Kasha La Ni Hpe Kawa Ni Sharin Galaw Ya Mai Ai Lam

Anhte kasha (la) ni a myit masa hte seng ai n gun lu na matu anhte kawa ni a lahku lamai ai lam grai na ra nga ai.Anhte ma langai bawngring galu kawa wa na matu kanu gaw ahkyak dik shara hta nga ai nga nna tsun ga ai.Lama na ma gaw la kasha re nga jang gaw shi a matu kasi kamang kaja tai wa na kawa mung ahkyak dik shara hta na na matu ahkyak nga ai.

Anhte kanu kawa shagu gaw kasha ni a matu shawng nnan na sara ni rai nga ga ai.Kawa ni gaw mungkan pinra hta sak hkrung nga lu na matu prat sharin ginlam ni hpe sharin ya na wa rai ng ai.Ndai zawn sharin ginlam hpan ni hta prat a matu ahkyak dik sharin hpan ni hpe mung chye da ra nga ai.

Anhte hkrat sum ai lam hte awng dang ai lam gaw gara hku ngu ai lam hpe atsawm sha chye na hkra sharin ya ga.Shingjawng poi ni ginsup hpan ni hta kawa gaw kasha (la) a matu kaja dik ginsup manang rai nga ai.Kaji ai ten kaw nna kasha (la) hte ginsup yang asum jaw chye nna dang lu ai lam a namchyim hpe hkam sha shangun chye ai wa rai nga ai.

Dai hta n ga sum wa ai ten ni hta mung kasha (la) hpe n gun jaw shalan chye shawng nnan na masha byin gring nga ai.Ndai zawn hkrat sum ai gaw kaya hpa nrai nna hpang kalang bai shakut na matu kasha hpe kam ai lam ni hpe bai sharin ya ra nga ai.

Bai nna kasha (la) ni hpe amyu shayi ni hte seng nna tengman ai myit masa nga hkra sharin ya ga.Amyu shayi ni hte tsun shaga kanawn mazum na matu kawa gaw hpring zup ai kasi kamang rai ra nga ai.Ma kaji ten prat kaw nna amyu shayi ni hte seng nna hkungga ai lam nnga ai ga ni laikyang ni hpe ma hpe mani hpa hku nna pyi nmai sharin ya ai.Dai majaw amyu shayi ni hte seng nna ahkyak dik lam ni yawng hpe kawa ni hku nna sharin ya ra nga ai re

Bai nna kasha (la) hpe tsawra myit a lachyum,tsawra myit hte seng ai lam ni hpe sharin ya na mung ahkyak nga ai.Ndai gaw kawa langai gaw kasha(la) hpe sharin ya gring ai manu dan ai sharin ginlam rai nga ai..Masha langai a prat mahkrum madup ni,kawa ai prat a mahkrum madup ni hpe tsun dan ai gaw kasha (la) hpe kam ai lam nga nga hte shawng de hkawm sa na matu marai rawng shangun nga ai.Ndai zawn tsun jahta chyai ai lam gaw kawa hte kasha hpe grau nna sindun sumri ngang shangun nga ai.

Bai nna kasha (la) hpe n gun atsam rawng ai wa byin na matu gaw kawa ni ahkyak dik lit magam langai rai nga ai.Tengman ai hku tsap ai hte tinang lagaw tinang tsap kam hpa lu ai masha byin na matu gaw kaji ai ten kaw nna sharin ya ra ai.Kaning re ai masa hta gaw n gasat gring ai,gara ten hta gaw tinang hkum tinang makawp maga na hte tinang tsawra ai wa a matu bai ginhtang gasat ra ai ngu ai hpe chye na hkra sharin ya ra  ai.

Kaga masha wa hpe dang sha ai lam gaw ntara ai lai kyang re ai lam lam shagu hpe tengman tara ai hku nna hparan ra nna tsang ra hpa lam ni hpe tau nau chye na lu na matu mahkrum madup hpe sharin ya ra ai.

Mungkan ga ntsa ma ni a tinggyeng ningmu nga wa hkra garum ya ra ai.Anhte kanu kawa shagu gaw tinang a kashu kasha ni hpe awng dang ai ni sha byin shangun mayu nga ai.Raitim awng dang ai lam gaw nbung ai masa lam ni hte du sa chye nga ai.Ndai zawn awng dang ai lam de du lu na matu gaw ladat masa lam ni hpe ma ni chye na gring nna,kawa a hpaji jaw ai lam hpe lu na matu wanglu wanglang ga shaga lu ra nga ai.

Bai nna mahkrum madup nnan ni hpe mung ma ni hpe sharin shachyen ya ga.Anhte ma shagu gaw kanu yan kawa hpe tsawra ai lam nbung nga ai.Anhte kanu ni gaw shanhte kaji ai ten kaw nna kya ai ladat masa ni hte lahku lamai chye nna kawa ni gaw mazut ai ladat ni hte tsawra chye ga ai.Ma hpe gang shalung ai,lagaw kaw nna nhtang chyaw di ai,lapa ntsa hta mara nna hkawm chye ga ai.Ndai zawn nbung ai lam hte machyu hkra ai lam ni rau mahkrum madup ni hte kaba wa na matu gaw ma ni matu ahkyak nga ai.Kasha (la) rai yang gaw gwi gwi galaw ra ai lam,sawk sagawn ai hte share shagan na matu kawa ni a ya na zawn lahku lamai ai lam gaw ahkyak nga ai.

Bai nna la kasha ni galaw ai lai ni hpe mung sharin ya ra ai.La kasha ni galaw ai dum nta kata shinggan gram lajang ai,gyin shalat ai lam hte lata hpaji ni hpe ma hpe grau nna hku hkau hkra kawa ni hku nna sharin ya ra nga ai.Kaji ai ten kaw nna gram lajang ai hpaji ni hpe sharin ya yang kaba wa yang n lagawn chye ai,magam bungli hpe myit shang sha ai,la jet ai hku nna lit la lu ai wa hku nna kaba shangun lu ai.Magam bungli shara hta shang ai shaloi mung kaga masha ni hta grau nna atsam marai hpring atsam ningja rawng ai wa byin wa na rai nga ai.

Bai nna tinang a bu hpun palawng ni hpe mung lai ladat hte hkra bu hpun chye ai,sari mi arawng asan awan rai bu hpun chye ai lam ni zawn re ai hpe kawa ni hkum nan sharin ya lu nga ai.Dai hta n ga ja gumhpraw hpe mung atsawm rai jai lang chye nna tinang hkum nan mung shadu lu shadu sha chye hkra anhte kawa la ni sharin ya yang she anhte a kasha (la) ni gaw kawa kaja ai hkring htawng hpe lu nna kawa hpe tsawra let mahkrum madup machye machyang hte hpring nna si mani ai ma ni tai wa lu na rai nga ai law.