Karai Lata Hta Ap Tawn Da U ( Youth Program )

Karai Lata Hta Ap Tawn Da U

          Nkau ni gaw nang hkrat sum nga ai ten, mani jahpoi asawng na ra ai, nang awng dang ai ten ni hta mung, manawn nga na ra ai, nang npu de du ai ten hta, kabye mayu ai ni law na ra ai, nang ntsa de du mat yang gang jahkrat mayu na ra ai, kaja nga yang nang a sak prat nem tsaw ngu ai gaw, nang hpe shakawn shagrau lu ai karai a lat hta sha nga nga ai, dai majaw, lam shagu hta karai a lata hta ap nawng da let shakut hkawm sa ga ngu shawng nnan e tsun mayu ai.

Dai hta nang a sak prat gaw, dwi dat hka dat rai nga ai majaw hpa lam hta mi raitim, myit marai ja ja ngang ngang kang kang hte shakut hkawm sa ga, sak prat a myit machyi lam ni hpe karai a makawp da ai shingwang hta shinglum nga lu hkra shakut nga ga, nsin nnga yang nhtoi ngu nga na nre zawn sak prat a mayak jam jau lam ni yawng mung awng dang lam a matu ninggun tai wa lu na re ngu mung n gun jaw mayu ai,

N’galai shai ai Karai Kasang a tsawra myit ni hpe bai yu yu yang, Anhte shinggyim masha ni a tsawra myit hpe yu yu yang, gawm kaw rawng nga ai hpa hka hte bung nga ai jahkring na laman hta gaw lum taw nga nna, na wa yang, katsi wa nga ai, raitimung Karai jaw ai tsawra myit gaw galoi mung shinglum nga ai, anhte shyinggyim masha ni a tsawra myit gaw, tsawm taw yang she, lu su nga yang she, galaw ya lu ai atsam ni nga yang she, ngu ai lam ni a ntsa npawt da nga ai, raitimung Karai a tsawra myit gaw dai zawn lam yan ni hta npawt nda nga ai, anhte shyinggyim masha ni gaw ntsa lam hkrang nsam hpe sha malawng maga yu nga ma ai, Karai Kasang chyawm gaw kata maga sha grau yu nga ai re.

Shyinggyim masha ni gaw, tsawm ai ten, kaji ai ten ni hta sha, shada da myit shang sha chye nga ga ai, nsam galai baw hpraw wa rum, ai ten ni hta gaw dai myit shang sha ai lam ni zim mat chye nga ai, raitimung anthe hpe hkye hkrang la ai Madu Karai Kasang gaw galoi ten hta raitim, ngalai shai ai tsawra myit ni hte tsaw nga dingyang rai nga ai, bai anhte shinggyim masha ni gaw tinang hpe, sadi ndung ai wa hpe gaw, myit machyi chye nga ai, tsawra myit ni gaw nju ai myit ni hte jahtum kau chye nga ma ai, raitimung Karai Kasang chyawm gaw shi hpe shut ai ni a matu, mara ni yawng hpe Udang ntsa hta sai hkaw hkam let jahtum kau ya sai rai nga ai.

Karai Kasang jaw ai tsawra myit ni zawn, kun dinghku, makin jinghku, manaw manang ni hpe tsaw ra lu na nga yang, tsawra myit ni gaw, galoi mung nju ai lam de du wa lu na nrai nga ai, tsawra myit ni gaw galoi mung shinglum nga let tsawm htap nga lu na rai nga ai dai majaw tsawra ai ramma ni, hpa sha mi galaw galaw  Karai kaw akyu hpyi ai amu magam hte shawng  galaw let hkawm sa shakut nga ga, akyu hpyi ai lam gaw kam sham ai anhte hkristan ni a asak hte hpung shingkang nan rai nga ai re. bai dai hta n gun jaw mayu ai lam gaw, hkawm sa nga ai hkrun lam hta mayak lam amyu myu hte hkrum wa ai ten, myit ndaw ai sha dai ju sumpum lam a jahtum hta prinem tsawm htap lam ni de hkawm sa lu na re hpe myit dum let shakut hkawm sa ga ngu tsun mayu nngai law.

Anhte shinggyim masha ni gaw, bu hpun palawng hte, makoi magap da chye ma ai, galaw sa ai lam ni hte mung makoi magap da chye ma ai, mani sumsai nsam ni hte makoi magap da chye nga ga ai, na wa yang tinang makoi magap da ai hpe malap kau  nna, dai prat hta pyaw mat chye nga ai raitimung lani mi na nhtoi hta, Karai Kasnag a man hta tinang a, jaw ai lam hpe bai mu mu dat ai shaloi, tinang hkrai kajawng na rai nga ai  dai majaw ya yang  makoi magap da ai lam ni hpe koi yen kau let, Karai hta kam hpa let shakut hkawm sa ai rai yang teng sha awng dang ai sak prat hpe lu madu wa lu na rai nga ai ngu

#youth

#rvakachinservice