Jet Ai Ngwi Pyaw Lam Hpe Tam U ( Youth Program )

Jet Ai Ngwi Pyaw Lam Hpe Tam U

          Tsawra ai Ramma ni, kadun la ai sak prat hta, myit pyaw simsa let nga sa chye na matu, ahkyak la nga ai, myit pyaw shangun ai lam ni law law nga nga ai, dai hta nkau ni gaw, hpaida da ai, malu masha hkum ai ai, namhpam ni hta pyaw hpa lam tam chye nga ga ai, dai lam yan ni a majaw, pyaw ai ngu shadu nga ma ai, dai pyaw ai lam ni gaw na na nhkam nga ai, dai lam ni a majaw bai byim wa na akyu lam ni a majaw, myit yawn myit tsang hpa ni kap lawm wa na hpe dum ra nga ga ai.

Bai nkau rai yang, myit lawm ai  magam lam ni hta len pyaw chye nga ga ai, tinang myit lawm ai magam bungli gaw, madu hkum hpe mung, masha wa hpe mung, hkra machyi ai lam nnga ai myit shang sha hpan ni byim gring nga ga ai. nkau gaw shawa akyu a matu yaw shada let, galaw nga ai magam bungli ni hte rau, galaw sa ai lam ni hta shang lawm ai a marang e, pyaw ai lam hpe lu la mai nga ai, masha wa hpe garum shingtau ai lam, akyu ara galaw ya ai lam, laga wa a sak prat hpe shatsaw ya ai lam zawn re ai magam lam ni sha, jet ai myit pyaw lam hpe shangai shaprat ya lu nga ai re, dai majaw tsawra ai ramma ni a sak prat hta jet ai myit pyaw lam hpe  tam lu na matu mi sak prat a kau chye mi hta shang lawm nga ai lam tsun shadum ya mayu ai law.

Shawang myit masa gaw, tawn da chye ai ni a matu, katsi pyaw ai namchyim hpe hkam sha lu nga ai, shawang myit gaw, zing da na matu nrai nga ai, garan gachyan na matu rai nga ai re, dai shawang myit ngu ai a bai lu la ai lam gaw, yawn garen ai lam nnga, machyi hkam sha ai lam ni nnga ai hte pawt sindawng ai lam nnga ai raitim, tinang mung simsa, masha wa mung simsa shangun ai lam gaw, dai shawang tsawra myit masa nan rai nga ai, dai zawn shawang myit law htam nga yang she, tang du ai akyu ni byim shangun nga ai re,

Mayak lam ni hte hkrum wa ai ten, mabyim masa lam ni, yak hkak wa ai ten zawn re ni hta, anhte ni gaw, myit daw mat chye nga ga ai, ndai lam gaw grai nan shut ai lam rai nga ai, dai ten ni hta e, nshayawm kau gring ai aten ladaw nan rai nga ai, grau nna atsam marai dat let shakut sa ra ai lam rai nga ai law, dai hta anhte nang ngai ramma ni a sak prat hpe lachyum nga hkra nga sa chye ra ai, dai hta lachyum nga hkra sak hkrung nga sa chye na mung ahkyak la nga ai, anhte shinggyim masha ni gaw, tsawm ai nam pan langai zawn sha rai nga ai kade ram mi tsawm taw nga tim, ngyip mat yang maza byim mat na sha rai nga ai dai hta myit malai hpang hkrat na mung tsang ra nga ai, sak prat a jan shang ten ni ngu ai gaw, tau tak sawn nlu ai lam rai nga ai, dai majaw sak hkrung nga ai ten ladaw ni hta, nju ndawng ai lam ni nnga ai sha, shawang tsawra myit ni law htam wa u ga, run hkrat mat ai ten she myit malai lu ai lam gaw, sawng dik ai rai nga ai.

 Tsawra ai ramma ni anhte shinggyim masha ni a manu gaw, shan nsam hte nseng nga ai, masha langai a manu gaw gawng shingyan hte nseng nga ai, hpaji madang hte mung nseng nga ai, bai masha langai a manu gaw, lu su ai lam matsan ai lam hte nseng nga ai, awng dang ai lam hte nseng nga ai, anhte nang ngai yawng hpe Karai Kasang hpan tawn da ai majaw, masha shagu gaw, manu dan ai hkrai rai nga ai hpe myit dum let, myit ndaw ai sha shawng lam de hkawm sa ga ngu n gun jaw mayu ai

Dai majaw nang kam ai myit hte myit mada tawn da ai lam ni gaw, hkrang shapraw lu wa chye nga ai, nang gaw kam let myit mada tawn da lam ni hpe dung let sha nga taw yang gaw nmai nga ai, shakut shaja hkrang shapraw nga yang sha awng dang wa lu na rai nga ai, nang a myit mada lam katu ai shakut hkawm sa ai lam ni gaw nang a makau grupyin ni hta nga nga ai, masha law law a myit sawn lam hte galaw sa ai lam ni gaw, gaup mat chye nga ai, dai ten, nang a myit mada lam ni gaw, gau ngwi ngwi hte hkrang dan dawng wa chye nga ai re, myit mada lam nnga yang, nang byim mayu ai lam ni nnga ai zawn byim mat chye ai hpe dum ra nga ai

dai majaw myit mada lam kaba hte magam bungli galaw u, dai myit mada lam ni katuu wa ai ten, dai lam ni byim wa lu sana gaw teng sha rai nga ai, dai majaw myit mada lam ni hpe galoi hkum kabai shamat kau u, sak hkrung nga ai ten ladaw ni hta, myit mada lam ni gaw nga wa na sha rai nga ai ngu

#youth

#rvakachinservice