Kaja ai ningrum ningtau jan,Kaja ai kanu

Sari rawng ai num gaw lung seng hta grau hpu nga ai. “Lung Seng” gaw ga kata, ga ntsa hta nga ai Karai Kasang hpan da ai nhprang sut rai yawng hta manu tsaw dik, hpu dik htum ai nhprang sut rai langai rai nga ai. Sari rawng ai num a manu gaw dai lung seng a manu hta pyi grau tsaw ai, grau manu dan hpu reng nga ai.

Nta madu jan   ningrum ningtau jan ni a prat gaw anhte a madu wa ni hpe tsaw dik de du hkra lahkam lu na matu n gun jaw ra ai, awng dang ai lam ni lu la hkra shadum shadut ai bungli ni hpe mung anhte galaw ra ai hta n ga kun dinghku simsa ngwi pyaw na matu shakut shaja ra ai dinghku kanu hku nna mung anhte tsap ra nga ga ai.

Ningrum Ningtau Kaja jan kaja mung tai ra ga ai. Dinghku kata hta dinghku num, dinghku la lahkawng yen a matu gunhpai ra ai lit magam lam law law hta na ahkyak dik ai lam gaw Karai Kasang a man, masha a man e ningrum ningtau kaja tai na matu rai nga ga ai. Sari sadang rawng ai num gaw madu wa a matu ningrum ningtau kaja tai ai wa rai nga ai.Ningrum ningtau kaja tai ai lam hta shada da madi shadaw hkat ai lam, hpaji jaw hkat ai lam,lanu lahku hkat ai lam gaw ra ahkyak kaba langai rai nga ai.  

Dinghku num kaja tai  na matu mung ahkyak nga ai. Dinghku num gaw dinghku a sut sin re, sut sin gaw ja gumhpraw sutgan hpe yawm mat,htum mat, kayun mat ai lam n nga hkra hkangzing makawp maga na lit lu ai wa rai nga ai.

Kanu kaja tai na matu mung ahkyak nga ai.  Dinghku kanu kaja ni a prat gaw Dinghku kata hta nta masha ni, kashu kasha ni mungga hta atsawm sha kaba wa lu na matu sasana galaw lu ai, sharin achyin ya lu ai kanu kaja tai na ahkyak ai. Hkristan dinghku kanu ngu ai gaw  tinang a kasha ni hpe makam masham lam hta nshut majung jung ai,madu hkum madu hkam hpa lu ai atsam ningbaw ningla kaja tai wa hkra shalat shapan lu ai Kanu tai ra ai.

Kashu kasha ni a matu ahkyak dik shara hta nga ai re majaw Kashu kasha ni kaja ai hku sak hkrung hkawm sa lu na matu yu  rem makawp maga ra nga ga ai re.Simani ningtawn ai kaja ai kashu kasha ni byin tai wa lu na matu mung anhte kanu ni yu gawn lajang ra nga ai. Anthe mungdan ai shawng lam kaja ai gam maka gaw Ramma ni nga jang, mungdan a shawng lam gaw dai mungdan a kanu ni a atsam hta madung rai nga ga.

Dai zawn sha bungli kaba ni hpe lit la gun hpai nga ai kanu ni gaw prat shagu madang shagu hta simani zetlet ai  hte awng dang lu hkra galaw lu na matu ahkyak nga ga ai.Anhte kun dinghku kanu ni prat a jaw ai lit ngu na hta yawm dik dinghku lahkawng hpe simsa ngwi pyaw awng dang hkra gaw gap ra nga ga ai.

Dai gaw tinang hpe shangai shaprat kaba wa hkra bau lahkawn lai wa ai kanu kawa nta masha hte tinang hkum nan gaw gap hpang la da ai kun dinghku  hpe anhte ni gawp yu bawn ba ra nga ga ai re.Dai majaw anhte kun dinghku kanu num ni gaw htingnu gap ninghkring ni zawn sha gaw gap ai bungli hpe galaw nga ra ai ni rai nga ga ai.

Ndai zawn gawp gap ai hta gara hku gaw ga na ngu ai lam mung grai nan ahkyak nga ai.Dai majaw anhte kanu num ni laika hpaji lam hta kung kyang na matu mung ra ai zawn kaja ai arawn alai nga na mung ahkyak nga ai.

Anhte hpaji ngu ai hpe gaw dinghku kanu rai mat tim galoi mung sharin la ra nga ga ai.Kun dinghku a majaw hpaji lam hpe jahkring kau ai nga yang kaji gyip ai sharen da hkrum ai prat de du mat shangun ai hte bung mat chye ai re.Kanu num ni gaw kun dinghku lam hpe gaw gap yu lakawn ai bungli hpe galaw nga ai zawn  tinang a hpaji hpe galoi mung galaw shakut nga ra na ga ai.Hpaji gaw grau chye magang kun dinghku prat hpe grau ngwi pyaw simsa hkra gaw gap lu magang sha rai nga ai.

Dai majaw kun dinghku hta ningrum ningtau jan kaja tai hkra sadi dung ra zawn dinghku kanu kaja hku nna shani shagu kaja ai hku nga sa lu na matu anhte kanu ni a tsawra shawang myit hte anhte a kun dinghku hpe sha n ga makau grup yin hte mungkan hpe shatsawm shahtap na matu anhte kun dinghku kanu ni shakut sa  wa ga law.

By:Mung Hkrang