Kashu kasha ni hpe rit kawp tara nga hkra bau maka kaba ai lam

Online Photo

         Tsawra ai kun dinghku kanu kawa ni anhte kanu kawa nkau ni gaw anhte a kashu kasha ni hpe npawt ndaru n kayat ai sha tsawm asan sha sang lang dan nna rit kawp tara ni hpe hkan nan shangun mayu ai kanu kawa ni mung nga na ga ai.Anhte a kashu kasha ni hpe rit kawp tara hkan sa na matu galaw shakut ai lam gaw Sharaw mai tsan hpe sa gang ai hta grau yak nga ai hpe anhte kanu kawa shagu chye na rai nga ai.

        Grau nna gaw prat nga sa lam hte seng nna mi rai rai,nta kata rit kawp tara lam hta mi rai rai,hpaji lam hte hkamja lam rit kawp tara lam hta mi rai rai kaning re ai rit kawp tara ni hpe kashu kasha ni hkan nang lu hkra galaw ai lam hta kanu kawa a darum magam hpe kam let jai lang nmai ai ngu ai hpe anhte myit dum ra nga ai.

         Anhte a kashu kasha a ntsa tawn da ai rit kawp tara ni hte seng nna Ma ni hte  bawngban ai,kasha hpe rit kawp tara lang shangun mayu ai, ndai rit kawp tara ni gaw Ma ni a prat a matu re lam hpe kashu kasha ni chye na wa hkra tsun sanglang dan ra ai.

        Dai hta tinang kaw nna pat hkum mayu ai rit kawp tara galaw mayu ai nga jang kashu kasha ni myit sawn hkam la ai lam hpe shawng san yu ra ai.Shanhte hpe ga shaga na ahkaw ahkang jaw ra ai.Rit kawp tara jahkrat na nga jang shanhte hkan nang lu nlu hpe san nna shanhte tsun ai hpe madat ra ai.

        Ngut jang gaw anhte kanu kawa ni a hkam sha lam shanhte a ntsa tawn da manu shadan ai lam,shanhte hte seng nna myit mada da ai lam ni hpe shanhte chye na wa ai du hkra tsun sanglang dan ra ai.

        Dai ni ngut ai hpang she kanu kawa hte  kashu kasha ni a lapran hkan sa lu ai rit kawp tara ni hpe jahkrat yang grau nna kaja nga ai.Ma shanhte myit ra ai hku galaw sana nga jang lahkawng masum lang myit yu ra ai lam (shing nrai) kanu kawa hpe san yu ra ai.Shut ai lam nkau hpe gaw gram lu ai raitim nkau shut ai lam hpe gaw bai gram na matu aten jaw aten la ra ai. Kanu yan kawa hte  kashu kasha ni a lapran kalang ta tang du masan sa hku rit kawp tara n jahkret lu ai masa ngu ai gaw nga chye ai.

        Rit kawp tara tawt lai ai majaw mara dam jaw na malai kalang marang gaw shanhte hpe mara dam a malai nta bungli hte  dum nta a sut masa lam ni hta shanglawm shangun ai gaw shanhte myit lawm ai lam hpe shadan shapraw shangun ai lam ni mung paw pru wa chye nga ai.

        Ya prat  Social Media n gun rawng wa ai ten hta anhte kashu kasha ni hpe phone nmai lang ai,Facebook nmai lang ai,TV sumla hkrung nmai yu ai,game nmai gasup ai ngu hkum pat ai hte nlaw nga sai ngu ai hpe anhte kanu kawa ni yawng chye na chyalu rai nga ai.

        Grau nna gaw shanhte hte asak bung ram ai ni jai lang nga ai ten anhte gaw nmai lang ai ngu anhte kanu kawa ni hkum pat ai rai yang shanhte a myit hta shanhte a kanu kawa ni gaw nkaja dik kanu kawa ngu pyi sawn la chye nga ai.

        Dai re majaw nmai jai lang ai ngu na malai aten hte  hkrak rai nna lang na,masat tawn da ai aten ni hta sha atsawm rai nna  lai ladat kaja hkrak rai jai lang na matu shaman shakyang ya ra na re.

       Shanhte a rit kawp tara lit la chye ra ai lam hte ahkaw ahkang ngu ai gaw ginrun nga ai hpe anhte kashu kasha ma ni chye na hkra tsun sang lang dan ai lam ni hpe anhte kanu kawa ni hku nna galaw ya ra nga ai.

       Anhte kanu kawa ni hku nna rit kawp tara masat ai lam hta mung shanhte a ningmu hkam la ai lam hte myit hkam sha lam hpe shalawm myit ya ra ai zawn tinang a kaja ai ningmu myit jasat hte tsawra shawang myit a ntsa ninghpawt tawn nna gara hku galaw na ngu ai n gun jaw ai lam,tawt lai wa jang hpang de kasi la mai lu na matu gara hku sharin achyin ya na ngu ai hpe mung myit ra ai ngu n gun jaw mayu ai.

 

 

 

By; John Mung Hkrang

Add new comment

1 + 18 =