Kashu Kasha Ni Hpe Tsawra Ga

google photo

Tsawra hkunnga ai nu wa hpu nau ni anhte tara kanu lam shi kaw nna mali ngu na hta n nu n wa hpe hkungga la ra di u ngu nna tsun da tim ndai tara lam hpe sanglang ai lam hta yu sawk sagawn ai shaloi kanu kawa a ntsa kashu kasha ni lit magam hte kashu kasha ni a ntsa lit magam ni hpe mu lu nga ai.

Kashu kasha ni a ntsa kanu kawa ni a lit magam gaw Karai jaw ai lit magam hte ahkaw hkang nan rai nga ai.Anhte hkungran sakramentu gaw Karai Kasang hte seng ai tara shang gyit hkang ai lam rai nna kashu kasha ni gaw Karai jaw ai tsawra shawang kumhpa ni rai nga ai.Dai majaw hkristan dinghku gaw Wenyi lam hte seng ai lak san masha hpawng rai nga ai.

Anhte kanu kawa ni gaw anhte a kashu kasha ni hpe tsawra shawang myit hte makawp maga bau maka let myit hkrum myit ra gahkyin gum din nga lu hkra galaw woi ra nga ai.Dai hku nna galaw na matu mung anhte kanu kawa ni hta lit nga nga ai.Anhte kashu kasha ni a matu lu na sha na bu na hpun na,Wenyi lam,hpaji lam hkamja lam hte shinngyim kanawn mazup lam ni yawng gaw anhte kanu kawa ni a lata hta sha rai nga ai.Dai majaw kashu kasha ni a matu tsun shaga kanawn mazum ra ai ni,hkawm wa hkawm sa mai ai shara ni aten ni hte malu masha ni hpe anhte kanu kawa ni hku nna chye da gring nga ai.

Bai nna anhte a kashu kasha ni hpe kun dinghku dum nta masha ni hte rau rai akyu hpyi let ginlung ra nga ai.Dum nta masha ni a akyu hpyi nsen gaw anhte a kun dinghku dum nta a matu n gun hte shaman chyeju rai nga ai.Dum nta masha ni rau sha akyu hpyi ai kun dinghku gaw  dum nta masha ni yawng myit hkrum let rau sha nga ai dum nta rai nga ai.Rawt jat bawngring ai lam,myit hkrum myitra gahkyin gumdin lam hte simsa lam hpe hkang zing ya lu ai gaw dum nta masha ni yawng rau sha akyu hpyi ai lam rai nga ai.Ndai zawn rau sha akyu hpyi ai lam a ra ahkyak dik ai lam hpe anhte a kashu kasha ni hpe tsun sharin shaga ra nga ai. 

Bai nna anhte kanu yan kawa ni kaw nna kashu kasha ni hpe hkam sharang  ai hte kun dinghku dum nta hpe ginlung nga na matu mung ra nga ai.Shada da chyeju jaw ai shara,shada da mara raw ya ai shara,shada da garum shingtau hkat ai shara,sha da a matu lam magup hta hkam sharang ya hkak ai shara re ai lam anhte a kashu kasha ni hpe sharin ya ra ai.

Anhte kanu kawa ni gaw kashu kasha ni hpe Laban Missa ( Nawku) rau sa akyu hpyi let kun dinghku hpe ginlung ra nga ai.Anhte Kahtawlik nawku hpung masha ni yawng gaw Laban shani akyu hpyi nawku ai lam hta rau sha shanglawm na matu lit nga nga ga ai.

Add new comment

7 + 1 =