Kashu Kasha Hpe Ngarai Jaw Ai Kanu Kawa Nga Ai Kun?

Tsawra hkungga ai kun dinghku kanu kawa ni ai kaning re ai kanu kawa ni gaw kashu kasha ni hpe Ngarai jaw ai kun? ngu ai hpe sumru yu ga.Anhte yawng gaw ntsun lu nga ai kashu kasha hpe Ngarai jaw lam hta anhte a kanu kawa ni mung lawm chye ai zawn tinang hkum nan mung lawm chye nga ai.

Ladu shalai mara shagun chye ai kanu kawa mung lawm nga ai.Ndai lam gaw asan sha  rai dan leng nga ai.Hpa magam bungli mi galaw galaw mara shagun chye ai,lam mi hku bai tsun ga nga yang gaw nammak lawhpa myit rawng ai kanu kawa ni rai nga ai.Lam shagu  hta nmai jai lang ai ngu ai shingwang kata kaw hkrai bang ai,kashu kasha ni kaja wa asung nshang ai lam rai yang she rai na re.Raitim asung nshang ai ngu ai hpe sha mu nga ai dai hpe jahkring hkring na jin wa jang gaw pawt sindawng ai lam gaw kanu kawa hpe bai htang ningkap tsun wa hpang chye nga ai re.

Bai nna myi man lata ai lam mung lawm nga ai.Tinang shangai chyinghkai da ai kashu kasha ni hkrai raitim nye kasha Ma Kaw,nye kasha Ma Gam ngu myi man lata kanawn mazum ai lam rai nga ai.Ndai gaw grai `nkaja ai lam rai nga  ai re.Myi man lata ai kanu kawa hpe lu da ai kashu kasha ni gaw shada myit hkrum ginlung ai lam nnga ai gaw law nga ai.Ndai lam gaw anhte kanu kawa ni kaw nna ginhka da ai majaw rai nga ai.Nang gaw anya ai,nang gaw ram ai ngu nna marai ningja hpe  garan dat ai rai yang galoi mung myit hkrum lam lu na nrai nga sai.

Myi man lata ai lam gaw hkungga ai lam nnga ai hpe byin hpang wa shangun nga ai.Dai kaw nna kahpu kanau kana ni shada da manawn masham lam ni byin wa nna nju ndawng ai lam ni byin wa shangun chye nga ai re.Ma prat ten kaw nna ru jung kap nang mat wa ai nju ndawng ai lam ni gaw galoi mung shamat shabrai kau nmai nga sai re.Anhte kanu kawa ni a shawng hta jahpai kanawn mazum dan nga ai sha rai nga ai.Kanu kawa ni nnga mat jang gaw ndai kahpu kanau ni gaw shada da seng ai lam kachyi hpyi nnga ai masha ni zawn rai mat nna shada da garum shingtau bawnban na ngu ai gaw nmai byin mat sai.

Bai nna kashu kasha ni hpe matsa mawa tsun ai lam mung rai nga ai.Shani shagu matsa mawa hkrai tsun hkrum taw ai wa gaw pawt sin dawng ai lam yawm na shadu ai kun? law na shadu ai kun?bai htang tsun ya mung kanu kawa hpe ninghkap ningdang kalang ga tsun ai, Ngarai di hta jamjau na gwi tai na ngu dagam dala ga zawn tsun shaga ai lam gaw grai sawng ai lam rai nga ai.

Dai rai yang tinang shangai chyinghkai tawn da ai kashu kasha ni hpe shani shagu matsa mawa ga tsun ai anhte kanu kawa ni mung ngarai nlu na kun?atsawm akawm ngu tsun shaga shangun yang nlu jang gaw nmai shangun sai.Matsa mawa ngu tsun nna shangun ai gaw masa jaw ai lam gaw nrai nga ai.

Shi hpa majaw nkam galaw ai ngu ai hpe chye na matu san jahkrup na ngu ai gaw yak ai lam gaw rai nga ai.Hpa hpe n galaw kam ai kun?dai nrai yang shi galaw mayu ai gaw hpa rai kun?ngu ai lam gaw nloi jang matsa mawa tsun let shangun ai lam gaw lawan ai majaw ndai ladat hpe jai lang nga chye ga ai.

Bai nna kashu kasha ni a kun dinghku hpe shang jet bat ai lam rai nga ai.Anhte kanu kawa ni law malawng gaw ndai lam hpe galaw chye ga ai.Nang wa ai la wa gaw gara hku,nang la da ai num wa ga gara hku ngu ai lam hpe anhte mai byin yang ntsun gring nga ai.Anhte kashu kasha ni lata la ai lam hpe anhte kanu kawa ni hku nna mung hkungga manu shadan ya ra nga ai.Shi gaw shi prat hte shi nga chye ai majaw nga nga ai rai nga ai.Kashu kasha ni kaw nna shanhte a kun dinghku hte seng nna garum ya rit she ntsun dingsa gaw shanglawm ya nra nga ai.Nye kasha jaw ngu sha sawn la hkam la chye ai lam gaw shut nga ai.

Anhte gaw kashu kasha ni lam mahkra kanu kawa ni chye ai ngu ai lam gaw ma ni kaji ai ten hta sha rai na re.Kashu kasha ni a lam nchye ai majaw she kashu kasha ni masha sat hkrup ai,lagu lagut damya mya sha jang kanu kawa ni mau mau mahka  ai lam byin nga ai.Kaji ai ten hta chye ai ngu ai gaw kaji ai ten ma prat hta gaw kanu kawa ni hte sha shani shana tup rau nga ai re majaw lai kyang ni hpe chye ai rai nga ai.

Kaba wa prat ram wa jang gaw kanu kawa ni hte rau nga ai ten yawm wa ai majaw kashu kasha ni a myit masa hpe nchye lu na re ngu ai hpe anhte kanu kawa ni chye da gring nga ai. Anhte kashu kasha ngu ai ni gaw kanu kawa hpe lam magup tsun dan mayu ai ngu ai gaw asak shi ning npu aten hta sha rai nga ai.

Dai hpe ma kaji zawn yawng chye yawng hparan ya mayu ai nga jang kaja wa byin wa ai ten kanu kawa hpe n jahkrum ai lam gaw law nga ai.Ngai tsun sai le ngu ga a hpang mara shagun ai lam ni gaw manghkang hpe hparan na gaw tsan mat sai hpe kashu kasha ni mu dum chye nga sai.Kashu kasha ni a lam kaja wa chye jang gaw ndai lam ni n galaw hkrum na hpe chye da gring nga ai.

Bai nna kashu kasha ni hpe tsun shaga kanawn mazum ai lam shut ai lam mung rai nga ai.Anhte kanu kawa nkau ni hta nga chye ga ai.Shinggan hta gaw masha kaji kaba yawng hpe grai ahkyak la kanawn mazum chye ai.Tsun ga nga yang gaw masha ni a ntsa hkungga ai lam rai nga ai.Kashu kasha ni a ntsa hta gaw dang sha taw nga ai ni zawn rai jang gaw myit ra nbyin shagu  kashu kasha ni hpe shadip shagrit shanem ai lam galaw chye ai nga ai.

Tsawra shawang ga ngu ai raitim tsun shaga lam njaw jang gaw na hta madat yang hka ai gaw shinggyim shingra tara nan rai nga ai. Myit hkam sha lam gaw masing da chye ai majaw kanu kawa hpe tsun shagu nkaja ai hku mu ai ngu pawt sindawng chye ai kashu kasha ni nga chye ai rai nga ai.Anhte myit ngu ai gaw galoi mung galu nga na gaw nrai nga ai.

Dai re majaw kashu kasha ni hpe aten tup na kahtet hkra shani shagu tsun sharin shaga ai lam hpe n galaw ya kaja nga ai.Kashu kasha ni shani shagu galaw ai lam ni hpe masing da let bat mi hta kalang shata mi hta kalang atsawm sha rau dung let tsun sharin shaga lam hpe galaw yang kaja nga ai.Bat mi hta kalang sha tsun sharin shaga ai re majaw anhte mung myit galu ai hte kashu kasha ni hku nna mung kanu kawa kaw nna atsawm sha ladat jaw hkrak hkrak tsun ai re majaw ningdang na mung yak na rai nga ai.

Shi a shut ai lam hpe bai myit sumru sharai la lu na rai nga ai.Pawt sindawng ai ga si lawm ai sharin shaga lam gaw nhtang hku she akyu nga chye nga ai.Hpa majaw nga jang kashu kasha ngu ai ni mung shinggyim masha ni re ai majaw masin pawt ai rai yang shanang chye ai majaw rai nga ai.

Nhpri nem ai lam ni hpe shanhte mung nra sharawng nga ai.Raitim mung ningdang nlu jang gaw kanu kawa hte man ap  nkam hkrum ai majaw tsan ai shara de hprawng hkawm gaw nkaja ai akyu ara ni yawm na matu kaja dik ngu sawn la ai majaw rai nga ai.

Kanu kawa ni a matu mung myi npu hta nhpri nem ai kashu kasha ni gaw shanhte hkrai tsap nga ai gaw tinang nmu lu ai majaw tsampu lam yawm nga ai.Kanu kawa hte tsan ai nga tim tinang nga ai lam gaw hprinem ai nhprinem ai lam hpe kanu kawa ni hpe nchye shangun ai sha san wa jang mung hprinem nga pyaw ai ngu sha tsun shangun chye ma ai.Dai rai yang she tsan ai shara hta kanu kawa mung kashu kasha mung myit simsa hte nga lu nga ai.

Dai nrai yang myit tsampu nga ai hte kanu kawa mung myit hki ba ai,shani shagu langai hte langai akyu ara nnga ai lam hpa majaw galaw nga na rai,tinang mai byin ai rai yang tsan ai shara kaw nna madi shadaw garum ya ai lam galaw mai nga ai.

Kanu kawa ngu ai gaw manu dan dik nga ai.Raitim kashu kasha ngu mung shinggyim masha re majaw manu dan nga ai ngu ai lam anhte kanu kawa ni grau nna sadi ai rai yang kanu kawa hte kashu kasha ni a kanawn mazum lam gaw hprinem nga pyaw lu na sha rai nga ai law.

By: Munghkrang