Kawa Hte Ma Chyangai Tsawra Myit Sindun Sumri Matut Mahkai Lu Na Ladat (II)

Anhte shani shagu galaw nga ai lam ni hta shanglawm ya ga.Ma hpe hka shin ya ai lam gaw yu maya galaw ai lam sha raitim shani shagu galaw ya ai gaw kawa hte kasha lahpran matut mahkai lam grau nna kaja shangun nga ai.Ma ni gaw shanhte hpe hka shin ya ai ten hta kawa ni sa du na hpe myit mada nna kawa ai atsawm agawm rai pawn masawp ai hpe ra ai,mani hpa myi man nsam hte mahkawn hkawn dan ai hpe ra nga ma ai re.

Bai tsawra kawa la ni anhte kasha ma chyangai ni hte myi shada hkrum rai mani dan na ahkyak nga ai.Ma gaw shangai ai nau nna ai ten hta mu ai maju gaw hpring zup bawngring ai lam nnga nga ai.Raitim mung ma ni gaw tau sawn ai lam hta yung bat matsat (8) kaw nna shi (10)  daram tsan ai hpe gaw mu lu nga ai majaw shanhte hpe pawn da ai ten kawa myi man hpe atsawm sha chye ginhka lu nga ai.Ma gaw tam sawk sagawn ai myit chye mayu ai myit ni nga nga ai.Dai majaw shanhte hte myi shada hkrum rai nna mani dan mai nga ai.Anhte kasha ma chyangai shata lahkawng daram du jang gaw anhte kawa ni mani dan ai hpe bai htang mani dan ai lam hpe mu lunga ai.

Bai nna ma hpe laika hti dan na mung ahkyak nga ai.Ma ni gaw kanu a kan hta nga ai ten kaw nna shanhte a kanu yan kawa a ga ni hpe sharin la hpang nna nsen ni hpe myit lawm wa sai rai nga ai.Anhte kawa ni hku nna myit asim sha nga pyaw ai ten ni,shana maga hta ma ni hpe mau mwi kadun ni tsun dan,ra dik ai magazine ni hpe hti dan ai lam ni mai galaw nga ai.Ma gaw kawa a nsen na ai hte matut mahkai wa na ra ai.Dai ten ni hta kawa hte kasha a lahpran sindun sumri grau nna ngang kang lu na rai nga ai.

Ma hpe pawn ya ga.Anhte kasha ma ni hpe ja hkring hkring pawn ya ai lam gaw kasha hte kawa a lapran grau nna tsawra myit sindun ngang kang lu nga ai.Ma hte ni htep ai hku nga sa ai lam gaw ma ni chyu chyu mayu ai kun,kahtet ai kun,ma lagawn taw nga ai kun,sanen galai ra ai kun ngu ai lam ni hpe anhte kawa ni hku nna lawan ai hku nna chye na lu nga ai.

Bai nna anhte kawa la ni gaw shinggan de magam bungli galaw ai ni hkrai law nga ai majaw magam bungli sa wa na ten,bai du wa ai ten ni hta ma hpe shakram ya ga.Anhte kawa ni dum nta kaw nna shinggan de bungli galaw nga ai rai yang dum nta de bai wa ai ten ni hta ma hte matut mahkai lam ngang kang lu na matu ahkaw ahkang langai mung rai nga ai re.Bungli ngut nna dum nta de bai du wa ai hte ma hpe pawn nna myi shada hkrum rai mani dan ga.Magam bungli hta pu ba ai lam ni yawng hpe malap kaw lu na re ai.

Bai nna tsawra ai kawa la ni ma hpe kanu a kan hta naw rawng nga ai ten kaw nna hpe ga shaga ya ga nga nna hpaji rawng ai ni tsun da ma ai.Anhte ma ni gaw kanu a kan hta rawng nga ai ten bat (15) daram kaw nna gaw ma ni gaw kanu a nsen hte  salum gumhtawn ai hpe na lu sai nga ma ai.Shanhte gaw shata na na wa madat na rai nga ai.Dai majaw shanhte shinggyim mungkan de du ai ten hta kalang ta masat masa galaw na rai nga ai.

Kanu a kan hta rawng nga ai bat (23) daram hta ma gaw shinggan de na nsen ni hpe madat lu nga ai.Dai majaw anhte kawa la ni hku nna kanu a kan makau kaw ni nna ga shaga ya ai ten shagu shanhte shangai chyinghkai ai ten ni hta anhte kawa ni hpe masat masa galaw ya lu nga ai.Dai majaw anhte kanu kawa ni a nsen gaw ma  ni hte hku hkau ni htep lam ni lu wa shangun nga ai hte myit hkri lit li lam hpe shangyawm ya lu nga ai majaw anhte kawa la ni yawng mung anhte kashu kasha ni hte ni htep hku hkau lam galaw let ma ni hpe kawa a shim lum lam hpe jaw ya nga ga law.