Kam Mai Ai Kadai Ta ?

 1.Mungkan a mung masa, sut masa, makam masham masa ni hta gaw, kam ging ai, kam mai sai ngu ai kaw shamu shamawt nga ai re ngu mu mada lu ai. 2.Mungkan ntsa mung masa sha nrai, woi awn ningbaw ngu ai hpe lata yang mung, kam ging sai, kam mai ai, chye chyang sai ngu ai wa hpe lata ma ai. 3.Mungkan hta “ Ja “ manu gaw hpa majaw lung wa ai kun? Mungkan shara shagu jai lang ai gumhpraw hpe nmai kam wa ai majaw ja manu lung wa ai re. Dai hpe yu yang ja hpe mungkan ting grau kam ai hpe mu lu nga ai. Gumhpraw hten tim, ja gaw nhten ai ngu kam ai masa a majaw rai nga ai. 4.lai sai ten lu da ai jinghpaw wun pawng myu sha ni a kaja la ai mungdan law la ai sut gan ja gumhpraw, kaja la ai lamu ga, yi sun hkau na ni.. hpa majaw sum ginlut wa nga ai kun? Kam ging ai ngu ai nang/ ngai yawng kam ging ai, kam mai ai ni ntai ai a majaw, lu da sai raitim, bai sum ginlut mat ai re ngu mu mada ai. 5.Karai kasang a maga hku yu ga nga yang mung, anhte jinghpaw wunpawng myu sha ni hpe manu dan ai lamu ga, manu dan ai sutgan ja gumhpraw, grai jaw sai raitim, anhte wa dai gumhpraw hpe akyu jashawn nchye jai lang ai majaw, Ka- ni ya tai ma wa, ana zinli hte si htum ma wa re majaw, jinghpaw wunpawng amyu hpe nmat mat uga nga anhte nchye jai lang shi ai karai jaw da ai sutgan ja gumhpraw hpe karai kasang bai dawm la kau ai re ngu hkam sha mu mada ai. 6.Sutgan ja gumhpraw lu nna, jinghpaw wunpawng amyu sha ni hta atsawm rai nga pra ai ni nlaw la nga ai. Maga mi hku sawn yu yang, masha si htum mat na malai sut gan mat mat ai gaw grau kaja nga ai. Jinghpaw Wunpawng amyu sha ngu ai nnga mat yang, jinghpaw wunpawng mungdan ngu ai nga tim hpa lachyum npru nga ai. 7.Anhte Jinghpaw Wunpawng amyu sha ni rawt jat galu kaba wa ai amyu ni tai wa lu na matu gaw, kam ging ai kam ram ai masha law law ra nga ga ai law. Kam ram ai masha law wa lu na matu gaw 1. Dinglun hkam la gwi ai masha law law nga ra ai.2. Dinglun gwi ai masha law law mung nga ra ai. Yesu mungkan ga kaw shaning ( 33 ) ning sa nga yang, shi galaw ai hte shi sak hkrung lam hpe dinglun na matu galoi mung ala nga ai wa re. Yesu sak hkrung ai ten tsun ra ai hpe yawng tsun, dinglun ra ai hpe yawng dinglun rai nna, kaba wa ai hpe mu mada lu ai. 8.Mungkan ntsa hta kam ging sai, kam mai sai ngu nna, kam shut kau ai majaw, tinang asak sum mat wa, ja gumhpraw sum mat wa re mung law la nga ai. Anhte jinghpaw Wunpawng myu sha ni a labau hpe sawk sagawn hti yu yang, moi masha ni grai kam ging ai, sadi dung ai, magrau grang ai, masu magaw nchye ai amyu re nga kajai gumhkawng lai wa sai re. Kam ai hta madung da nna, shamu shamawt sa wa nga ai mungkan a mung masa, sut masa, hkrun lam hta, “ Kam ging ai amyu, kam mai ai nang, kam mai sai ngai” tai let, lam shagu hta awng dang ai ska hkrung hkawm sa lam hpe gawgap sa wa lu u ga

Crd :Dawshi Yaw ba ( Htoi Gintawng ) 2010 Yangon Buga Hpung Magazine

#youth

#rvakachinservice