Kanu Kawa Ni Chye Da Gring Ai Ma Ni A Myit Hta Na Manghkang Lam Ni

google photo

Tsawra hkungga ai kun dinghku kanu kawa ni anhte kashu kasha ni gaw kaji ai ten hta gaw kanu kawa ni a ga hpe madat nga ai.Raitim asak aprat kaba wa nna ramma prat du wa jang gaw tsun shaga ai ten loi yak wa ai hpe anhte dum chye lu na ga ai.Mahkrum madup law ai ai masha kaba ni a ga mung shanhte a na hta nau nshang mat wa sai.Ndai gaw anhte kanu kawa ni a myit ai lam rai nga ai.

Anhte ramma ngu ai ni gaw wanglu wanglang shanglawt ai lam hpe hpyi shawn chye nna anhte masha kaba ngu ai ni mung myit tsang ai hte  up hkang chye ai majaw myit masa lam ni shai hkat chye nga ga ai.Ah Nu ni,Ah Wa ni hpa nchye ai,ramma she re me dai daram sha gaw chye na ya gring ai ngu ai lam ni,nta na dinggai hte dingla grai guk ai dum nta hta nkam nga ai nga nna anhte a kashu kasha ramma ni ntsen pru chye nga ai.

Anhte ndai shara hta hpa baw gaw manghkang rai nga ai kun? ngu ai hpe myit masa lam nbung ai majaw rai nga ai.Ma ni a myit hta gara hku nga taw ai kun?hpa baw ni garum ya lu na kun?kanawn mazum lam grau ni htep hkra gara hku nna galaw na kun? nga nna myit sawn la ai kanu kawa ni gaw kashu kasha ni hte  kanawn mazum grau nna hprenem kaja ai hpe mu lu nga ai.

Shanhte ai myit masa lam,shanhte a shingra tara hpe masha kaba ni nchye na ya ai,chye na mung nre nga kashu kasha ramma ni hta myit sawn hkam la chye nga  ma ai.Kaja wa nan mung nchye na ya ai kanu kawa masha kaba ni nga chye nga ai.Nmai galaw ai,nmai wa ai ngu ai rit kawp tara ni hte shagyip ai shanhte tsun ai hpe madat shangun  mayu nga ai re.

Anhte kashu kasha ramma ni hku nna mung wanglu wanglang shanglawt lu ai hku nna nga sa lu na hpe ra sharawng nga ai.Myit tau ya chye na ya ai hte bawngban jahkrum lu ai kanu kawa masha kaba ni shanhte byin shangun mayu ma ai.Prat hta hkan nna machye machyang nga ai masha kaba ni byin shangun mayu ai,masat shagyip ai lam ni hte gyit hkang ai lam ni kaw nna shanhte pru le hkawm mayu ai.Myit  ru tsampu lam ni hpe asan brang lang tsun dan lu na hpe ra sharawng ai myit masa shanhte  hta nga nga ai.Kashu kasha ramma ni  law malawng ai myit hta gaw shanhte a hkam sha lam myit ra lam ni tsun dan ai hpe madat shangun mayu ai rai nga ai.

Anhte kanu kawa masha kaba ni hta masha kaba tsun ai hpe madat ra ai,ga bai hkum htang tsun ai hpe hkan nang ra ai ngu myit jasat lam  gaw kaja wa nga jang maga mi maga de njut shanawng ai lam rai nga ai.Anhte kashu kasha ramma ni hku nna shanhte a mu mada ai lam hkam la sawn la ai lam ni prat hta hkan nna galai shai ai lam ni hpe kanu kawa masha kaba ni hte tsun bawngban mayu ai,tsun dan mayu nga ai re.Dai rai yang anhte kanu kawa masha kaba ni hku nna mung shanhte tsun ai shanhte a ningmu ni hpe madat ya let shanhte hte ningmu garan kachyan hkat let jaw kaja ai maga de shanhte hpe gang zinlum la na gaw kaja dik rai nga ai.

Bai anhte kashu kasha ramma ni gaw shanhte a hkam sha lam hpe ahkyak shatai shangun mayu ma ai.Anhte kanu kawa masha kaba ni hku nna shanhte a matu shang hparan ya ai.Ndai lam gaw shanhte a matu kaja wa mahtai rai nga ai kun?nau wa nmai sawn la nga ai.Ga shadawn manaw manang langai hte pawt hkat wa ai rai jang hpang de dai manang wa hte kanawn shagu kanu kawa ni kaw nna nra ai,dai manang wa hpe adawt adat rai tsun shaga ai lam hpe shanhte a matu myit ru myit yak lam ni byin shangun chye nga ai.Kaja wa nga jang gaw shanhte lahkawng hpe shada da grau nna ni htep hku hkau lu na matu anhte kanu kawa masha kaba ni lapran shang dat ya ai lam gaw shut ai lam rai nga ai.Dai re majaw anhte a kashu kasha ni a myit hta gara hku hkam sha ai ngu ai hpe shawng chye hkra galaw ai gaw grau kaja nga ai.

Bai nna tsawra kanu kawa ni e anhte a kashu kasha ni gaw shanhte hpe kanu kawa ni hkum nan kam ai hpe ra sharawng nga ai re.Anhte ramma shingra tara hku hkawm sa shamu shamawt ai,prat ram wa ai hte ma kaji nrai sai,kata lam myit tsang tsampu  nra sai lam hpe kanu kawa ni kaw nna kam shangun mayu nga ai.Lam shagu hta san jep sagawn mara shagun ai lam hpe anhte kashu kasha ramma ni nra sharawng nga ai re.

Anhte kashu kasha ramma ni gaw shara shagu hta hkum pat ai lam hpe nkam hkam sha ma ai.Ramma ni a prat hta tinang hkum nan dawdan lu ai hte wanglu wanglang rai nga sa lu ai wa gaw manaw manang ni a lapran hta ga tai nga ai sai re.shagyip hkum pat ai lam hta nga sa ai lam gaw shanhte a matu grai nan gyip gying hkam sha nga ai re.

Ndai lam ni hpe anhte kanu kawa masha kaba ni kaw nna chye na da sai nga jang gaw kashu kasha ramma ni hpe chye na hkra anhte kanu kawa ni shakut ra nga ga ai.Grau nna shanhte hte hku hkau hkra nga sa ra ai.Nbung ai ningmu ni hpe hkap la bawngban ra ai ngu tsun mayu ai.Dai rai yang she kanu kawa hte kashu kasha shada hprinem ai hku kanawn mazum lu nna shanhte a prat awng dang lam hpe pawt ba garum shingtau lu na rai nga ai law.

 

By: Munghkrang

 

 

 

Add new comment

5 + 3 =