa nre ai kaji kajaw sha re ai hpe ningrum kaw nna manghkang tam chye ai,ndai daram hte pawt ai ngu tinang hku nna myit sawn la ai raitim maga mi a matu gaw hkam sha yak ai lam ni hpe shabyin shangun chye nga ai hpe anhte myit dum ra nga ga ai.Anhte nkau ni tsun chye ma ai shi galai shai mat sai nga tsun chye ai.Hpa majaw galai shai mat ai hpe gaw nmyit yu ai sha tsun chye ma  ai re.

Tinang hta mung hpa galai shai wa sai kun ngu ai hpe myit yu mai nga ai.Anhte amyu num ni myit dum ra ai gaw sumtsaw sumra ten hta gaw pawt ai shalu ai ten pyaw pyaw hte asawng la let myit pyaw lam lu la ai raitim kun dinghku de ai prat hta gaw jahkring hkring  pawt shalu ai lam gaw Ma zawn re rai nkung hpan ai lam ni gaw aten ahkying hta hkan nna chye na ya ai lam nnga ai masha byin tai wa chye nga ai.Bai nna nkau Num ni gaw gara masa lam hta gaw ningrum ningtau hpe hpai nep lu ai,gara masa lam hta jahte tam yang tinang a mara rai na re,gara gaw chye na ya ra ai ngu ai hpe myit dum chye na ra na ga ai.Dai zawn rai n chye na ai sha tinang a myit hta hkam sha ai ngu ai hte sha tinang a ningrum ningtau wa hpe jahte tam ai nga yang gaw anhte madu jan hte madu wa a lapran htuk manu prinem ai ten hta nhtuk npri nem ai ten gaw grau law wa na sha rai nga ai.Ndai zawn nhtuk npri nem ai lam gaw tinang a ntsa ningrum ningtau wa kaw nna lawan wan jin mat wa shangun chye ai re majaw kaji kajaw sha re ngu nmai sawn la nmai myit la nga ai.Dai hta sha n ga anhte hta byin chye ai gaw tinang a ningrum ningtau hte galaw ninggyet hkat sai nga jang tinang maga na nshanem lu ai nshayawm lu ai shi hpang maga shayawm ra ai ngu ai hte nmai myit la nga ai.Dai hta kun dinghku hta hpri nem na matu Num ni hkrai shagrit shayawm ra ai ngu tsun mayu ai lam gaw nrai nga ai.Raitim nkau masa lam ni hta gaw tinang maga shayawm yang she tinang a manu grau lung wa nna tinang hta hkam sharang chye na ya ai lam tsaw wa ai sha n ga kun dinghku kata kanawn mazum lam mung grau nna kaja wa na sha rai nga ai.Ga shadawn tsun ga nga yang ningrum ningtau a kanu kawa kahpu kanau ni hte seng nna tinang maga shayawm dat ai rai yang ningrum ningtau gaw tinang a ntsa prat tup matsat masa galaw tau chye ya wa lu nga ai re.

Dai zawn sha ga tsun shaga jahta nga ai ten ningdang hkat nna myit hta sindep sinla byin ai ten mung nga chye ai.Ndai zawn re ten ni hta tinang maga kaw nna hkam sharang dat na ngu ai lam ni hpe anhte myit lu myit yu ga sai kun?anhte law malawng gaw hkam sharang kau na ngu hta ngai jaw ai ngu tinang maga myit la nna pawt singdawng ni gaw grau law na rai na ga ai.Dai ten lahkawng yan hta maren masin pawt shadaw hkat nna  langai hte langai shayawm hkat ai lam nnga jang gaw pawt sindawng hkat ai lam grau sawng wa ai ten nbyin gring ai langai hte langai nju ndawng ai lam ni du hkra byin wa chye nga ai .Ndai zawn ga law ninggyet hkat ai shaloi tinang maga dang la mayu ai myit ni law wa chye nga ai majaw shut ai lam ni lawm wa chye nga ai.Ndai ten ni hta anhte gara hku nna  hparan ra na ta?dai gaw anhte a masin pawt sindawng ai hpe hting hkang lu na grai na ra ahkyak nga ai.Masin pawt ai hte tsun ai lam hpe jahkring kau ra ai,myit hta asim simsa wa ai shaloi shada da bawngban jahkrup ai lam ni galaw gring nga ai re.Dai hku nre ai sha pawt nan tsun shaga ai,pawt ai hte ginhtang ai,pawt ai hte dawdan ai lam ni gaw nkaja ai mahtai hpe sha jaw ai sha n ga tinang a ningrum hte tinang a lapran kanawn mazum lam ni mung hkra machyi chye nga ai re.

By; John Mung Hkrang