Kanu Num Ni A Prat Nnan Kun Dinghku Magam Bungli

google photo

Tsawra ai kun dinghku kanu num dai na prat hta anhte kanu num ni a magam bungli ni gaw tsawm htap lam hte hkamja lam,num la kanawn mazum lam,machye machyang hpaji hparat hkum zup lam,aten hpe hparan lajang chye ra ai lam ni zawn re ai kanu num langai galaw sa wa ra ai lit magam lam ni gaw grai law la nga ai re.

Kun dinghku langai hpe atsawm sha zinghkang dang lu ai gaw dinghku num langai a matu awng dang lam langai mung rai nga ai.Anhte kun dinghku kanu num langai a kun dinghku zinghkang ai lam ngu ai hta dinghku kata bungli galaw ai,zinghkang kaja na,nat sadang hpe yu nna koi yen,hkrut shazai bu hpun,lagawn lamawn lam nnga ai lam hte kun dinghku kanu num magam hta hkan sa ra nga ga ai.Ndai lam ni gaw anhte kanu num ni hkan sa galaw na gaw teng sha rai nga ai.Raitim prat madang ni hkawm taw nga sai majaw kun dinghku kanu num ni a matu galaw sa ra na magam bungli ni grau nna law jat wa nga sai re.

Kun dinghku dum nta bungli ni sha n galaw ai hkum nan shinggan bungli galaw taw nga ai kanu num ni a matu grau nna yak hkak law wa nga ai.Ya na prat na kun dinghku kanu num ni moi shawng de na kanu num ni zawn dum nta magam bungli sha dingkuk galaw nga na gaw nmai nga sai.Dum nta shangun masha ni hte magam bungli nkau ni hpe ap tawn da nna madu a bungli ni hpe maju jung galaw lu nga ai.Anhte shinggyim masha langai a prat a matu magam bungli galaw ai lam gaw grai nan lachyum rawng nga ai.

Shang gumnhpraw nlaw tim law ai raitim tinang lata da ai magam bungli gaw sari sadang mung rai nga ai.Bai nna tinang hkum nan magam bungli galaw ai gaw tinang hkum tinang hkam hpa let shamyet shanat mayu ai lam nnga tinang hkum tinang kam hpa lu ai lam mung rai nga ai.Ndai zawn tinang bungli hta hkum nan sharawng shara galaw ai kanu num hpe tinang a ningrum ningtau hte makau grup yin masha ni mung tinang hpe hkungga yu kaba lu na sha rai nga ai.

Dai re majaw anhte kanu num ni hku nna kade daram kashu kasha ni hpe aten jaw ra ai mi nga tim tinang a magam bungli hta nhkra na matu mung sadi ra nga ai.hkinbawng hte bung ai kanu ni gaw dinghku woi awn taw nga ai ningrum ningtau wa kaw nna tam tawn da ai ja gumhpraw lam ni hpe zing mahkawng ai,dum nta lam ni hte seng nna bai jai lang ai lam ni hta jaw kaja na ahkyak nga ai re.

Anhte kanu num ngu ai ni gaw hkinbawng hte bung ai ngu ai hta hkauna mam hkai ai ten hka ni ung taw nga na matu na kawng ngu ai hkinbawng galaw ai zawn ningrum ningtau wa tam wa ai ja gumhpraw ni  hka zawn nlwin yawng mat na matu ningrum ningtau jan kaw nna dai hka zawn lwin yawng lai wa ai ja gumhpraw ni hpe nga gring nga ra ai shara hta nga na matu maga da lam hpe galaw ya ai na kawng hkinbawng hte shabung ai lam rai nga ai.

Tsun ga nga yang gaw ja gumhpraw hpe  hparan lajang ai wa ngu mayu ai rai nga ai.Anhte kanu num ni hku nna nra ai shara ni hta ja gumhpraw hpe law law njai ai sha ja gumhpraw ni majoi njai lang na matu ahkyak nga ai.Bai jai lang ai ten hta mung madu wa maga na shinggyim lam,tinang magam na shinggyim lam hpe rap ra hkra jai lang na mung ahkyak nga ai.Bai nna njai nlang nmai re ai ten ni hta mung shajan jai lang ai lam nnga hkra sadi ra ai,ningrum ningtau wa hpe mung majoi shajan jai lam ai lam koi gam shangun chye ra ai.

Shang gumhpraw gaw kade,lani mi jai lang ai kade,ma ni a matu jai gumhpraw gaw kade,shinggyim lam hta gaw kade shawng de kaning re lam ni hta ja gumhpraw htum ra ai ngu ai lam ni hpe tinang a ningrum ningtau wa ni hpe tsun dan ra nga ai.Dai rai yang she dum nta madu wa hku nna mung shadawn sharam jai lang lu na rai nga ai.

Bai nna makau grup ying kaja mung galaw ya ra nga ai.Anhte a ningrum ningtau wa hpe tsawra manu shadan garum na matu mung ra nga ai.Anhte shinggyim uhpung uhpung hta  shinggyin kanawn mazum lam ngu ai mung ahkyak ai re majaw kanawn mazum lam hta si mani hte shang lu ai kanu num ni gaw lam magup hta gan ga wa hkra galaw lu nna myit jasat ni mung grau dam lada wa lu nga ai.

Anhte kanu num ni kaw nna kaja ai makau grup yin shinggyim kanawn mazum lam hpe gawgap da lu ai gaw kashu kasha ni kaba wa ai ten makau grup yin kaja hpe gawgap da ya chyalu mung rai nga sai.Kahpran galan katsang kawang rai zen ai myit let ai kanu num ni gaw galai shai nga ai prat hta katsang kawang zet let ai kanu num ni a matu dakan ra ai lam ni law nga ai.Anhte moi na salang ni tsun gaw madu wa yup nrawt shi yang galaw ra ai magam bungli ni hpe galaw ra ai nga tsun ma ai.

Gara hku mi nga tim ya prat nnan na kanu num ni gaw dai hta grau nna atsam marai dat galaw ra nga ai.Ma ni yup nrawt shi yang hkum hkrang hkamja tsawm htap wa hkra ginsup lam ni hpe bat mi hta kade lang ngu masat galaw ra nga ai.Jahpawt shat galaw lajang ra ai.Dum nta san seng lam galaw ra ai.Bai bungli sa na matu hkyen lajang ra nga ai.Shani tup magam bungli galaw ai kaw nna dum nta de bai wa ai ten ma yu lakawn ai laika hti ai lam ni hpe galaw ra nga ai.

Ma woi lakawn ai ten ni hta mung machye machyang lu na matu hpaw madat ai lam ni hpe mung mai galaw nga ai.Ndai lam ni gaw lani mi hta galaw ra ai ahkyak ai lam ni rai nna kata lam hpe gaw tinang hkum nan aten ni hpe hparan lajang galaw ra nga ai.Anhte laika hti ai ngu ai lam gaw ma shayup let chyu jaw let mai galaw nga ai.Phone hte mi hti hti,laika buk ni makau kaw tawn da ai rai yang aten lu yang lu ai hku nna tinang magam bungli hte seng ai lam ni hpe hkaja ai hte machye machyang ni hpe jahpring la ra nga nga ai.Dai rai yang she zet let ningtawn ai kanu num ni byin wa nna kashu kasha ningrum ningtau jinghku ni mung arawng la lu nna kun dinghku mung rawt jat galu kaba wa lu na rai nga ai.

Add new comment

6 + 8 =