Kashu Kasha Ni A Ningshawng Kaja Tai Ga

online photo

Kun dinghku nkau hta kashu kasha ma ni hpe langai hte langai garan ginhka  kanawn mazum ai lam hte shagrit shanem tsun shaga kanawn mazum hkrum ai ma gaw myit htum myit daw ai ana lu nna kanu kawa ni hpe ninghkap ningrang galaw nna kanu kawa kayet sharin ai hpe nhkam lu nna dum nta kaw nna hprawng pru mat ai lam kajawng kaja asak si hkrum ai lam ni byin mat chye nga ai.

Kun dinghku nkau gaw sut su ai lam nnga tim makam masham lam rau jawm shakut ai nawku jawng rau sa ai,gahkyin gumdin tsawra let rau jawm pawng nga ma ai.Raitim kun dinghku ni yu maram yu yang htinggaw shi hta na htinggaw mi daram sha, lu ai daram hte sha pyaw pyaw rai myit hkrum myit ra rai nna nga let hprinem wa hkra shakut nga ai ni hpe mu lu nga ai.

Kun dinghku de ai prat 30,40,50 she du wa tim, pyaw ai raitim npyaw ai raitim rau sha lai di hkawm nga ma ai.Anhte kun dinghku de ai hta langai hte langai makam masham shakut nna hpung bung ai lahkawng rau mayaw htinggaw de ai rai yang tsa lam shadang 50 daram gaw shada bawngban jahkrup la lu nga ai. Dai hta grau yang grau na re.

Kanu yan kawa makam masham nbung jang gaw kashu kasha ni hta mayak mahkak hkrum ai lam law law mu lu nga ga ai.Anhte law malawng gaw kun dinghku langai hta kun dinghku hpe woi awn ai wa tsa chyaru nanghpam malu masha hte shinggan pyaw hpa lam ni hta baw bang len chye ai majaw kun dinghku dum nta hta jam jau ai ni law nga ai re.

Tsawra ai nu wa ni lu su ai mi rai rai,matsan ai mi rai rai tsa nanghpam lu sha da jang ga law saw chye ai gaw htunglai langai rai nga ai.Anhte ya prat hta tsa chyaru hta ya tai baw bang nga ai hta la ni sha nrai myu shayi num ni mung grai law wa sai hpe mu lu nga ai.

Ya na zawn rai kun dinghku dum nta langai hta kun dinghku hpe woi awn ai wa (snr) nta madu jan langai ngai tsa chyaru nanghpam hta ya tai lu sha nga ai rai jang gaw dai kun dinghku hta ngwi pyaw lam mat chye nga ai re.

Dai ni na prat hta myo mare kaba ni hta nga ai ramma ni gaw prat hpaji madang hpe grau nna hkan shajut hpaji sharin hkaja wa ai hpe mu lu nna kanu kawa ni kaw nna mung lam madun madi shadaw garum ya ai majaw grau nna kaja ai lam de hkawm sa wa ai hpe mu lu ga ai.

Raitim anhte mare kahtawng buga hkan na ramma ni gaw tsa chyaru hte kaga nanghpam malu masha ni hta baw bang let hpaji machye machyang lam hta hkan shajut ai hpe nau nmu lu ga ai.

Dai hta anhte kanu kawa ni mung lam matsun madun ningra ai hte kanu kawa ni hkum nan mung kashu kasha ma ni a shawng hta tsa chyaru lu sha let tsa nang marawn let dinghku kata hta kalang marang nhkrum nra jahkring hkring byin chye ai hpe mu lu nga ai.

Tsawra ai nu wa hpu nau ni anhte hta tsawra shawang myit tawn da chye ai wa gaw shinggyim masha prat hta manu dan ai magam bungli hpe galaw nga ai lam mung rai nga ai.

Dai re majaw anhte a kun dinghku dum nta hpe woi awn nga ai anhte kanu kawa ni mung anhte a kun dinghku dum nta simsa ngwi pyaw na matu mung,anhte prat ban nnan ni rai nga ai kashu kasha ni a prat si mani myitsu zet let kung kyang ni byin na matu mung tsawra shawang kaba hte kasi kaja madun let lam madun madi shadaw ya na ahkyak nga ga ai re.

 

By: Mung Hkrang

 

Add new comment

3 + 10 =