Kanu Kawa Ni A Matu

Tsawra ai nu wa hpu nau ni anhte sak hkrung mungkan hpe bai yu dat yang shinggyim masha,dusat dumyeng,hpun kawa,nampu nampan ni gaw uhpung uhpawng hte rau nga ai tu nga ai hpe mu mada nga ai.

Anhte kun dinghku langai a gahkyin gumdin simsa ngwi pyaw lam ngu ai gaw kanu kawa hte kashu kasha a shada tsawra let gindun nga ai hta madung rai nga ai.Kanu kawa hte kashu kasha ngu ai gaw hka hte hka law pan zawn sha hka tsaw yang hka law pan mung tsaw wa na rai nga ai.

Katsi pyaw ai hka zawn re kanu kawa nnga yang kashu kasha ni a prat mung gara hku sak hkrung nlu ai zawn hka lawng hka nawng a tsawm htap lam hpe shapraw ya ai hka law pan hte bung ai kashu kasha ni nnga jang mung kanu kawa ngu ai mung hpa lachyum npru ai hte bung nga ai.

Dai hpe mu chye ai Hpan Madu Karai Kasang gaw kanu kawa hte kashu kasha ni hpe shada tsawra hkat gahkyin gumdin nga lu na matu bang da ya sai rai nga ai.Shinggyim masha zawn htauli htaula myit nyan nrawng ai du sat ni pyi tinang a kashu kasha ni hpe bau maka tsawra chye ai myit hpe Karai Kasang gaw jaw bang da ya nga ai re.

Loi dik ga shadawn tsun ga nga yang aw U kanu langai gaw shi a kasha ni hpe kade daram tsawra ai nga jang shi sha na shat hpe nsha ai sha kasha ni hpe tam jaw chye nga ai.Hpyen hte shingra tara hpyen hkrum wa jang kasha ni hpe shi a singkaw npu hta shimlum ai hku maga la chye nga ai.

Hkrit hpa hpyen ni hkrum wa jang asak hpe ahkyak nda ai sha kasha ni a matu ninghkap makawp maga ya ai dai ni gaw kanu kawa a tsawra myit kumla kaba nan rai nga ai.Dai re majaw kashu kasha ni a ntsa tawn da ai tsawra myit ngu ai gaw hpa hte shingdaw tim nlu dep nga ai re.

Kanu kawa tsawra myit kade daram dam lada kaba ai ngu hpe anhte yawng chye chyalu rai nga ai.Raitim kashu kasha hpe ntsawra ai kanu kawa mung nga chye nga ai.Kashu kasha hpe tsawra tim tsawra ai ladat njaw ai lam mung rai na re.Nkau hta gaw kanu kawa shada da ntsawra ai majaw namhpun byin taw nga ai kashu kasha hpe kabai kau ai kanu kawa ni mung nga chye nga ai.

Hpa mi nga nga mungkan hta jam jau jaw dik ai manghkang law law tam galaw nga ai ni gaw kanu kawa ai tsawra shawang myit hpe nlu la ai ni rai taw nga ai hpe anhte kanu kawa ni sadi dum chye ra nga ga ai.Anhte kanu kawa tsawra myit hpe nlu la ai sha kaba wa ni hpe ntsa lam hku nna hpan lahkawng mu lu nga ai.

Langai gaw kaga ma ni kanu kawa tsawra myit hpe lu la hkam sha nga ai hpe mu jang shi hkum shi myit kaji garen wa ai.Kaya myit ni rawng wa ai.Masha hpawng de nsa gwi wa ai.Myit htum myit daw loi nna hpang jahtum tinang hkum tinang sat si wa chye nga ai.

Lahkawng ngu na hpan ni gaw kaga ma ni gaw shanhte a kanu kawa ni a tsawra myit hpe lu la nna kanu kawa ni hte rau pyaw nga ai hpe mu jang manawn masham myit ni shang wa nna myit machyi ai lam pawt sindawng ai myit ni hte ra marai galaw ai myit ni byin pru wa nna masha ni hte kanawn mazum ai lam hta nhprinem nna gali ga law byin nna masha sat ai lam nanghpam lu sha let hten za ai lam ni hpe mu lu nga ai.

Dai majaw kanu kawa ni a lit madung gaw kashu kasha ni hpe tsawra shawang myit hpring jaw nna ra mara hta bau makawp pawnba la na matu ahkyak nga ai.Anhte nkau kanu kawa ni gaw tinang a kasha ni hpe matsa mawa ga sharin ya nga ai.Ndai gaw kaja ai lam gaw nrai nga ai.

Anhte kanu kawa ngu ai ni gaw kashu kasha ni a matu shawng ningnan na ningshawng sara ni rai nga ga ai.Kaja wa byin gring ai gaw dum nta hta tara laika sharin ya ai,tsawra shawang myit rawng ra ai lam,si mani myit su wa hkra sharin ya ai lam,jahpawt shana akyu hpyi ai lam ni hpe sharin ya ra nga ga ai.

Ndai hte seng nna hti ga ai hta American gumsan magam Abraham Linecon gaw shi gaw bawnu nyan grai ningtawn ai majaw shi manang ni shi hpe san ai gaw nang hpaji ni hpe gara kaw nna sharin la ai rai ngu san jang shi gaw ngai jahku ning daram kaw nna nu a lahpran hta dung let nu gaw shani shagu ja chyum laika hti tsun dan ai hpe madat lai ai nga tsun ga ai.

Kun dinghku langai hta kanu kawa ni shara gaw grai nan ahkyak nga ai.Dai re majaw kanu kawa ni mung kanu kawa lit magam hpe kangka hkra gun hpai na ahkyak nga mali  ai.Bai nna anhte kanu kawa gaw kaja ai mi rai rai nkaja ai mi rai rai anhte hpe shangai chying hkai ai kanu kawa re majaw tsawra hkungga la ra di ra nga ai.

Karai a tara kanu lam shi hta mung n nu yan nwa hpe hkungga la ra di u nga nna hkang da nga ai re.Kanu kawa tsawra shawang myit kade daram kaba ka dingsa shaje ni hpe kabai kau ai htung nga tim kashu kasha hpe kabai kau ai gaw htung nnga ai.

Kashu kasha ni kade mi nkaja nhkru ai kanu kawa chyeju hpe nchye na ya ai nga tim tsawra dingyang mara dat ya chyena ya  gaw kanu kawa ni sha rai nga ai.Anhte kashu kasha ni gaw kanu kawa  ni a chyeju hpe nchye na ya ai hte roi shagoi di ai lam ni galaw chye ga ai.

Kanu kawa ni asak kaba ugut gu ai ten ana ahkya kap ai ten tsi gawn lajang bau maka nga ra ai ten nkam aput angun nga chye ga ai.Anhte nkau gaw tinang kanu kawa ni hpe si mung nsi lu ai nga tsun ai lam,jaw sha ai ten hta mung maw sha u mayu u nga tsawra shawang myit nan nlawm ai sha bau maka taw nga ai hpe yawn hpa nan mu nga chye nga ga ai.

Tsawra ai nu wa ni tinang kanu kawa nshut hpyit ga.Kanu kawa myi prui hkret na hku n galaw ga kanu kawa myi prui kahte mi kashu kasha matsan prat mi nga nna hpaji chye ai ni tsun shadum da nga ai.Kanu kawa hpe shayawn myi prui hkret hkra galaw ai kashu kasha gaw galoi mung myit simsa nga pyaw ai lam nlu la nga ai nga nna mung tsun shadum da nga ai re.

Gara hku kanu kawa chyeju hpe htang lu na nga yang dai gaw grai yak ai lam gaw nre.Matsan ai majaw ngu nmai tsun jahpai nga ai.Anhte nkau gaw matsan ai nga nna kanu kawa hpe kabai da chye ga ai.Tinang gaw matsan ai raitim kanu kawa ni a matu shadu da ai,galaw da ai hpe shawng nnan jaw ai rai yang kanu kawa gaw mai raitim nmu ai raitim kabu ai myit hte sha na sha rai nga ai.

Kanu kawa ni hte rau jawm jahta chyai ai,shanhte tsun ai hpe madat ya ai lam ni gaw tsan ai shara kaw nna nna ja gumhpraw shagun ai hta grau nna kanu kawa ni ra na rai nga ai.Jet ai tsawra shawang myit hte kanu kawa hpe galaw jaw ai lam tinang a majaw kanu kawa kabu myit pyaw ai lam gaw chyeju hta ai lam mung rai nga ai.

Kanu kawa ni sha kam lu kam ai ten jaw sha ai gaw ja,hkamja lam nnga ai nna lu sha nkam ai ten jaw sha ai gaw gumhpraw,hpa mung sha nkam machyi taw nga ai ten jaw sha ai gaw magri madang sha nga nna hpa manu nnga nga sai nga nna hpaji chye ai ni tsun da ma ai.Dai majaw anhte kanu kawa ni lu sha jin ai ten jaw lu jaw sha bau maka sa wa let anhte a kanu kawa ni myit pyaw lam hpe galaw sa wa ga law.    

By: Mung Hkrang