Kun dinghku hpe hkra machyi chye ai laikyang lailen nkau hpe galai shai lu hkra galaw shakut sa wa ga (II)

https://www.rvasia.org/sites/default/files/styles/mg_user_profile_picture_thumbnail/public/pictures/2020-03/rva%20logo_1.png?h=038a9462&itok=V5wOWYgm

            Tsawra ai kun dinghku kanu kawa ni e dinghku hta kanawn mazum lam hta hkra machye wa jang gaw kun dinghku hta kaja ai akyu ni hpe shamat kau wa ai hte bung wa nga ai.Bai nna langai byin chye ai gaw sumtsaw sumra ten hta gaw shi hte seng nna kaja ai lam sha myit ga,tsun ga ai tinang gaw hkungran ngut dinghku de ai hpang hta gaw tinang a ningrum ningtau  nkaja ai lam hpe sha mu mada,myit lu tsun nga sai kun ngu myit yu ga.Dai hta n ga anhte num nkau ni hta tinang ningrum ningtau wa nkaja ai lam dinghku kata lam ni hpe shingdu shagan de shatan nhkan tsun chye ai ni anhte hta law law nga nga na ga ai.Tinang a ningrum ningtau a nkaja ai ngu ai lam hpe manaw manang hte hpawng tsun shaga ai,bai nna ya ten hta nga jang Facebook hta grup hpaw nna tsun shaga hkat ai lam ni galaw chye na ga ai.

             Dai zawn sha laikyang nga ai langai ngai hte tsun nan lai kyang jung wa nna shanhte hte hkrum shagu ningrum a gawng kya ai lam hpe  hkrai tsun jahpoi chye wa ai.Ningrum ningtau chye wa ai shaloi gaw shi a ningrum jan a kata lam myit masa hpe mu kau ya jang gaw tinang a ntsa tawn da ai hkungga manu shadan ai lam ni yawm mat wa chye ai hpe myit dum ra na ga ai re.Dai hta sha n ga ningrum wa a myit hta tinang hte shani shana rau nga ai ningrum jan hpe myit hte hkum rau kam na ngu ai gaw yak mat sana sha rai nga ai.Ga nau n shaga mat ai,kata lam masa ni hpe ntsun kam sai,nkam bawngban ai lam ni hte kanawn mazum lam ni hpe sadi hkang kau ai shaloi gaw shi a katsi katsang rai nga mat ai hpe hkrum wa chye nga ai re.Dai majaw tinang a prat tup na rau nga ai ningrum ningtau a gawng kya ai lam hpe tsun jahpoi shatan hkawm ai lam hpe mai byin rai yang koi gam ga ngu tsun mayu ai.Ndai gaw anhte a Dinghku ngwi pyaw lam hpe shamat kau ya chye ai majaw sadi ra na ga ai.Bai nna kun dinghku hpe hkra machyi chye ai lam hta tinang a ningrum hpe tinang byin shangun mayu ai hku galaw shakut ai lam mung lawm nga ai.Anhte gaw rit kawp tara nga ai wa rai yang tinang ninrum gaw arung arai lama ma hpe lang ngut nna shi shara hta ntawn da ai rai yang masin pawt ai hte tsun shaga ai lam gaw nga na re.

           Dai hta n ga tinang gaw manaw manang ni hte shinggan de hkawm chyai ai lam ni nnga tim ningrum hta gaw manaw manang ni hpang de shinggan pru hkawm ai hpe nhkap la lu ai,hkum pat ai lam,manaw manang ni hte shinggan pru hkawm shagu manghkang tam ai hte hpang de dai zawn npru hkawm hkra shakut ai lam ni mung anhte hta nga na ga ai.Ndai masa hta anhte kaw nna myit sawn ra na gaw shinggyim masha shagu gaw tinggyeng wanglu wanglang ahkaw ahkang ngu ai nga ai rai nga ai.Ningrum a nga sat nga sa lam mung nga nga ai re.Ningrum hte tinang hte nbung ai shai hkat ai lam ni mung law law nga na re.Nbung ai lam ni hpe tinang gaw nra ai majaw ngu ai ga hkum,shi hpe rit kawp tara grau kaja na matu ngu hkum pat ai lam rai jang gaw ningrum kaw nna tinang hpe myit htum mat wa nna dinghku hpe mung hkra machyi wa shangun nga ai.Shi a laikyang hkawm sa nga sat nga sa lam ni hpe kun dinghku de ngu ai hpang she galai shai shangun na gaw nmai nga ai.Nhkungran shi yang shana le hkawm chyai ai kyang nga ai wa gaw dinghku de mat tim le hkawm na sha rai nga ai.Ndai lam ni hpe mahkra hpe dinghku nde shi yang myit yu ra ai ngu sha tsun mayu ai.Dinghku de sai kaw nna  galaw jang gaw manghkang nbyin hkra myit machyi hkra ntsun hkrup na matu sadi ra na ga ai.Ningrum a nkaja ai laikyang ni gau ngwi ngwi yawm wa lu ai masa lam ni hte garum shingtau lam tam la ra nga ai.

           Anhte a kun dinghku nhtuk nhpri nem jang gaw gara hku nna hprinem hkra kanawn mazup lam galai shai na ngu ai mahkrun lam ni hpe tam sa wa ga.Dai hku nre ai sha langai hte langai myit ndik ai myit hte matut hkawm sa ai rai yang lani mi na ten hta gaw dinghku hkrum lam htum mat ai de du mat chye nga ai.Dai majaw Madu jan Madu wa lahkawng yan hprinem nga ai rai yang kashu kasha ni mung myit pyaw lu ai hte ngwi pyaw ai kun dinghku byin tai wa lu hkra shakut sa wa ga.

 

By John Mung Hkrang

 

Add new comment

10 + 1 =